VAIRAM POLICE DAWR ZET ZAWNG

Hmanni chu hna thil avangin Commissioner of Police hnen atangin Character Certificate lak a ngai ve tlat mai a,  kum 5 chhunga kan awmna hmun atanga dil chhuah tur an tih miau avangin Mumbai atanga lak chhuah a ngai a,  chutiang a nih tak si chuan peih loh leh huphurh fe chuan ka awmna atanga Police Station hnai ber a ka hriat chu  ka pan ve hnak hnak a.


A NI KHATNA CHU: Hetiang Certificate vel hi chu local police station-ah a tihfel mai theih khan ka lo hre thawi ve a, zing karah thovin local police chu ka va dawr a, mahse anni chuan hetah ni lovin Commissioner Office – CST  (40 kms) ah daih kal a ngaih thu min hrilh a, tichuan ka pan phei nghal ta vat a.  Chutia Police Office ka va thleng phei chu Mizoram Police Office te ai chuan a buaichuar fe chu ka ring tho a, mahse ka lo rindan mai mai ang a ni lo tawp mai, form thehluh zawha Office kal tlang nghal mai tum kha ka ni a, a teuh hian a hnai lo, Form la chhuak tur ringawt pawh chuan a tlep hian an lo tlep tuarh ta mai a, rilru te te in vairam nge nge kan in daihzai teh e ka ti niap niap a, chutia nileng pawhin form ka lachhuak ve hman angem tih zawhna a lo awm takah chuan a tuk lama tha thara bei leh tur chuan ka kiansan ta hrih a ni.

 
A NI HNIHNA CHU: Hma takah ka thova, form lachhuak ve hman ngei tur chuan chawlh la meuhin ka insangphek a. Ka hma ve thawkhat viau chuan ka hria a, amaherawh chu line chu a thui ngaih ngaih khawp mai. Tawk fang ka  nghah hnu chuan chawhnu thlangher rawih a lo ni hman der a. Ka hmaah mi panga vel chiah an awm tawh tih chuan nula chhe lo zet mai pakhat hi a rawn vei thauh thauh a. Intichhelo zet chuan Indigo Pilot ka nia, form ka  la duh a rawn ti hmawk hmawk a, amaherawh chuan a thawk ho te khan an lo ngai thutak hran lo khawp mai, an lo ngai pawimawh lo lutuk kha ka nuih a za lutuk zawk a, tawng lem lovin line na tur chu an kawhhmuh satliah ve  tawp a, kha nu kha a lungawi lutuk lo chuan ka hria. Tichuan ka thleng ve ta, ka thil duh te ka han hrilh chuan, “E he! nang chu hetah rawn kal tur a ni hleinem, in veng local police station-ah in report tur a lawm” min ti ta heu mai le, nilengin patling a pumpa ka lo in-line ve a, ka lungawi bik lo kher mai. “Local Police station atangin heta kal turin min ti sia” tiin ka chhang a, eng teh vak phei chu ka sawi kaw chuang lo, address dang daih hi min pe a, “ hetah hian va kal rawh” min ti liam puat bawk a.

A NI THUMNA CHU: An address min pek chu hmun dang daih, ka kalna hmasa ni lo kha a ni a. Tichuan chu hmun chu ka pan phei leh ta a ni. A hmun ka thlen chuan mi hmuh tur min han hrilh zung zung a, a fuh tawh pawh ka ring khawp a. Ka hmuh duh pa chu ka va hmu ta a, a ni chuan “hetah a nilo, Commissioner Office ah kal tur  zawk” a lo ti leh ta mai! Ka thin a rim ve deuh tawh bawk nen, ka ang deuh buan buan hial a, mahse awmzia  erawh a nei nasa chuang lo. Muangchang chuan Form pakhat min pe a, “hei hi fill up la, Commissioner Office a – J  branch ah kal ang che, J-branch a i kal loh chuan tumahin an hre lovang” a tih leh takah chuan a ngai te bawkin chu Police Office chu ka chhuahsan leh ta a ni.

