7th MOTHER TERESA MEMORIAL AWARD KA CHHIM VE

Pu Dr. Sangthankima, TNT Founder in Mother Teresa Memorial Award for Social Justice a dawng dawn tih ka hriat chuan ka lawmpui hle mai. Amah Pu Sangthankima hi atakah ka la hmu lem lo na a, ka lo ralkhat ngaihsan ve thei em em a, a taka hmuhna hun remchang ka nei dawnah ka ngai a, chubakah Award ropui tak a la dawng dawn leh nghal a, ka rilru pawh a lo hlim ve veng veng mai. 08.11.2014 ( Saturday) zan chuan Mumbai Airport-ah kan hotute Tv Kima leh Pu Ramthanga hovin kan va hmuak a, a palian viau na a a tawng tam lem lo viau mai. Amah bakah hian  a fapa Sangzuala leh an Secretary Hmangaihzuala ten an rawn tawiawm bawk a, Airport bul lawk Avion Hotel thleng chuan kan va thlah a, a tuka Award Function a inhmu leh tur chuan kan inmangtha ta hrih a.

09.11.2014 (Sunday) tlai lam chuan hmanhmawh takin ka inkhalh chhuak ve a, ka la tlai hret aniang, Nl Dinpuii, Nl Apuii leh Pu Zaia te ho phone call ka dawng nasa mawlh mawlh e mai, an luhna tur Entry Pass ka kawl vek miau a. Tlai lam dar 6:30 vel chuan Sahara Star, Andheri ah function chu kan tan fel ta a. Amah Pu Sangthankima bakah hian India ram hmun hrang hrang atangin mi 9 te chuan he Award hi an la ve bawk a, an thil tawn leh thil tih te han hmuh chuan rilru a khawih thei kher mai. Keini lam pawh Mumbai Mizoram House Deputy Resident Commissioner Pu V Zaithanmawia'n min hova, TBZ Mission Field lam atangin Nl Apuii leh Nl Rinsiami te, Mumbai thalai atangin Nl Dinpuii, Nl Saizikpuii, Nl Chhanhimi te nen Mumbai Mizo ai kan awh ve a ni. Tin, Noth East Helpline Mumbai hotupa Pu Ramthanga'an min rawn vil reng bawk. Zaipawl a zawnga mawi ber mai leh thiam ber mai India's Got Talent 2010 Winner, US President Barack Obama te nupa tan pawha lo zai tawh thin Shillong Chamber Choir-in min awi deuh reng bawk a, boruak a nuam ka lo ti ve em em ringawt.

SHILLONG CHAMBER CHOIR

MIZO THENKHAT TE NEN

Tih tur ang ang te an han tichho zel a, Host pawh a zeiin min tihhlim dan a thiam khawp mai. Pu Sangthankima pawh a hun a lo thleng ve ta, a hming an puang a, TNT chanchin tlangpui thu mai ni lo video nen kan en thap, midang te rilru pawh a hneh ve hle chuan ka hria. Award a dawn pah hian thu tawi fel leh ngaituahna tithui thei tak a sawi zuaih a, hetiangin, " Vawiin hian he chawimawina hi dawng tlak ka ni lova, keima'n engmah ka ti lo, Pathianin ti tura min tih ka ti mai zawk a ni. Chhuan tur ka nei lova, Pathian ropuina zawk a ni. Thu sawi mi ka ni lova, a thawk a thawk, a tih tiha ti thin mi ka ni, Pathian in malsawm vek che u rawh se", tiin. Pu Sangthankima hi a taksa a chak lo hle mai a, a tuka Hospitala in entir tur an ni nghe nghe. Boruak tinuam em em tu dang leh chu milar tak tak, ka lo ngaihsan em em thin te an tlim hmur mai kha a ni, heng Medha Patkar, Mahesh Bhat, Prakash Amte, Poonam Mahajan, JC Jamir (Ex Governor Maharashtra), Tushar Gandhi etc. Tin, ei tur an sem reng a, WIFI a chak hle bawk a, host in  program Internet a update turin min ti reng bawk a online a nuam duh hle mai.

Hei hi chu amah a ni lo..lo lakpui ve satliah a ni

Pu Sangthankima Award a dawng lai

He Mother Teresa Memorial Award for Social Justice hi kum 2004-2005 chho atang khan The Harmony Foundation India te hian an lo huai hawt chho tan a, Khawtlang siam that leh midang te tanpuina kawnga thawh hlawk te hnenah an lo hlan thin a, chung zingah chuan Sushmita Sen, Anna Hazare, Dalai Lama, Malala Yousafzai etc te pawh an lo tel tawh a. Harmony Foundation hotupa Mr. Abraham Mathai hi Northeast Helpline Mumbai kan Patron member a ni nghe nghe. Tun tum Mother Teresa International Award dawngtu hi Ms. Anuradha Koirala a ni a, ani hi Human Trafficking leh Prostitution nasa takin a dotu, mi sang engemaw zat lo chhanchhuak tawh thintu a ni.  A hnathawh ropui avanga CNN Heroes Award 2010 hial pawh lo dawng tawh a ni bawk.

Anuradha Koirala

                       

                              

A kal te mi chal lang leh puitling tak tak an ni a, program pawh a fel fai hle mai, chaw tui tak kan ei bawk a. Anuradha Koirala hi amah Pu Zaia hian a lo ngaisang fal bik viau ni tur a ni, a chep a chepah Nl Apuii thla a laktir a, Odisha Governor leh Ex Maharashtra Governor JC Jamir a kalna tur takah a hmetu tur hi a ding bawk si a, Governor leh a bodyguard te chuan an thla la chu an nghak ve mai bawk a tih te hi kan tarlang tel mai mai teh ang.

JC Jamir tibuaitu Pic chu  :)

Washroom a ka kal tur chu vanneihthlak deuhin Mahesh Bhat chuan min lo hmu fuh hlauh mai a, thla la ve re re ila a tih tlat avangin ka'n  lakpui ve zuaih bawk a.  :)

SELFIE ZUAIH

Mahesh Bhat nen

                            

DINNER ROPUI

DAMDAWI IN KA LUT!

