Ka nui ta seih a

Tukin zing ka tho chu ka chau deuh riau a, ka awm bawr te chu chum hrep ang mai hian a sil them thum a, ka hrawk te chu lungtum dawlh ang mai hian a hnawk tup bawk a. Thuthlengah ka thu then lauh lauh a, ka lung a leng em em a, ka mittui a rawn hnam fap fap a, dan zawh rualin lohvin ka mittui te chu ka vun chuar tawh tak, ka chhungte leh thenawm khawveng ten Tar vun an tih mai ah chuan a far kauh kauh a. Ka sam tuak var vo mai karah chuan thlanfim a dir zung zung bawk a. Vawiin hi Pathian khawngaihna avanga kum 80 ka tlin ni a ni. Engtiklai khan nge hetiang kum zah ka tlin hman hi ka hre bik lo. Ka ngaihtuahna te chu naupanlai rilru nen danglamna awm silo, amaherawh chu thahrui a lawi ka nei tawh lova, ka ding thei tawk chauh a ni si. Ka khaw hmuh a fiah tawh lova, chakna leh thatlai hun te chuan min thlahthlam ta, hmalam hunah beiseina ka nei ta lova, dam rei malsawmna tia kan Bible in min hrilh hi ka ngaihtuah nawn fo ta mai.

Ka piancham pha lawm tur chuan ka chhungkhat laina hnai te chu an rawn thleng khawm tap tap a. Ka fate hmelah chuan min lainatna leh hmangaihna ka hmu a, nakumah hetiang hun hi ka hmanpui leh thei angem tih chuan a mawlh hlawm niin ka hria. Ka tu duhawm tak tak te erawh chuan “aapu, aapu” tiin min lawm em em a, hlim takin lungkham nei lo tih hriat tak hian ka bul velah te chuan an rawn inbawrkhawm a. Ani, taksa chakna ka nei tawh lova, ka taksain natna a do theihna pawh a beitham ta hle, hritlang mai pawh nunna thap thak khawpa ka beih a ngai ta a, nakuma ka piancham han lawm leh chu thil beiseiawm tak a ni tawh lo hrim hrim a ni. Chutia ka tu leh fa te ka piancham lawma an rik hlut lai chuan kil khatah lunglen takin ka nunhlui te chhui letin ka lo inngaihtuah a, ka ngaihtuahnaah erawh chuan thil tam tak a rawn lut lem lo, tlem te chauh a ni.

Ka naupanlai ka han thlirkir a, nikhat thil thleng ang lekin ka ngaihtuah a, sikulah kan kal a, tlaiah thiante nen kan infiam ho leh a, chutiang hlir chu nimaiin ka hria. Amaherawh chu chhungte phal loh thil, card den ruk laite, meizial zuk ruk lai te leh sikul tlanbo lai vel te, lui a kal a tuichen ruk ang reng te chu a mal te te in, chiang takin ka ngaihtuah let thei thung a, ka lung an tilengin rilruah thianhlui te an rawn lang nghal a, khatia hlim tak leh hlauthawng tak chung sia panlai kan lo hmang te kha ngaihawm ka tiin vannei ka intilet ta zawk a.

Kan han rawlthar chhova, naupang thuawih tak niin sikul kal leh lehkhazir bak ngaihtuah ka nei ngai meuh lo. Han ngaihtuah let tur pawh ka lo nei awkawng lo mai, ka thatlai hun chu a liampuat mai hian ka hria a, chutihlai erawh chuan, retheih em avanga a tuk chaw eitur tak ngial pawh nei lova ka awm lai te, mittui tla zawih zawih a Pathian hnena eitur min pe tur a ka dil lai te erawh chiang takin ka mitthla thei a, khatih laia ka rinna nghehzia te chhuikirin tuna ka dinhmun te ka sit phah lek lek a ni. College kan kai tirh a, thiante chhan nan thih huam a vai ho ka lo sualpui ve zak zak laite chu nimin lawk a thil thleng ni maiin ka hria.

Ka thiantha leh chhungkhat te nia ka lo ngaih thin ten, itsikna avanga phuah chawp leh thutak phena dawt mawihnai tak hmanga min sawichhiatlai te chu ka ngaihtuah let a, “Aw, kan damchhung ni te hi a rei loh teh vei nen, engah chuan inngeih tlang taka kan awm mai mai thin loh ni..!!” tiin ka ngaihtuah vang vang bawk a.

Ka thingpui inlai chu ka lem leh khalh a, ka mit chu ka han khap leh hram a, chutih rual chuan ka nupui ka hmangaih em em mai, kum 50 lai mai ka lo chenpui tawh chu ka mitthlaah a rawn lang a, kum 50 lai nimahse a reilo ka ti hle mai, zan kan mu a, zing kan tho leh ang lek mai niin ka hria. Hlimtak leh hmalam hun thlira fate kan buaipui lai te chu nikhat lek ang mai niin ka hria a. Chutih rualin kan inngaihzawn tantirh lai, chhungte phallo chunga kan inhmuh ruk lai te, inthlahleh taka inneih hun tur kan thlir dun lai te, hmelma leng vel nuaih nuaih kara inhmangaih taka rinawmna hrui vuan dun a harsatna leh hlimna kan paltlang lai chu chiang tak maiin ka mitthlain ka hmu bawk a, ka ngaihtuahna a kal ding bawk aniang, ka lungphu chu a rang ta sawt hian ka hre nghe nghe a ni.