 
A NI LINA CHU : Peih lo leh ning em em chuan Commissioner Office bawk chu ka pan leh ta hnu hnu a. Police Stationah chuan mi chi hrang hrang hi ka hmu zut a, a then sual hmel em em te, a then movie leh Serial Film a lo  chang te pawh an awm nawk bawk a, vun var leh vun ngo te, kan hmel ang deuh deuh te thleng chuan an lo phu suau suau bawk a. Tichuan J Branch chu ka va zawng tan ta a, mi pawh chu an kawhhmuh tha peih lo, saw tah saw tah tih hlir chuan ka tei kual ka tei kual a, ka zawng nasa lutuk chu thlan tui nen khawlum nen chuan ka chau  hnak tawh a, engtin tin emaw a hnu fe chuan ka va zawng hmu hram a, “ tun tum zet chu ka thehlut ve tawh ngei dawn e “ ka tia, ka phur ve tawh hle. Form chu an han en vang vang a, “hei chu kan chan a ni lo, M Branch ah va kal rawh” min ti leh ta reuh a, tah hi a chhuak tawp tawh zawk. M Branch chu ka va zawng leh fe a, a tawpah  chuan ka va hmu leh mial a, hmanhmawh takin ka lut a, form chu ka pe leh a, a titupa ber ni awm tak chuan “Vawiin chuan ka hman tawh lo, naktuk ah i rawn kal leh dawn nia ” min ti leh ta mai! Ka thinrim tawh lutuk chu min tirh kual nasat tawh zia te chu ka han sawi va phiar phiar a. A inthlahrung ve deuh te pawh a niang, ka form  ken lai chu a han bih zuaih a, “I form rawn ken hi a dik lo, counter a mi in-line teuhna ah khuan zuk la, form va lachhuak ve rawh” min han ti leh a ni chu(h)..!! A sawi pawh ka sawi peih tawh lo, a nih nih ni mai ang hmiang ka  tia, lakchhuah leh pawh tum tawh chuang lo chuan ka haw ta nal nal a.

KAR HNIH HNUAH CHUAN: Kar hnih vel a liam hun chuan rilru pawh a hah leh tawh hle, Police Station ah ka kal peih tawh silo, ka mangang rilru ve tawh hle mai a. Mahse nikhat chu Police Officer pakhat hi kan Office ah a rawn  lenglut hlauh mai. A body guard niawm tak mi pali vel hian an rawn tawiawm bawk a. Theih ang tawk chuan ka lo buaipui ve a, a lawm pawh a lawm ve viau chuan ka hria, tawngkam tha in “mamawh i neih chuan min rawn  contact thin dawn nia” a tih takah chuan remchanna ka lo la ve thuai a, “Certificate lakchhuah ka tum a, a  buaithlak lutuk a” kan ti dek dek chu, “naktuk ah rawn kal rawh, engkim kan tifel dawn nia, keimah hi Incharge  ka nia lawm “ a ti ta reuh a, ka lawm ngei mai.

 

A TAWPAH CHUAN : A tawngkam tha umin a tuk chuan Commissioner Police Office chu ka kal thuai a, amah chu a lo awm lova, ka han phone nghal a, minute 2 emaw lek turah hian mi 3 vel hian min rawn zawng a, an mi zawn ka  nih leh nih loh te min zawt a, ka lo nih ngei siah chuan tha em em in min bia a, Canteenah min hruai a, thingpui te min intir a. Ka thil ei lai chuan anni chuan form te chu an lo lachhuak vek a, ka details tlem min zawt a, form  pawh an fill-up vek a, ka sign zuaih tih bakah chuan buaina ka nei ta lo. Minute 10 pawh a tling lovang tih chuan Receipt pakhat hi min rawn pe a, ni 15 hnuah certificate a lakchhuah theih thu min hrilh nghal var bawk a. Hmel  hriat neih leh neih loh chuan kawngro a lo su ngei a nih tih ka hre ve ta a ni.

KEIMAH VANG LEK

Hunte an liam zel a, Mumbaia kum a kum awm ta chu eng eng emaw han tawn changte pawh a awm ve thin. 24th March 2013 (Sunday) inkhawm bana thil thleng pawh kha hriatreng tlak a ni vein ka hria a, chanchin kim chang zawk chu thianpa Kima’n a blog mizohican.blogspot.in-ah thiam takin a ziak tawh a, tin, chanchinbu hrang hrang India Times, Mumbai Boss ,Indian Express, Mid Day, First Post, DNA, Hindustan Times leh chanchinbu dang dangah te an lo chhuah chei chuaih tawh bawk a, hetah erawh hi chuan keimah lam atangin ka hmuh dan ka’n thlir ve mai mai teh ang.