Taksa ruangam leh pianphung han en hrim hrim pawhin Damdawi In lut khawpa han damlo mai tur chuan ka inring bik lo hle. Chutiang bawk chu thian hnaivai thenkhat ngaihdan pawh a ni reng a ni. Khawsik ser serin ni 5 vel zet min bawm hnu chuan ka taksa chakna pawh a lo tlem ve ta a ni ange, chu natna hrik chuan duhtawkin ka taksa an ching pharh chho ta tak tak mai a!  A men hian kan meng khu rum rum lo chauh ni berin ka hria.

Mahni tawka hrisel tha ni a inngai, damdawi in la lut ngai lo leh insawiselna satliah pawh nei ngai mang lovin ram dang daih leh awze kar leh nghala damdawi in luh an ngai mai chu thla a phang duhin pangchang a awl duh viau mai a, tuar pawh a chhel hlei thei meuh lo. Chuta karah mahni tawka inenkawl thei ve ni a inhriain midang te puihna mamawh leh tibuai zawnga awm a lo ngai bawk nen, rilru a hrehawmin inthlahrun a na duh kher mai. Khawsik sang, luak leh lu na ten ni hnih teh meuh mai nikhua pawh hre mumal thei lova min hmeh hnu chuan 09th July 2014 zing lam dar 7 velah ka awmna atanga hnai ber Damdawi In – Karuna Hospital ( Catholic Hospital a ni )ah chuan ka invawm lut ve ta rawih a ni.

Thisen exam ngai ang te, X Ray leh test chi kim chuan min buaipui chho nghal a, vanneihthlak nge vanduaithlak pawh hriathiam har khawpin eng natna mah ka taksaah hmuh a ni lo. Vawi engemaw zah an tih hnu pawha damlohna bik fak han hmuh chhuah tur a awm tak silovah chuan “ Viral Fever “ a ni e tiin ka Doctor chuan min hrilh a. Ka thla erawh a muang deuh huai chuan ka hria, chutih rual erawh chuan damna damdawi ei tur a awm lova, natna rawn chhuah changa tuar tlawk tlawk chu tihtheih awm chhun a ni tih erawh ka hrethiam tho mai. Damdawi In ka luh atanga ni thum chhung vel chu ka mang hriat ruai ringawt a, mu leh mal ka nei meuh lo, ka rilruah Argentina bak a lang vak lo a niang, “Messi” ni a inngaih tlatna te pawh ka nei hman zu nia! Zing dar 3 velah World Cup Final khel tura insiam te pawh ka tum hman hial a ni awm e.

Irhfiak (Hiccup) a va hrehawm em! 

A ni hnihna atang chuan Irhfiak reh hlei thei lovin min rawn tibuai leh ta a. A tirah chuan darkar khat vel chhumlo chat lovin ka’n Irfiak phawt a, darkar li vel hnuah a ngai te bawkin a rawn tan tha leh thin a, taksa chauh tawh lamah chuan a hrehawm hle mai. A bikin tukhum thazam vel chu a rawn pawh thin avangin lu hi a darh dawn a maw tih hial khawpin zu hrehawm thei a!  Chutianga irhfiak reh thei lova ni 3 vel ka awm hnu chuan darkar khat mai nilo darkar thum lai mai kan inrfiak chho ta a, keimah mai nilo, damdawi ina ka awmpui te zawng zawng nen chuan kan mangan hman a, theih tawp min chhuahpui a, an chhung te hmun hran hran a mi Irhfiak damdawi zawtin an buai chung mai. Kei pawh ka mangang tak zet ta, kan thiannu pakhat, Aizawl lama awm, damdawi lam hre deuh tura ka ngaih, ama tawkah pawh luck ve pangai tak, pasal erawh la nei bik lo Nl. Zosangi  (Kuri) chu Mizo damdawi emaw a dang pawh a tihreh dan a hriat leh hriat loh ka han zawt rawih a, tihian min chhang a –

“ Kan thianpa pakhat pawh ni 1/2 continuous in a irhfiak thin a, chu chu Domperidone in an chiu a, mahse a reh chuang lo. A bak chu ka hre bik lova, In Rulpuiludin chhin mai rawh” tiin. Han dampui phah hluai nan chuan a beitham ve deuh chuan ka hria. Chutihlai chuan ka bula awmve vai damlo pakhat chuan thingtlang lama a chhungte lova be rawn in, Irhfiak a tan chuan Purun Sen (Onion) den sawm tui hi Hnar (Nose) ah thlawr tur tiin a rawn hrilh a, chutianga hnara purun sen tui thlawr tur kan buaipui vel lai tak chuan thawklehkhatah Tukverh atangin Engin min rawn chhun vang pawh ni chuang lovin ka irhfiak chu a reh ta hmak mai a, tun thleng hian ka irhfiak leh ta hrih lo, chunglam thiltihtheihnaah ka ngai hmiah mai. He Vaipa damdawi pawh hi ka hmang hman ta lo, hetiang buaina nei in awm chuan in lo hmang chhin dawn nia.

World Cup Final ka en thei ta lo : 

2014 World Cup tluka Final enchak hi ka la neilo hial awm e, hemi atana inbuatsaih nan pawh hian nasa takin ka lo inkhel ve hial a, Messi ni a inhriat rei ruai hnuah pawh Doctor te chuan an phal tlat lo mai. Darkar hnih lek chhuah lailawk dilna chu min hnawlsak a, zanreh a TV en an phal bawk silo, thahnemngai taka thianpa Kima meuhin min dilpuina pawh an hnawl hnu chuan ka beisei lui tlat ta bik lova. (A dil tak tak nge Nurse ho a lo va CK pui leh mai mai phei chu ka hre bik lo). World Cup lehah engtinnge ka awm ang aw tih ngaihtuah mai mai chungin chu zan chu ka hmang liam ta a ni. 

Ka chhuak ta e :

Chawlhni zan World Cup ka en theih loh vang nge mawni, a tuk thawhtan ni (14th July 2014) atang chuan khawsik pawh chuan min kiansan chho tan ta a, chaw te pawh ka ei tan thei bawk a, ka taksa pawh chuan chak lam a lo pan chho ta zel a, tichuan, ni 7 lai mai damdawi ina ka awm hnu chuan Thawhleh ni ( 15th July 2014 ) khan chu damlohna khum leh damdawi in chu ka lo chhuahsan thei a  ni. 

