Monday, December 13, 2010

Hmanlai hian mawm...Chemtatrawta hi a awm a mawm.....

Duhamna leh kan neih aia tha awt thin Mihring kan ni. He duhamna hi mihring zia nge ni a ransa leh ngaihtuahna neilo thilnung te zia ni ang le..?? Nge thil nung zawng zawng hian rilru thuhmun kan lo nei vek zawk..? Ani asin, thil nung dang pawh hian duhamna leh mi thil neih itna hi chu an lo nei ve meuh mai. Khatia Chemtatrawta’n  Rawtuai khawrhna tur ni awm tak,  a ram chhuahna a hman ngei tur nia rin, tui tak mai a chem a tat hriam rawt rawt lai khan, Kaikuang tukthuan eikham puar nelh nawlh chuan a englo inkhai nelh nelh chu a hmu a, a it ta tlat mai..He Kaikuang mihring zia pu duham tak mai leh mi thil neih it tlat mai avang hian Mizote thawnthu lar em em mai ,kan thupui ni bawk CHEMTATRAWTA thawnthu hi a lo pianchhuah phah ta ani..

Hmanlai hian mawm……Chemtatrawta hi a awm a maw, chem hi a tat rawt rawt thin a. Nikhat chu chutia tui tak mai a chem a tah rawt rawt lai chuan kaikuang hi a chem tahna bulah chuan a rawn kal a, Chemtatrawta tilte ah chuan a rawn chehsak ta hlawk mai a, Chemtatrawta na ti lutuk chuan Khaum zamna a fik ta hmawk mai a. Khaum chu a thin a rim em em a, Ram ar ngumah a deng ngheng mai a, Ram ar thinrim chuan Taivang bu a thaidarh ta vek a. Taivang thinrim chuan Sanghal kapah a sehsak a, Sanghal na ti lutuk chuan Bak awmna changel a tai thlu ta vek mai a. Bak awmna neilo chu Sai hnarah a lut a, Sai thin a rim a Pitarte In a chil chhe ta vek mai a. Pitarte thinrim chuan Tuikhur hnarah a e ta a.

Mite chuan,” Ka Pi, engatinge tuikhur hnarah i ek mai le ?”, an ti a. Pitarte chuan,” Saiin ka in a chilchhe vek a nih kha”, a ti a. Sai chu an han zawt leh a, Sai chuan,” Engahnge Bak ka hnarah ka luh teh eih..? “, a lo ti a. Bak chu an han zawt ve leh a, “Sanghalin ka in a chil chhe vek a nih kha”, tiin alo chhang a. Sanghal chu an han zawt a, “ Taivakin ka kapah a seh anih kha(h)..” tiin a lo chhang ve leh a. Taivang chuan Ram ar in a bu a thai  darh vek thu a lo sawi charh charh bawk a. Ram ar chu an han zawt ve leh a, Ram ar chuan, “ Engahnge Khaum in ka ngumah ah a den teh eih..?? “, tiin a lo chhang ve leh a. Khaum chu an han zawt leh ta a, “ Chemtatrawta’n ka zamna a satchhum anih kha”, a lo ti a. Chemtatrawta chu mite chuan tiin an han zawt a,” Chemtatrawt..!!! engahnge Khaum zamna i fiksak a..??”, an han ti a, Chemtatrawta chuan, “Kaikuangin ka tilte ah min chehsak a nih kha..” a lo ti chhum buk a. Kaikuang chu an han zawt ve leh ta a, Kaikuang chuan chhan ngaihna reng a hre ta lova,” ih ih ih ih….Meiah min rawh chuan ka sen vit vet ang a, tuiah min thlak chuan ka dang lip le pang”, a tit a reuh a. Mite chuan,” buaina siamtu a ni, meiah i rawh ang u”, an ti a. Meiah chuan an rawh ta a, Kaikuang sawi ang ngei chuan a sen ta vit vet a.. “Aaaa….! a sen vit vet mai, tuiah thlak ila engtinnge a awm teh reng en chhin ang u hmiang”, an ti a, tuiah chuan an thlak ta a. Kaikuang chu a dang ta lip lep a, chu velah kaikuang chuan,” Pi leh Pu te khua kan thleng zo ta, nuam singkhaw…biri birh birh birh” ,a ti a, a tlanbo ta daih a.