24th May chu Pathian ni a nih angin kan Biak In – All Saint Church-ah chuan Mizote pawh kan fuankhawm leh a, thiante Pathian thusawi tha tak tak kan ngaihthla a, inkhawm banah pawh chuan a ngai tein Nimbu paani dawrah kan bawr leh laih a ni. Mizoram House lama inkhawm tura phei leh nghal a ngaih avangin Colaba lama chaw ei hmasak chu tha kan ti a, Colaba lam pan tur chuan Taxi kan la ta a ni. Kan Taxi lak tur chu kawng lai takah a ding ta ran mai a, chutihlai tak chuan Phone Call ka lo dawng ve chiah a, ka thian dangte zawng Taxi-ah an lut vek tawh a, keimah chauh chu min lo nghak tawh chu niin, Motor Horn a ri tuarh tuarh a, kan hnung chiaha Police Van motor horn ri pawh a ring hle mai, chutia kawng laia kan ding ta chu min ning ve hle a ni ta ve ang, Police Van a chuang pakhat chuan nidang a lo tih dan thin tho ni ngeia ka rin chuan keiniho leh Mizo dang la awmte chu min au/chhaih ta vel a nih kha.


Heng thil zawng zawng hi mitkhapkar tak meuh meuha thleng a ni a, 1 minute pawh a ni kher awm love, Taxi chhunga ka luh ruala Nepali tih vela a rawn au nak nak kha chu ka hre pha vuaih vuaih a, kei lah hetiang lama ngaihsam ang reng tak hian huat enah pawh ka lo en lem lova, Phai ram kan awm tirh te chuan haw ve viau thin mah ila, a khat tawka hriat reng hi chuan ngaiah ka lo nei hman tawh a, eng teh huah ka lo ngai lem tawh lo a ni ber e. Chutih rual vek chuan thianpa Kima’n thiam tak leh huaisen tak maia Mizo mai nilo, North East mite leh Mumbai Police-te inhriatpawh/intlawhpawh tawn leh zual theihna hun remchang atan a lo hmang thei kha chu a thain a fakawm ve ngawt chuan ka hria.


Chu thu kal zelah chuan 26/11 Hero (Mumbai Terrorist Attack) leh Joint Commissioner of Police , Law & Order, Mumbai ni bawk – Mr Sadanand Date te meuh pawh ka hmuh ve phah ta hial mai! Tichuan Kima kaihhruainain 08th April (Monday) khan Commissioner of Police Office - Mumbaiah chuan kei leh ka thiante pathum - Tv Maruata, Tv Kima leh Nl Baby te chu kan va thu ve ruau mai a. Inkawmna hun tha tak kan va nei thei a, North East mi te nen inpawhna tha zawk neih theih dan turte kan sawi a. Chubakah mahni chanchin thenkhat te sawiin, Date-a pawh hian 26/11 inkahna vela a thil tawn pui tak takte a sawi ve bawk a, a lu a (a mit zawn) silaimu leng vel avanga thil kehthem la tan reng thute pawh tui takin a sawi ve nghe nghe a ni. Thingpui tui tak leh a hmeh tuihnai tak min hlui chu kan ei hova, hun leh tha leh zangkhai tak hnuaiah kan inkawmna hun chu kan titawp ta a  ni.

Hman lo leh buai chung chunga kal kan ni hlawm bawk a, zanriah tui tak chu phu kan intitlang a ni ang chu; ngun taka rei fe kan ngaihtuah hnuin amah Kima bawk chuan Kofuku - Japanese Restaurant thar a hriat thu a sawi zauh pek a, chumi hmun ngei chu panin - zan thiang reh leh thla eng set hnuaiah chuan Worli Sea Link tlan pel ngei chung leh Vanlalsailova hla ngaithla raih raih pah chuan Bandra chu kan pan ta vang vang a ni.

A hmun kan thleng chu kan besei aiin a lo nuam hle mai, ei leh in pawh Mumbai khawpuiah hian a aia tui hmuh tur a vang viau in ka ring. Sushi platter - Tuna, Salmon, Octopus, Hamachi Temaki rawn intlar tuar chu a hmel a mawi ngei mai. He hmunah hian Mizo ngei Chef a lo awm hlauh mai bawk a, a ni zarah hian Ice Cream tui dang dai tak mai - Champagne Ice Cream kan ei nghe nghe bawk a ni. Tin, zankhuaa min hruaitu leh pawisa phawrh ve phallotu Tv Maruata chungah lawmthu awm mawlh bawk teh se. 