Ka damloh chhungin hian thil tam tak ka ngaihtuahnaah a lo lut a, dam hlutzia mawlh mai chuan ka rilru a la luah hneh hle. Tin, thi mai tura ka han inngaihtuah chhin te chuan Thih han hlauhna em em zuk nei miah lova. Ka taksa hrisel vur anga lang, chhungrila bawrhsawmna lo intan, ka BP sang lutuk te, ka rit lutuk leh thau ta lutuk te chu vawilehkhatah alo pangai leh ta a, Pathian malsawmna tih loh theih loh niin ka hre ve a  ni.

Lawmthu:

Han damloh meuh chuan midang kan tibuai nasa em em mai a, ka inthlahrung viau mai. Buai tak chunga min riahpuitute, a hmun ngeia min kan a, khawchhe tak karah in hun hlu leh sum tam tak senga min rawn tlawhtute chungah lawmthu ka sawi mawlh mawlh a, Pathianin a let tam tak a malsawm ngei che u ka beisei tlat a ni. A mimal, kohhran leh chhungkua anga min tawngtaipuitute zawng zawng hnenah lawmthu ka sawi a, tawngtaina thiltihtheihzia nangmahni kaltlangin ka chungah a thleng a ni. Min ngaihtuah em em leh duhsaktute, chanchin min rawn zawt a min rawn vil reng te, a hmuna rawn kal remchang ta lo zawng zawngte chungah ka lawmna a tlem bik chuang lo, lawmthu sawi sen loh ka sawi a, Pathianin in awmna hmun theuhah vengin awmpui zel che u rawh se.

Miscellaneous :-

“ A thi hul tur chu a la na hle mai a, lo dam vat vat rawh se”  - Nl Lovely

“ Sa hel kha pet tlem deuh se a dam mai ang “  - Tv Chhoka

“ Old Monk I duh em ” ?  - Tv Senior Kima

Whatsapp Group hming pakhat chu hetianga thlak a ni : “ Zu Seh Bee-a ” – Update-tu Fela Kawlni 

“ FIFA laiin zu I in uar deuh anih chu “ – Nl Kawlni

“ Min ngai lutuk I zo lo a nih kha “ – Nl Mimi (Foreign atangin )

“ Food Poisoning a nih ka ring “ (Hmusit deuhin ) – Tv Mawimawia

“ A Nupui  neih ngen mai mai a niang “  - Tv Fela 

# Greenwood Hospital lama min kan tum an awm em ni ??

# Committee Kohna pawh pakhat chu Damdawi Inah ka dawng hram e.

# Siam chhetu :- Tv Kima

.

MONEITU THIANPA

“A hminga kan intawh khawm hunin

 Kan chatuan hmunah min tir ang a

 Lawm takin Pa in kan thleng ang a

 Kan chatuan malsawmna ramah chuan

 Nakinah, lawm takin,

 Luipui kam mawi takah kan tawk ang....”

Dt.12.01.2014 : “Vawiin chu he hla hi ka rilruah a awm reng mai, enge maw chutia ka lunglen veng veng chu le! Khandala-a retreat kan neih kha ni ngei ang. Nizan inkhawmah mai pawh khan he hla hi ka thlang tawh nghe nghe si a, " tiin ka ngaihtuah neuh neuh a. 12.01.2014 inkhawm tluang takin kan nei a, kan speaker pawhin thu a sawi tha kher mai. Inkhawm banah committee turin ka lut leh a, rilruah ngaihthatlohna pawh ka nei chuang lo. Dar 5:30pm vel a ni ta, SMS ka dawng a, ka nu hnen atangin a ni a, " Rama kan be tlang thei lo che a, Danny-a a thi ania" tih zawng mai te hi. Ka awih lova, ka awih phal hek lo, 10mins chhung vel chu engtinmah ka awm lo, kan committee pawh a kal ngaiin a kal zel a. Thianpa Sangtea'n a hnuah kan committee lai vek chuan ka hre lo emaw tiin min rawn hrilh nawn leh a, chutah chiah chuan ka chi-ai tan ta a ni. Ka danglam vek mai a, awm ngaihna reng ka hre lo, a tak tak ni lo hram se ka va han ti tak em..!! Committee neih lai chuan ka tlan chhuak nghal a, ka rilru duhthusam te a thlen theih nan ka chhungte chu ka be nghal a, chanchin an hriat ang te min hrilh nghal bawrh bawrh a, ka duhthusam te chu boruakah thamral nghalin, mittui leh lungchhiatnain min rawn tuam nghal a, keimah chuan keimah vek chu " I unaupa i chan ta" tiin min rawn hrilh ta a ni.

Mahni tawka inlak pa ve tehreng mai, thiante hmel hmai pawh zah thei lovin mittui a dir zung zung mai bawk si a, ka thiante hrilhai lutuk kha ka khawngaih letling zawk. Rilru a buai a, enge ka tih ang tiin ka hamhaih a, ngaihtuahna mumal nei hlei thei lovin ka awm a, mahni a awm ka hreh em em a, Biak In atanga in a haw kha thih hrehin ka hreh a, thian hnaivai thenkhat ten buai chung leh hman lo tak chunga an tawngkam mawi, “kan rawn leng ang aw” an tih pawh ka hnar phal ta meuh lo a ni. Tichuan rilru ka siam fel a, Dana (a hming pawha kan koh phal loh) nen kan inthlahna, moneitu thianpa a tanga inhmu leh tura kan intiamna chu boruakah a thamral ta si a, Ropuina Pathian chuan Krista mo ni turin min lo seng luh khalh ta a ni tih ka hriat pawhin lungawi har chu ka ti tho mai, a tawp nan Dana, mihring ten nunrawng taka hming an phuahsak “ Ruang ” chu ka thei emaw thei lo emaw hmuh hman ve ngei tumin haw-na tur ticket te chu ka la ta ve a ni.  