Chutia ka hming Chemtatrawta pawlah a awm tih kan chhiar chuan ka rilruin heng thil te hi a ngaihtuah nghal vang vang a. Pawl pathumah kan inthen a, Samdala, Chhurbura leh Chemtatrawta tiin. Phur tak leh kan Pawl hming chhuang tak chuan sport naah chuan ka kal ve ta a. A tir atang reng chuan kan pawl chu kan che tha nghal pap pap hle.  A tawpah pawh chuan KA champion pui ta hial nghe nghe ani. Chak ber pawlah telve e tilo chuan item chi thumah chiah ka tel ve a, chungte chu :-

KAWI INKAHSIAK: Sakeibaknei riltamin Sakhi pahrawl zet a um laia a tan tluk zetin ka tang a, theihtawp bakah 30 vel puk belhin vawi thum kawi chu ka kap a , ka thelh vek..!!
VOLLEY BALL : Hun chanve hnu lam ah ka lut ve a, Samdala pawlte kan tum nghe nghe, Ball kan ben chhung zawngin vawi 5 ball ka tawk ve, vawi hnih ka tisual. Thianpa Charlie leh Hmaa thlawk vel ka en a ni ber. Chiang takin kan chak thung.

FOOTBALL: Ka pian leh murna ngaihtuah chuan inkhel thiam ber tur te zinga mi ka nih ka hailo, mahse chutiang ngawt chu ani lo ania aw. Inkhelh chu ka huphurh ruk reuh em avang chuan kan tumpui te player mal mal chu kan en diat diat a, a fit loh hmel ber leh tlanchak loh hmel ber mai nia ka hriat Pu Zautea chu ka zuam ber a, ka chek ta nghal a. Ka rei..!!! Ka tisual chiang ngei mai, Sakawr awmtha duh lo ang main a lim ta puat puat rauh a, minute 15 a ral meuh chuan ka khua hmuh a fiah lo tan ta mai a. Ka thin zawn chu a na lutuk bawk a, mi thlaktu tur ka zawng ruai a, tumah an lo lut peih tawh awzawng mai bawk silo. Ka beidawng chuan Khelmual sira lo awm, nula Zamtei chu, “ min thlak hram rawh khai…!!! Ka thi tak ngial dawn…”, tiin ka ngen ta tawp mai a. Ani pawh chuan midang ang bawk chuan min lo hnar leh ta nghal a. Tichuan tihngaihna hre tawh bawk silo, chau tawh bawk si..ka hun tawp a thleng dawn ta ani maw..!! tiin ka inngaihtuah lungpuam a, aaaaaa….inkhelh avang thih ai chuan tiin, a rukin khelmual chu ka chhuahsan ta ani.



Tuesday, December 7, 2010

Bombay Mizo Christian Fellowship Hla

               Hmanah mihrang hmasate’n
               Phai khawpui tual Anpai zaleng zawngte lenna ram’an
               An lo rel e, Siamtu maicham rinawm
               A sakhming’an maw an lo chawi e BMCF tiin.

                                     Khuanu ruat rengin i mawi chuang e
                                     I chhung’an vanhnuai naufa zaleng zawng te
                                     Hlimzai kan vawr e pheilai khaiin
                                     Nghilh thei hian kan mawi silo.
        
              Thleibik lo te’n tual kan leng
              I chhung’an thianghlimna, dikna leh rinawmna
              Haider sen rual ani mawlh silo
              Kan theihna leh finna zawngte I tan kan rawn hlan e.


              A mi zaleng zawng te hian
              Lawina run dang belh kan zuam lo sirah kan hnawl
              Kan chawi zel dawn I sakhming mawi
              Keini Zofa zaleng thang leh tharte zingah hianin e.


              Bridge :
                                 Aw ka duhtak, mawite’n vul zel la
                                 Mahse I Siamtu nghilhlo te’n
                                 Vawng nung zel ang che kan dinchhan
                                 Krista leh Kohhran tan.