Heng zawng zawngte hi ka han ngaihtuah let a, Taxi-ah khan lo chuang ve nghal mai ila chu hetiang tiang hi kan thleng awm tawp silova, a bul tantu leh chhan bulpui chu keimah ngei ka lo ni tih ka hrechhuak leh hnuhnawh a, rah tha a chhuah leh chhuah loh chu thu hran nise, hun tha leh nuam tak erawh ka hman phah tih erawh ka chiang thung :)

Mumbai Mizoram House Thar Thunawi

A kum a kum tel Mumbaia han awm ve takah chuan Mumbai Mizoram House pahnih lungphum phumna hunah ka tel ve ta der mai. A hmasa zawk kha kan awm tirh te a ni a, a lawmawm zia ka hrethiam lutuk lo. Amaherawh chu tunah chuan Mizoram House lo pawimawh zia leh a bikin damlo te tan malsawmna a nih zia kan hrethiam chho ve zel a, tuna Vashi Sector 30A, Navi Mumbai a an sa leh tur pawh hi a mimal ang tak pawhin a lawmawm hle in ka hria.

01st March 2013 chu Zirtawp ni a ni a, zing atangin Office ban hma ngei tumin theihtawp ka chhuah nghal a. Dar 1:30 pm vel atangin U Maruata (Asst. General Manager - Exim Bank) chuan min rawn tur tan a, hmanhmawh bak lengin chaw ka ei sawk sawk a, tan hun tura an ruat dar 4pm chu tlai hauh lo turin office chu dar 2:15pm velah ka chhuahsan ta a. CST station-ah chuan U Maruata chuan min lo nghak vang tawh a, U Malsawma (IRS – Income Tax) erawh leihnuai kawng an siamah a lo bo deuh a ni awm a, a rawn tlai hret a. Dar 2:30pm ah chiah chuan Vashi – Mizoram House thar tur lam panin Train ah chuan kan zuang lut ta a ni.

Chawhnu dar 3:30 ah a hmun kan thleng phei a, a kal tur awm ang chu an lo thleng deuh vek tawh mai a; kan khuallian tur te tih mai loh chu, ei leh in, sound system, usher, security guard etc engkim mai an lo peihfel vek tawh a ni. Tichuan khuallian leh Mizoram Chief Minister ni mek Pu Lal Thanhawla leh a team te chu kan nghak ta tlek tlek mai a ni. Dar 4 a tan tur a nia, buai tak leh hmanhmawh takin tan huna thlen ngei kan tum tih vel te chu an ngaihtuah vak lo a ni chek ang chu, darkar 1 leh 15 minutes hnuah a rawn thleng hram mai, kan ril a tam tawh bawk si, a tam zawk chaw ei lova kal te an ni a, thenkhat theih leh thei lova damlo/cancer chung chung a kal te an ni hlawm bawk nen, a zia lo viau chuan ka hria. Chief Minister a rawn thlen meuh chuan program pawh a nih dan tur ang takin a kal zung zung a, fel fai takin darkar khat leh a chanve vel chhung lekin kan zo fel hman der a ni. Mizoramah awm ta ila biak pawh kan biak phak meuh loh tur kan zaithiam lar te nen inpawh takin kan inkawm thei te kha keia tan a hlu viau mai, chung zawng ai chuan Mizo mipui te mamawh tak mai, Mizoram House kan nei thei tur erawh duhthu sam chiah lo mahsela ka lawm ve em em a ni.

Hemi ni a thil thleng mak ka tih thenkhat te :-

1.    Kan ram hruaitu ber mai leh mi te entawn ber darkar 1 leh 15 minutes lai mai a rawn tlai a, a rawn tlai chhan pawh sawi miah lo leh hriatthiamna dil miah lova, a nih dan tur ve reng anga ngai a a kal larh larh kha a mak ka lo ti khawp a, mipui te min zah lo nge a nachang a hre lo, nge Chief Minister lal dan ka hrethiam lo zawk ka ti mai mai. 

 
2.   Mumbai Mizoram House kan neih mek hi a lian lem lo, Mizoram Chief Minister meuh rawn zin chuan a rawn tlawh ve kan beisei hle, mahse a rim a ra pawh kan hre ta lo.