Naupang te kan nih lai atanga inzui, pianpui unau ang chiah a awm hova khawsa thin, inkawma inhau a, in vel a, nui hova leng za thin. Kawng engkima ka thachhang dawltu, Serthlum kan lawh ruk pawha kawnga mi an lo kal leh kal loh lo vengtu, Mi in a “Tv” kan en pawha inthlahrung tak chunga lut hmasa thin. Ramah buk kan sak pawh a hrehawm laia awm thin, kan inbai lem chhuannaah pawh mei chhawm nunga chhem alh thintu. Veng chung leh Veng hnuai kan indo pawha min veng tlat thintu, nula ka rim ve pawha theih tawpa min sawi mawi thin, Mizoram ka haw ve chang pawha ka bula awm chawt thin, a chhia leh a tha engkima ka rin ngam, engkim ka hrilh ngamna awm chhun, ka nun hi sawi dawn ila a khawi lai kilah pawh hian i awm vek si a, heti te chuan tunge ka thuruk te ka hrilh ang a, tunge ka harsatna midang ka hrilh ngam loh te ka hrilh tak ang le! I thih hma kar khatna chiah, chawlhni hnuhnung berah ka haw tur min thlah a, Sairang Road ah car khalh min zirtir thla a, hlim takin kan nui thla a, kan inthlah dawnah inkuah meuhin, “March thlaah chuan aw hlim takin kan inhmu leh dawn a nia, moneitu thianpa tur i nih kha” tiin kan inthlah kha a ni si a. A chawlhni leh a lo thlen chuan he khawvela inhmu leh ngai reng reng tawh lovin, chu thihna vawt chuan a lo man che a, I thlan leh ruang an cheibawl chu hmu turin ka rawn let leh si a maw..!! Ka haw dawn tep a “Thla la dun ang, kan la dun khat tawh e mai” i tih tlat te khan a tawpna tur a ni tih reng ka hre bik silo.

Kum tam tak inhmu mumal lovin kan awm tawh a, nidang ang lo tak leh min ngai em em niawm takin haw turin min rawn chah chung a, thlawhna ticket a awm lova, silchar atang rawn haw a ngai ka tih pawh in, Silcharah min lam turin i lo kal vang vang a, min rawn lamna kawng ngaiah chiah khan nangmah thlah tur che in, nangmah tel tawh lovin ka lo haw leh asin…lawmtu ka nei lova, hmuaktu ka nei tawh hek lo, ka nun a kim lova, mittui tla tur reng pawh ka nei tawh lo. Vairam pana ka let leh dawn a “February thla thleng cham hram rawh aw” min tih lawm lawm lai te khan heng hi a thleng dawn tih ka hre bik re re silova, hria ni ila kum tam ka cham awm asin le. Moneitu thianpa tur atana i ruat hian i thutiam i hlen loh avangin Hringnun mawina leh hlutna, thiamna leh ropuina te hi ka ngaihnep phah a, nun hian awmzia reng a nei lo tiin keimah leh keimah ka inhrilh a, mu leh mal awm lovin ka let ka let mai thin anih hi. I kalsan tak i chhungte leh i thian te, I nupui hual te hian kan va la thlahlel tehlul che em. Chu Pialral ram mawiah chuan hlim takin min lo hmuak ula, ka Pa duhtak kha min lo biak mawlh mawlh bawk dawn nia aw.

A tawp nan, thianpa Sangtea’n Reiek tlang kan kal behchhana nangmah uina thu tawi te a ziah, vawiinni thlenga ka mittui la titla fotu hian i thihcham thla khatna hi ka’n thlah ang che...

“Danny-boy, min va han thrawng teh thut ve maw le...hemi ni te hi chuan i car-ah khan thlamuang leh hlim takin i mi phurhte an chuang a, him takin an tum ramah i thlen vek a nih kha! I khalhthiamzia sawiin an fak chhunzawm mawlh2 che asin! Motor rui lo ngai lote pawh i khalhah chuan rui miah loin nuam ti em2 in an chuang a ni si a. Kan thianho tan hian i hlu zual asin hemin ni ngat phei hi chuan. I inngaihtlawmna te, mite tana i inpekna te kha a ropui ka ti takzet a ni.

Reieka kan kalho ni khan short-cut-ah kalin tlang chhip i lo han thleng hmasa a nih kha, keini a hnunga lo kalte kha hlim takin min lo thlir a nih kha. Hei tunah pawh Lalpa Tlangthianghlimah min lo kal khalh leh ta zel a, hlim taka hahchawl chungin min lo thlir leh hlawm ngei ang maw?! Thlamuang takin lo chawl la, nakinah chu tlang mawi kan rawn thlen ve hunah chuan hlim takin chatuan atan kan la inhmukhawm leh rial2 dawn nia aw....Mangtha phawt mai le.”

KA HAW VE TA.....

A kum anga chhiar chuan kum sawmna a lo ni ve ta der mai, Krismas hlim leh thlamuang taka Zawlkhawpui ngeiah, chhungte leh thiante nena ka hman hnuhnun ber tum kha. Khami tum khan Urlawk zan hman chhuah ve ngei ka tum ruh hle mai a, In ka chhuahsan chiah tihin ka Putea boral thuin min rawn nang ching a, tum loh leh beisei loh deuh maiin, khawtlang tibuai em em in hun ka hmang ta zawk anih kha.

Khang hun te kha ka han ngaihtuah let a, thangkhat lian teh meuh mai mahni In lumah pawh Masi hmang thei lova awm hnuah hunpui ka han hmang leh thei tur chu ka phurin ka hlim ru ve viau a ni. Tluang takin ka kal dawn emaw tihlaiin kan thlawhna a thlawh chhuah theih leh dawn loh thu ka han hre chawpchilh leh a, ticket lak tur awm mai tawh bawk silo nen rilru in ar bo a zawng rum rum ta mai. Chhungte ka han be rawn a, haw ve ngei tura nawrna a nasa ang reng sia, nei leh nei lovin Mumbai – Kolkata – Guwahati – Silchar – Kolasib – Aizawl kaltlang vekin kan haw teh reng anih kha..!! chauh a na duh ngei mai J 22^nd December a thlen hman inbeisei kha 24^th December-ah ka thleng ta hram a ni.

Aizawl khawpui pawh a lo thar ta ut mai, thil tam tak inthlak karah ka rilru luah em em tu pali chauh ka'n zep ve lawk teh ang, thil tul tak phei chu a ni lem lo na a.

1)     Zu kan lawm hle :- Mi nawlpuiin zu kan lawmin kan ngai pawimawh hle mai. Zu in ten an heh em em a, an hmuh theih apiang an in tih mai tur a ni, chutihlaiin Zu in lo te pawhin an haw em em a, a do em em deuh vek bawk mai, duty te insiamin zu rui leh zu zuar an vai a ni ber e. Mizo mipui te hian zu hi kan atchilhin kan ngaisang ni berin ka hria, heti em em hian dah pawimawh lo ta ila chuan kan hun leh tha tam tak kan seng thlawn hauh lovang le.