Ka rilruah thildang daih, he thu lar tak mai hi a rawn lut a,“A life spent making mistakes is not only more honorable, but more useful than a life spent doing nothing” tih hi, a dik viau pawhin ka hria. Ka nun pumpui ka han thlir let a, nun pangai leh nitin nunphung ka lo zawh thin te chuan lungawina min pe lova, mi tih bak piah lam ka lo tih ve te, huaisen taka ka tana that zawkna a nih beisei a dan pel thak a risk ka lo lak ve naah te khan inchhirna ka nei hauh lo mai. Inchhir chu sawi loh mi tilunglengtu leh chiang taka ka ngaihtuah let theih te an ni zawk tlat si a ni. Chhungte phalloh kan lo tihruk ve te chu min tihlimtu leh ka thinlung ruak hnawhkhattu an lo ni ve zel bawk nen. Mihausa fa ni ila, nunphung pangai tak zawhin, harsatna leh lungaihna te tawk mang ngailo ni ta ila, ka nunah hian ngaihtuah let tur leh hriatreng tur ka nei kher a ngem tiin ka inzawt let a, a hunlai a hrehawm mittui tla zawih zawih a kan lo tuar ve te kha lung min lentu ber an chang ta hi a mak ka ti letling zawk hle a ni.

Ka thingpui inlai harsa titaka lem leh khalh pah chuan ka mit chu ka han chhing diar diar a, han men leh mai ka tum chu ka mit chu a inchar ta tlat mai..!! kum 7 lai liam hnua min boralsan ta ka nupui, ka hmangaih leh ngaih em em chuan ral khat atang hian min rawn ko tlat hian ka hria a, “Leia I thawhrimna te chawlhsan la, tlansa te zingah hian rawn tel ve tawh ta che” tih ri chu ka beng nilo ka hriatna chuan chiang takin a ngaithla a. Chuveleh hlimna sawisen loh chuan ka taksa leh thlarau chu luah lum nghalin, hlimna leh lawmna nasa lutukin min chenhilh avanga nui seih pah chuan min kotu aw lam chu ka pan ta a ni.

Ka thingpuino kenlai chu a tla keh darh chuaih a, ka fanu duat em em maiin mangang, thlaphang leh aw ring taka, “ U Mama, lo tlan thuai teh, ka Pa awmdan hi a dik lo a nia” a tih chu he leia ka thu hriat hnuhnung ber a ni ta a ni.

This is My First Love Letter

Hman deuh kha chuan Computer, Digital Technoloy vel hian tunlai ang hian min chiahpiah ang tih rin ngaihna a awm lo a nih kha. Kha tih lai kha chuan bialnu/bialpa te nen inbiakpawh nan lehkhathawn te kha a lar hle thin tak a. Tam tak chuan khang lehkhathawn te kha thil hlui mai tur a nih tih hre hek lo, kan lo paih bo mai mai a lo ni a. Tun hnu a ka’n ngaihtuah let hian lo dah that ve mai mai tur hi a nia ka ti nuap nuap thin. Mahse hei, ka vanneih a siamin ka Love Letter dawn hmasak ber mai ka lo dahtha hlauh mai a, ka han chhiar nawn leh pawh hian a thu kal dan vel hi nalh ka la titawp thei lo. Naupang viau e ti lo chuan ka thiannu kha thu leh hla lamah a lo ril ve khawp chuan ka hria. Lungleng em em vang pawh nilovin a thu hi a mawiin a ril ka ti em a, ka’n thailang ve mai mai ang e. A ziaktunu in a lo chhiar hlauh anih pawhin a nui liam ve mai mai tawh em ang chu maw..

He lehkhathawn ka dahthat bikna chhan thunawi tlem nen (amah pawhin a hre lo..hihihi)

Sikul ka thleng chu a thiannu in ka lehkhatawn tur chu min lo pe vat a, chhiar nghal chak viau mah ila sikul devotion tan a hun tawh si a, ka ipte-ah chuan ka hnawh lut tawp a, ipte chu thutthlengah hnutchhiahin devotion hall lam chu ka pan ta nghal a. Devotion chu dan pangai ang bawk in kan nei leh a, tichuan phur takin class room lam chu ka pan phei ta thuai a. Hetih hunlai hian sikul naupang zingah meizial zukruk leh khaini hmuamruk a lar hle a, hemi ni pawh hian devotion a kan awm hlanin kan hotuten “Surprise Inspection” an lo nei chu niin, kan ipte zawng zawng chu an lo dapchhuak vek a, ka ipte a lehkhathawn hlu tak mai ka dah pawh chu an lo la tel ta daih mai..!! Ka thutna ka thleng chuan lehkhathawn chu ka zawng nghal a, ka hmu ta miah lo mai a, zirtirtuten an la anih dawn hi tiin rilru buai takin ka awm a, chutihlai tak chuan kawngkhar atangin Chowkider chuan,”Beethungs, Office-ah an hmu duh che,” a rawn ti zui bawk a. Hlauthawng leh thinphu dut dut chuan Office chu ka va lut ta a ni.