3.    Ribbon vel a chep chat anga, tawngtaina nen Mizoram House lungphum a hawng ang chu ka lo tih lai a, Vai style a che ta zawk kha mak ka ti hle bawk.

4.    Vai style-a kan kal dawn law law a nih chuan engatinge  Rosy leh TBC khan Pathian hla an sak le?? Diya, Tika, Pathian Fakna hla leh party dang in sawiselna zawng zawng hun khat a kan hmang ho kha a mak ka ti.

5.    Kan khuallian in Kristian zaah za kan ni tih chhuang takin a sawi a, NLUP lamah a kual leh a, MNF party avanga Mumbai Mizoram House tur a pamtul hman teuh zia te, chumi avanga Mizoram sum chawi tur tam tak zia te a sawi bawk a. An sawrkar hmasak lai khan engatinge lung an phum mai loh le tih te ka lo inzawt ve a. Minister te thusawi hi ka la ngaithla ngai lem lova, hetianga thupui (subject) hrang hrang chawh pawlh vel hi politician mizia a ni ve hrim hrim em ni aw tih te ka ngaihtuah mai mai bawk.

Awle, thil hriat fuh loh pawh tam tak ka nei ngeiin ka ring a, eng pawh nise  Mumbai Mizo ten House thar kan nei leh thei ngei dawnin a lang a, hengte hi tangkai takin a mamawhtu ten hmang thei sela, a bikin damlo leh sikul naupang thlenna mai nei lo te tan malsawmna nasa tak a nih ngei ka beisei. Kan chan tur beitham viau mahse neih loh ai chuan a tha hrim hrim a, Pu Hawla sawrkar hian eng style hmang pawhin rawn hawng se a lawmawm em em a, rawn hawng lo ta sela chuan Pu Zorama hnuaiah hian kan hawng ngei ang tih a awm chuang bawk silova. Chuvang chuan a party emaw, mimal emaw House kan neih theihna tur atana tha leh zung sengtu zawng zawng te inpekna hi a fakawm ka ti thlawt a ni.

Best Sunday Ever...!

Sea Hill Party chu chhim ngei ka tumruh hle mai, a hmasa zawk pawh khan tuilian avangin ka lo thulhsan tawh bawk nen, tun tum chu thulh ka tum bau lo. Dan pangaiin hma lutuk lo dar 7 pm vela kal chu ka tum a, ka inbuatsaih mek lai chuan sms ka dawng ta hlawl mai a, ti hian “ Dinner chu cancel mai. Chhuah loh a tha ber ang, Bal Thackeraya thi chiah a, MNS leh Shiv Sainik hovin dawr zawng zawng an khartir vek “, tiin. A pawi ka ti hle mai, Inrinni zana han awm mai mai tur chu ka ui khawp a, tihngaihna vak awm chuang silo chuan Movie ka en vel ta mai mai a.

 A tuk Pathian ni lo thleng pawh chu nidang ai chuan a ngui deuh nghulh a, news ka’n en vel a, engmah motor, taxi, auto, mihring tak ngial pawh an awm lo. Police ho lah chuan mipui te In chhunga awm vek turin an puang reng bawk a, emergency tawp ah lo chuan chhuak lo turin thuchhuah an siam a. Mumbai khawpui chu a reh hian a reh tlawk tlawk a ni ber e. Hel hovin an beih emaw bomb a puak emaw a nih pawhin nunphung hi a khaihlak ngai lem lo, mahse tun tum zet chu mipui kan thlabarin kan khur a, pawn a chhuak ngam an awm lova, dawr, kuhva dawr, paani puri, Nimbu paani dawr, pheikhawk chhe siamna tak ngial pawh inhawng hmuh tur  a awm lo.