2)     Incheina : Thalai te mai nilo, nu leh pa thlengin inchei kan uar hle. Kan thawhchhuah mila inchei kan thiam lo hle niin alang. Kawng leh lamah chuan kan nalhpui viau pawh a ni thei, mahse hei hi a dik berin a lang lo tlat, thawhchhuah neilo chu sawi loh, nu leh pa thawhchhuah pawhin a daih dawn lo tih hriat reng reng a nalh leh mawi a inchei kan zak tlat lo mai. Hnam dang thian ten min rawn hmu riau riau ang tih te pawh a hlauhawm dawn a lawm le.

3)  Charity/Tanpuina : Mi chanchhia leh neilo zawk te hnena tanpuina emaw thil thlawn pek emaw kan uar khawp mai. Mimal/Chhungkua emaw Fahrah enkawlna hmunah te sum fai leh thil pek hrang hrang te hmangin, Krismas rualawt bik lutuk a an hman loh nan tanpuina kan hlan kual nasa hle a. Pathian Engkimtitheia hian thil pek hrang hrang petu pawh nasa takin malsawmna a vur let ngei ka beisei. Amaherawh chu ngun leh zualin ngaihtuah ta ila, hei hi thil dik ber a ni angem le?

Heng thil thlawn pek avang hian tam tak kan tipangchang zo ni berin alang, a neilo zawk te thinlungah rualawhna nasa zawk a siam chawp a, thilpek dawn beiseina te, chantawk a lungawilohna te pawh a siam thei dawnin ka hria. Heng ai chuan Krismas awm chhan leh tum ber hi inzirtir nasa zawk ila, thuamhnaw thar leh thil thar dang neih kher hi Krismas awm chhan a ni lo, a nei zawk te pawh hian Krismas a thil thar neih loh te hi intihhmuh ta zawk ila a tha viau lo’ng maw. Hetiang reng anih chuan dawng awm tak tak kan hriat fuh siloh te tahna nasa zawk kan siam mai mai dawn alawm le. Krismas a lo thlen a thil thar neih kher tumna rilru hi paihthla thei tura inzirtir hi a finthlak viau zawkin ka lo hre ve a, chu chu a mi nawlpui hian bul kan tan thei reng sia, a neilo zawk te rualawh loh nan Krismas a thil thar neih kher loh hi tum tlang thei ila tha ka ti khawp mai.

4)     An tlan chak mah mah :- Krismas leh Kumthar bawr vel anih vang nge ni a bikin lirthei ke hnih neiho an tlanchak thin hle mai. Fimkhur taka lirthei khalh tan pawh a hlauhawm thova, ke a kal tan a hlauhawm em em bawk. Changkanna a kan ngai anih chuan a fuh lo viauin a rinawm.

Awle, thil dang tam tak tha tak tak pawh sawi tur awm nual mahse heng te hi phunchiar nih hlawh huamin ka han thailang ve mai mai ni teh se.

Reiek ka tlawh ve ta…..

Reiek hi kal ka tumna a rei tawh khawp mai, a tawp a tawpah chuan ka thleng ve ta ngei e, nghah chhuah man a awm khawp mai, kan kalpuite pawh duhthusam zan an ni e.

Reiek tlang chhipah thianzahoin kan chaw fun te kan thet darh a, kan kilho ngei bawk a, ka nuin thawh hlim atanga ka chaw pai tur min buaipuisak kha a ni bawk a, ka puar bik ngei mai, thianpa Mawi Mawia erawh sap rim a kai deuh bawk nen chhangthawp a rawn keng a, a hit viau lo tlat, kan chaw pai te a melh tai nasa ta mai sia tlem kan han tem tir ve tak kha. 

Hotel Regency-ah chuan....

An sawi lar deuh kha chu tlawh ve vek mai kha ka duh a, chung zinga an sawi zin pawl tak chu Hotel Regency hi a ni awm e. 30.12.2013 khan zanriah ei turin thian hovin kan thawk chhuak ve nasa mai a, an service a felfaiin a hmun len luh a lo rem bawk a, inchhirawm lo tak a ni. Min lo buaipuitu hmeichhe fel tak "Z" tih a hming intan kha pasal nei tawh tak maw??  Thianpa Saaka lah khan a sawi zui nasa mai sia.. :) NOI 

                     

                                       

Grand Reunion........

Tam tak chu kum sawm dawn lai inhmu tawh lo te kan ni hlawm, Sikul kan kal ho lai te kha chuan tleirawl hre tan tir mai kan ni. Ka haw chak chhan ber pakhat pawh a ni awm e. Synod Higher Secondary School - Science, kan batch ho kan inhmukhawm chu kan hlim tlang teh e. Sikul kan kal ho lai ang ngawt kha chu a ni ta lo, Officer lian tak tak, Zirna lama sang tak tak te, chhungpuinu/chhungpuipa lo ni ta te, veng chhungah, kohhran leh khawtlang hruaitu te an lo ni fur tawh mai. Engpawhnise eng nge kan nih tih lam ngaihtuah lova naupangchhia ang maia kan inkawm leh nghal bawrh bawrh thei kha tifamkimtu leh tinuamtu ber a ni. 

Night Out.....

Haw hun nen a innang kher bawk a zan len chhuah pawh a nuam khawp mai. Boruak vawt vuk mai, mipui inpel suau suau leh lirthei tlan vuk vuk te kha lung tilengtu an ni ta zel mai. Veng tam tak ten an kawtthler an chei a, len vel a nuam a, thalai te mai nilo nu leh pa, naupang thleng pawhin Krismas tihlutu an ni ta zel mai. Vai ho pawhin Milem pathian lawmnan an theihtawp an chhuah a, keini Pathian nung betu te phei uar takin kan veng leh kawtthler te hi kan chei tur a ni reng a ni. 

Young, Wild & Free.....

Pathian hian kan hlim hi a phal a ni. Thlasik meilum ai pahin, titi suam suam paha nula coffee lum intluka hlu hi a tam viau lo mai thei a ni. Heng te hi a hmanlai/ thing ti kan awm anih chuan kei zawng damchhunga "thin" ka thlang hial awm e. 

" Never underestimate the power of human stupidity" an lo tih te hi a awmzia tak kan hrethiam pha ve kher lo mai thei, engpawh chu lo nise, a tak mai leh huat nei lem lova damchhung hun hman hi a lo va nuam em..!