Office-ah chuan kan zirtirtute chu an lo thu bial laih a, “Hei exam te a hnai tawh dawn a, engatinge bialnu te i lo neih re re, lehkhazir chauh ngaih pawimawh tur a ni asin. Tun atanga bialnu i neih te chuan i zirna in a tlakchhiat phah nasa dawn a nia. Kan sikul innghahna i ni a, thil dangin i zirna a tihbuai hi kan remti lo a nia”, tiin kan zirtirtu pakhat chuan min zilh nghal bawrh bawrh a. Ka ngawi reng a, chhan dan tur pawh ka thiam mai lo, sawi tur pawh ka hre chuang lo. Zirtirtu dang pakhat chuan, “ A hrim hrimin tunge M -i hi, khawi venga mi nge ni a” ? tiin min zawt a, a rul tawk chuan ka chhang a, ka zak em em a, ka taksa hi a lum chhuak vek a, ka thin a phu dut dut bawk a, hetihlai a sual ka intihzia kha aw..!! A tawpah chuan ka lehkhathawn chu an rawn phawrh chhuak a, “Kha, tun tum chu kan pe let leh che a nga, a dawt leh chu a awm tawh tur a ni lovang, i zirna chauh i ngaih pawimawh hi kan duh ber a nia, thildang tibuai tu tur che a awm kan remti lo a ni”, tiin min thlah ta a.

Class room-ah chuan ka phei hnak hnak a, ka lehkhathawn chu ka hum ran a, kan zirlai te chu engmah ka ngaihtuah thei lo, chhiar hlan mawlh chu ka nghakhlel a. Chawlhlawk awm hmasa berah chuan ka chhiar ta nghal a, ka zahna leh rilru hahna zawng zawng te chu kiam sawng sawng in, chhiar nawn leh mawlh chu ka chak a, sikul chu kan bang ta ngei a, ka tlan haw thuai a, khumah mu chungin, duhthaw takin he ka lehkhathawn dawn hmasak ber hi ka chhiar nawn leh ta a….

Ngaih em em Beethugs,

A sakhmel ka tawn tirh atanga ka hmangaih leh a zun ka uai, he khawvel a ka hmangaih leh duh ber chuan ka beisei ngam loh leh phu loh, ka tana hlu ber mai a hmangaihna min hlan let ta si. Ka tan a va han hlu tak em..! Ka phatsan leh tawh lovang.

Ole, Apple chu a kungah awm tawh lo mahsela apple a nihna a hlauh ngai chuang lo ang hian nitin zantin i bulah awmin, in hmu thei lo mah ila, ka tan i duhawmna leh ngaihawmna a bo chuang silo. Hebron phairuam a tui luang ri kerh kerh leh thlifim tleh ri her her chuan I nui seih leh hlim aw hi a iang thin a. Dan zawh famkim theih loh avanga van hmangaihna hnawl a awm hnu hian ka hmangaihna chu a let tam takin ka hlan let mawlh mawlh a che. Ka duhtak, nikhat lek hmu thei lo che a ka awm pawh hian ka tan chuan kum sang tam ang a ni sia, runhmunah lengdunin awm lo mah ila, thamrallo mitthla chuan ka chet velna lam apiangah min thlamuanin hlimna veng veng min pe tel ve tlat si a ni. Eden huan bawhchhiatna chuan Khuanu thikthu chhiatzia a lantir thin a, min Siamtu meuh pawh a hmangaih lakah chuan a thikthu a chhia a nih hi maw..! I duh anga ka awm loh emaw, thikthu chhia anga ka lan chang chuan min hrilh hreh suh la, Siamtuin nunna min pek rual khan dan zawh rual lohin he thikthu chhiatna hian min zawm tlat si vang a ni e. Ka hmangaih che a, hun lo her zel tur hian ka hmangaihna che hi herpui zelin, hun a her a, kum a tam ang zelin kan inhmangaihna pawh hi lo tamin lo pung mawlh mawlh ngei rawh se. Zing Nichhuak chuan ka hmangaihna chibai buk thin che sela, tlai ni tla tur chuan ka hmangaihna che hi nilengin a rinawmzia tilang ngei bawk rawh se, zan thla eng chuan i kianga awm ka thlakhlelh zia a tlangaupui si a.

Thlifim in vaivut leh hnahthel a chhem leng vel chem chem thin ang hian Hmangaihna chuan min chhem a, dan zawh rual lohin min chhemna lam apiangah chuan ka leng vel a nih hi, I hun hlu tak ka hmang ral tih pawh ngaihtuah hleithei lovin chu hmangaihnaah chuan bual at in ka lo awm leh tawh a nih hi le. Ole, kham lo tak chungin, a chhiartu mitmeng mawi tak te kha a lo kham palh hlauh ange, ka ziak hnem tawh si a….tawk rih phawt se….

I tan chauh

M-i