Zanlawn lam chow....

Mizopa kaah chuan a tui ber mai lo'ng maw. Zanlawn khaw chow, sa tui chawm, tawtani nen han pawlh nghek mai ila... rilram theihnghilh thak khawpin han lim nghek mai bawk ila, lung hi a awi hliah hliah mai a ni.

ADIOS, AU REVOIR, GOOD BYE, MANGTHA

Vawikhat chu kan naupan lai hian Chawngzawng hi ka man a, ka khawi thin a, bawmah ka khung a, a thlawh bo palh loh nan a keah lazaiin ka thlung bet tlat thin. Ka duat em em a, nitin chaw leh tui ka pe a, ramah te kalin a chaw tur khaukhuap leh rannung dang te ka zawng thin a, min tihlim em em a, theihtawpin atan pawh hun leh tha ka hmang ve thin a ni. Mahse tuk khat chaw ka pe tur chu a ke lazaia ka tawnna thi hnuang mai chu ka zuk hmu fuh hlauh mai, a dam lo tih hriat tak hian a ngui lup bawk a, chu a bawm atang chuan thlawh chhuah tumin nasa takin a lo bei a, hliam te hial a tawrh phah a lo a ni. Tichuan ka inngaihtuah chiang a, “he chawngzawng hi duhin min tihlim em em thin a, amaherawh chu anni chuan engtiklai mahin atana ka thil tih te, ka inpekna chu a hrethiam ngai dawn lo anih hi, ani tan chuan boruaka a chawngzawng pui te zinga awm tluka hlimna hmun a awm ngai dawn lo a ni”, tiin ka ngaituah a. Tu zawk mah dem tur kan awm lova, ka duhsakna leh hmangaihna a chhan let loh avangin Chawngzawng hi ka dem thei lova, Chawngzawng pawh hian bawma ka khawia, min tihhlim em avang hian min dem thei chuang bik ka ring lo. A pawimawh ta ber chu inhriatthiam tawnna kan neih loh vang a ni ta a ni, mahni hmasialna avanga  Chawngzawng ka lo khung beh reng hi a tha ber lova, ka thil ngainat em em chu a hlimna ka siamsak zawk tur a ni tiin ka rilru ka siam fel a. A bawm chu ka hawng a, a thlunna lazai te chu ka phelhsak a, tichuan ui tak leh ngai tak chung chuan ‘ Ka Chawngzawngte, mangtha mai le” tiin boruakah ka vawr kang ta a, a thlawk bo mai dawn amaw ka tih lai chuan ama bawmah chuan a rawn thlawk lut leh ta reuh a, a bawm kil tin ena a hawikual vel hnu chuan a thlawk chhuak a, hlim tak leh nuam ti takin a chawngzawng pui te hnenah chuan min thlawh liamsan ta a ni.

Awle, engvangin nge Mangtha tih ka sawi thin le? Saptawnga Good Bye, Good Night tih hi keini chuan Mangtha tiin kan sawi mai thin. Mangtha kan tih mai pakhat zawk hi chu kan thian te emaw kan chhung te emaw, ka hriat ngai lem loh te leh la hmuh ngai miah loh te pawh zanah tui takin mu sela, a tukah dam taka tho leh tura duhsakna kan hlanna tawngkam a ni. Tin, khawi ilo han inhmuhkhawm vela inthen hran dawn tein Mangtha kan ti liam mai thin bawk a. A hmang pawh kan hmang nasain Mangtha tha chi leh hman nuam zawk tak pawh a ni awm e.

Mangtha dang zawk, sap hoina Good-bye an tih nena inzul thuak erawh hi chu kan hman dan a dang zar mai. Mi naran hnenah kan sawi lem love, hmelhriat loh hnenah kan chham chhuak chamchi nahek lo. A tlangpuiin he thu kan sawi hi chuan kan sawina a te nen inhmu leh ngai tawh lo turin emaw thinlunga inzawmna tichat hlen tawh turin emaw kan sawi thin. Kan chhungkaw zingah emaw kan laina hnai ten min boralsan changte pawhin an ruang chungah te, an thlanah te emaw anmahni kan ngai a, hmuh leh kan chak a, beiseina erawh a awmtawh lo tih hriain “Mangtha Aw” kan ti chuai raih thin a nih hi.

Chutiang bawk chuan inngaihzawnna te, nupa karah thleng pawh a ni ang, rilru leh thinlung hmunkhat pu thin khan engemaw vangin emaw “Mangtha” an tih chang a awm thin. Mi pahnih emaw ten hlim tak, lungrual tak leh hmangaih taka hun engemaw chen an lo hman chu a tawp dawn ta tih entirnan “ Mangtha Mai le” tih hi kan lo hmang thin a ni.

“Mangtha” tih hian kan hmanna azirin awmzia a nei thui thei khawp mai. A chang chuan mahni nawmna leh hlimna thlakhlelh luat tuk vangin “Mangtha” tih ngam loh chang pawh ka nei fo thin. A chang erawhin harsatna te ka pehhel duh avangin”Mangtha” kan tithuai mai bawk thin a. A pawimawh berah chuan eng thil pawh ni rawh se, mahni lam chauh en lovin, kan awmdan in rah tha  a chhuah em tih thlir ila, pakhat chauh hlimna emaw nawmna mai a lo nih chuan; ui tak chung leh thlahlel tak chung pawhin “ Mangtha mai le” kan tih ngam a ngai thin a ni.

VAIRAM POLICE DAWR ZET ZAWNG

Hmanni chu hna thil avangin Commissioner of Police hnen atangin Character Certificate lak a ngai ve tlat mai a,  kum 5 chhunga kan awmna hmun atanga dil chhuah tur an tih miau avangin Mumbai atanga lak chhuah a ngai a,  chutiang a nih tak si chuan peih loh leh huphurh fe chuan ka awmna atanga Police Station hnai ber a ka hriat chu  ka pan ve hnak hnak a.


A NI KHATNA CHU: Hetiang Certificate vel hi chu local police station-ah a tihfel mai theih khan ka lo hre thawi ve a, zing karah thovin local police chu ka va dawr a, mahse anni chuan hetah ni lovin Commissioner Office – CST  (40 kms) ah daih kal a ngaih thu min hrilh a, tichuan ka pan phei nghal ta vat a.  Chutia Police Office ka va thleng phei chu Mizoram Police Office te ai chuan a buaichuar fe chu ka ring tho a, mahse ka lo rindan mai mai ang a ni lo tawp mai, form thehluh zawha Office kal tlang nghal mai tum kha ka ni a, a teuh hian a hnai lo, Form la chhuak tur ringawt pawh chuan a tlep hian an lo tlep tuarh ta mai a, rilru te te in vairam nge nge kan in daihzai teh e ka ti niap niap a, chutia nileng pawhin form ka lachhuak ve hman angem tih zawhna a lo awm takah chuan a tuk lama tha thara bei leh tur chuan ka kiansan ta hrih a ni.

 
A NI HNIHNA CHU: Hma takah ka thova, form lachhuak ve hman ngei tur chuan chawlh la meuhin ka insangphek a. Ka hma ve thawkhat viau chuan ka hria a, amaherawh chu line chu a thui ngaih ngaih khawp mai. Tawk fang ka  nghah hnu chuan chawhnu thlangher rawih a lo ni hman der a. Ka hmaah mi panga vel chiah an awm tawh tih chuan nula chhe lo zet mai pakhat hi a rawn vei thauh thauh a. Intichhelo zet chuan Indigo Pilot ka nia, form ka  la duh a rawn ti hmawk hmawk a, amaherawh chuan a thawk ho te khan an lo ngai thutak hran lo khawp mai, an lo ngai pawimawh lo lutuk kha ka nuih a za lutuk zawk a, tawng lem lovin line na tur chu an kawhhmuh satliah ve  tawp a, kha nu kha a lungawi lutuk lo chuan ka hria. Tichuan ka thleng ve ta, ka thil duh te ka han hrilh chuan, “E he! nang chu hetah rawn kal tur a ni hleinem, in veng local police station-ah in report tur a lawm” min ti ta heu mai le, nilengin patling a pumpa ka lo in-line ve a, ka lungawi bik lo kher mai. “Local Police station atangin heta kal turin min ti sia” tiin ka chhang a, eng teh vak phei chu ka sawi kaw chuang lo, address dang daih hi min pe a, “ hetah hian va kal rawh” min ti liam puat bawk a.

A NI THUMNA CHU: An address min pek chu hmun dang daih, ka kalna hmasa ni lo kha a ni a. Tichuan chu hmun chu ka pan phei leh ta a ni. A hmun ka thlen chuan mi hmuh tur min han hrilh zung zung a, a fuh tawh pawh ka ring khawp a. Ka hmuh duh pa chu ka va hmu ta a, a ni chuan “hetah a nilo, Commissioner Office ah kal tur  zawk” a lo ti leh ta mai! Ka thin a rim ve deuh tawh bawk nen, ka ang deuh buan buan hial a, mahse awmzia  erawh a nei nasa chuang lo. Muangchang chuan Form pakhat min pe a, “hei hi fill up la, Commissioner Office a – J  branch ah kal ang che, J-branch a i kal loh chuan tumahin an hre lovang” a tih leh takah chuan a ngai te bawkin chu Police Office chu ka chhuahsan leh ta a ni.

 
A NI LINA CHU : Peih lo leh ning em em chuan Commissioner Office bawk chu ka pan leh ta hnu hnu a. Police Stationah chuan mi chi hrang hrang hi ka hmu zut a, a then sual hmel em em te, a then movie leh Serial Film a lo  chang te pawh an awm nawk bawk a, vun var leh vun ngo te, kan hmel ang deuh deuh te thleng chuan an lo phu suau suau bawk a. Tichuan J Branch chu ka va zawng tan ta a, mi pawh chu an kawhhmuh tha peih lo, saw tah saw tah tih hlir chuan ka tei kual ka tei kual a, ka zawng nasa lutuk chu thlan tui nen khawlum nen chuan ka chau  hnak tawh a, engtin tin emaw a hnu fe chuan ka va zawng hmu hram a, “ tun tum zet chu ka thehlut ve tawh ngei dawn e “ ka tia, ka phur ve tawh hle. Form chu an han en vang vang a, “hei chu kan chan a ni lo, M Branch ah va kal rawh” min ti leh ta reuh a, tah hi a chhuak tawp tawh zawk. M Branch chu ka va zawng leh fe a, a tawpah  chuan ka va hmu leh mial a, hmanhmawh takin ka lut a, form chu ka pe leh a, a titupa ber ni awm tak chuan “Vawiin chuan ka hman tawh lo, naktuk ah i rawn kal leh dawn nia ” min ti leh ta mai! Ka thinrim tawh lutuk chu min tirh kual nasat tawh zia te chu ka han sawi va phiar phiar a. A inthlahrung ve deuh te pawh a niang, ka form  ken lai chu a han bih zuaih a, “I form rawn ken hi a dik lo, counter a mi in-line teuhna ah khuan zuk la, form va lachhuak ve rawh” min han ti leh a ni chu(h)..!! A sawi pawh ka sawi peih tawh lo, a nih nih ni mai ang hmiang ka  tia, lakchhuah leh pawh tum tawh chuang lo chuan ka haw ta nal nal a.

KAR HNIH HNUAH CHUAN: Kar hnih vel a liam hun chuan rilru pawh a hah leh tawh hle, Police Station ah ka kal peih tawh silo, ka mangang rilru ve tawh hle mai a. Mahse nikhat chu Police Officer pakhat hi kan Office ah a rawn  lenglut hlauh mai. A body guard niawm tak mi pali vel hian an rawn tawiawm bawk a. Theih ang tawk chuan ka lo buaipui ve a, a lawm pawh a lawm ve viau chuan ka hria, tawngkam tha in “mamawh i neih chuan min rawn  contact thin dawn nia” a tih takah chuan remchanna ka lo la ve thuai a, “Certificate lakchhuah ka tum a, a  buaithlak lutuk a” kan ti dek dek chu, “naktuk ah rawn kal rawh, engkim kan tifel dawn nia, keimah hi Incharge  ka nia lawm “ a ti ta reuh a, ka lawm ngei mai.

 

A TAWPAH CHUAN : A tawngkam tha umin a tuk chuan Commissioner Police Office chu ka kal thuai a, amah chu a lo awm lova, ka han phone nghal a, minute 2 emaw lek turah hian mi 3 vel hian min rawn zawng a, an mi zawn ka  nih leh nih loh te min zawt a, ka lo nih ngei siah chuan tha em em in min bia a, Canteenah min hruai a, thingpui te min intir a. Ka thil ei lai chuan anni chuan form te chu an lo lachhuak vek a, ka details tlem min zawt a, form  pawh an fill-up vek a, ka sign zuaih tih bakah chuan buaina ka nei ta lo. Minute 10 pawh a tling lovang tih chuan Receipt pakhat hi min rawn pe a, ni 15 hnuah certificate a lakchhuah theih thu min hrilh nghal var bawk a. Hmel  hriat neih leh neih loh chuan kawngro a lo su ngei a nih tih ka hre ve ta a ni.

KEIMAH VANG LEK

Hunte an liam zel a, Mumbaia kum a kum awm ta chu eng eng emaw han tawn changte pawh a awm ve thin. 24th March 2013 (Sunday) inkhawm bana thil thleng pawh kha hriatreng tlak a ni vein ka hria a, chanchin kim chang zawk chu thianpa Kima’n a blog mizohican.blogspot.in-ah thiam takin a ziak tawh a, tin, chanchinbu hrang hrang India Times, Mumbai Boss ,Indian Express, Mid Day, First Post, DNA, Hindustan Times leh chanchinbu dang dangah te an lo chhuah chei chuaih tawh bawk a, hetah erawh hi chuan keimah lam atangin ka hmuh dan ka’n thlir ve mai mai teh ang.


24th May chu Pathian ni a nih angin kan Biak In – All Saint Church-ah chuan Mizote pawh kan fuankhawm leh a, thiante Pathian thusawi tha tak tak kan ngaihthla a, inkhawm banah pawh chuan a ngai tein Nimbu paani dawrah kan bawr leh laih a ni. Mizoram House lama inkhawm tura phei leh nghal a ngaih avangin Colaba lama chaw ei hmasak chu tha kan ti a, Colaba lam pan tur chuan Taxi kan la ta a ni. Kan Taxi lak tur chu kawng lai takah a ding ta ran mai a, chutihlai tak chuan Phone Call ka lo dawng ve chiah a, ka thian dangte zawng Taxi-ah an lut vek tawh a, keimah chauh chu min lo nghak tawh chu niin, Motor Horn a ri tuarh tuarh a, kan hnung chiaha Police Van motor horn ri pawh a ring hle mai, chutia kawng laia kan ding ta chu min ning ve hle a ni ta ve ang, Police Van a chuang pakhat chuan nidang a lo tih dan thin tho ni ngeia ka rin chuan keiniho leh Mizo dang la awmte chu min au/chhaih ta vel a nih kha.


Heng thil zawng zawng hi mitkhapkar tak meuh meuha thleng a ni a, 1 minute pawh a ni kher awm love, Taxi chhunga ka luh ruala Nepali tih vela a rawn au nak nak kha chu ka hre pha vuaih vuaih a, kei lah hetiang lama ngaihsam ang reng tak hian huat enah pawh ka lo en lem lova, Phai ram kan awm tirh te chuan haw ve viau thin mah ila, a khat tawka hriat reng hi chuan ngaiah ka lo nei hman tawh a, eng teh huah ka lo ngai lem tawh lo a ni ber e. Chutih rual vek chuan thianpa Kima’n thiam tak leh huaisen tak maia Mizo mai nilo, North East mite leh Mumbai Police-te inhriatpawh/intlawhpawh tawn leh zual theihna hun remchang atan a lo hmang thei kha chu a thain a fakawm ve ngawt chuan ka hria.


Chu thu kal zelah chuan 26/11 Hero (Mumbai Terrorist Attack) leh Joint Commissioner of Police , Law & Order, Mumbai ni bawk – Mr Sadanand Date te meuh pawh ka hmuh ve phah ta hial mai! Tichuan Kima kaihhruainain 08th April (Monday) khan Commissioner of Police Office - Mumbaiah chuan kei leh ka thiante pathum - Tv Maruata, Tv Kima leh Nl Baby te chu kan va thu ve ruau mai a. Inkawmna hun tha tak kan va nei thei a, North East mi te nen inpawhna tha zawk neih theih dan turte kan sawi a. Chubakah mahni chanchin thenkhat te sawiin, Date-a pawh hian 26/11 inkahna vela a thil tawn pui tak takte a sawi ve bawk a, a lu a (a mit zawn) silaimu leng vel avanga thil kehthem la tan reng thute pawh tui takin a sawi ve nghe nghe a ni. Thingpui tui tak leh a hmeh tuihnai tak min hlui chu kan ei hova, hun leh tha leh zangkhai tak hnuaiah kan inkawmna hun chu kan titawp ta a  ni.

Hman lo leh buai chung chunga kal kan ni hlawm bawk a, zanriah tui tak chu phu kan intitlang a ni ang chu; ngun taka rei fe kan ngaihtuah hnuin amah Kima bawk chuan Kofuku - Japanese Restaurant thar a hriat thu a sawi zauh pek a, chumi hmun ngei chu panin - zan thiang reh leh thla eng set hnuaiah chuan Worli Sea Link tlan pel ngei chung leh Vanlalsailova hla ngaithla raih raih pah chuan Bandra chu kan pan ta vang vang a ni.

A hmun kan thleng chu kan besei aiin a lo nuam hle mai, ei leh in pawh Mumbai khawpuiah hian a aia tui hmuh tur a vang viau in ka ring. Sushi platter - Tuna, Salmon, Octopus, Hamachi Temaki rawn intlar tuar chu a hmel a mawi ngei mai. He hmunah hian Mizo ngei Chef a lo awm hlauh mai bawk a, a ni zarah hian Ice Cream tui dang dai tak mai - Champagne Ice Cream kan ei nghe nghe bawk a ni. Tin, zankhuaa min hruaitu leh pawisa phawrh ve phallotu Tv Maruata chungah lawmthu awm mawlh bawk teh se. 

Heng zawng zawngte hi ka han ngaihtuah let a, Taxi-ah khan lo chuang ve nghal mai ila chu hetiang tiang hi kan thleng awm tawp silova, a bul tantu leh chhan bulpui chu keimah ngei ka lo ni tih ka hrechhuak leh hnuhnawh a, rah tha a chhuah leh chhuah loh chu thu hran nise, hun tha leh nuam tak erawh ka hman phah tih erawh ka chiang thung :)