Ka rilruah inkhawm a rawn lang ta. Ka thiante leh hruaitu thenkhat te ka be kual a, anni chuan inkhawm a ngamawm loh thu min lo hrilh liam liam hlawm a, thenkhat erawh taxi/auto tel lova kal ngaihna awm lo te an ni thung. Inkhawmna kan nei thei lovang tih ka hlau em em a, kan mihrang hmasa ten  “ Maichamah chuan Mei a nung reng anga, a mit tur a ni lo “ tia thuthlung an lo zam tawh chu ka hunah hian bawh pelh ka phal thak bik lo mai. Tichuan ka rilru ka siam a, kal na tur hi awm lo eng ang pawh ni sela, Biak In hi ka vak thleng tho tho ang tiin ka intiam a, ka awmna leh Biak In hi 50kms vel daih a ni. Tichuan hma takah ka insiam sawk sawk a, Biak In lam pan chuan ka chhuak ta a. Mihring mit hmuh leh Pathian hmaah ngei pawh a ni ang mi tling lo ber leh thatna nei lo ka ni tih ka chiang em em a. Amaherawh chu hemi ni tluka Inkhawm chak leh phur hi ka la nei ngai lo hrim hrim thung si. Ka han ngaihtuah ber chu kan ringtu hmasa, Polycarp, Ignatia etc te ho Rome sawrkar tihduhdahna hlau reng reng a an awm lai, thih leh thih tia Pathian an biak hram hram lai te, a ruk a Pathian be tur a an inhmuhkhawm lai te chu ka lo mitthla ve a. Khatih lai an boruak ang chu tawng em lo mahila, a hun laia rilru tur te ka suangtuah thiam ve ruai ruai phahin ka hria.

Heti khawpa Mumbai khawpui a tit lai hian Pathian thlarau thianghlim chuan min awmpui tlatin ka hria a, ka hlau der lo mai, hlauh a hnekin amah hming avanga tuar ve theihna hun/chance ka nei tur hi ka lawm em em ringawt mai a. Ka hlim tak meuh meuh a ni, thlarau lamah hian ka sang vak bik lova, mahse tun tum zet chu min awmpuitu a awm tih hi ka chiang em em si a ni. In ka han chhuahsan chiah chu Bus a rawn tlan phei hlauh mai, Train Station a kal tur a lo ni leh zel mai, ka chuang ve nghal a, Train pawh chu buaina awm lo chuan ka va hmu ve a, a thawl em em mai leh ta nghal a, chumi hnu chuan ke a 7 kms vel chu kal ka tum a, ka vanneihna a la tluang zel, Bus, Biak In thleng kal tur a rawn tlan leh ta – ka lawmna hi sawisen a ni lovang. Tichuan nidang zawng aia hma chuan Biak In pawh chu ka thleng ta reng mai a ni. Tichuan mi 10 tlawng mai chuan inkhawm chu kan tan ta a, an hming hmerhin kan sawi hial teh ang – Pu Thana (BMCF Vice Chairman) te chhungkua ( a thiannu leh a fa te 2 nen), Nl Baby (South Mumbai), Tv Hriata (Indian Navy), Tv Amos (South Mumbai), Pu Ruata (Mizoram House), Tv Machhana (Hruaitu) leh keimah. Inkhawm program duan sa anga kal ngaihna awm ta lo chu Sharing hunin kan hmang a, kan nuna Pathian hnathawh te kan sawi liam liam a, a hnu deuh ah chuan Nl Eunice leh apa (Aizawl atanga lo zin) chu an rawn thleng ve nghal bawk a. Tichuan kan vaiin mi 12 kan ni ta a, Isua zirtir zat chiah kan ni tiin kan hruaitu chuan a tlip nghe nghe a ni. Kan thilpek tlingkhawm zat pawh Rs 460/- lai a ni.  Banna hla “ I lamah min hip rawh” tih kan sak te phei chuan kan tui hle mai, kan la nawn hial a. Inkhawm banah chuan kan BMCF Vice Chairman te In lamah chuan Vawksa rep leh Bawngsa rep ei tur chuan kan liam thla ta nghal a. Thlarau mai nilo, tisa ngei pawhin kan puar hle a ni.

Tet te atanga Sunday School te kalin, naupang dang ang thovin ka lo seilian ve a, mahse hemi ni tluk a inkhawm chak leh inkhawm nuam tih hi ka la tawng ngai hauh lo mai. Tlin lohna leh fel lohna tam tak nei mah ila Pathian kan hnena a la rawn inpuang duh tih ka hriat hian ka lawm em em a, eng ang mi pawh ni ila “ kei atan erawh zawng Pathian hnaih hi a tha a ni” tiin ka tlip ta a ni.

A Hmeltha Reuh A Sin Le

“Inkhawm leh hun chu ka va han be tawh dawn chiang e” tia ka inseh ruh na pawh ni ruk lai a lo liam leh ta der mai. Phur takin inkhawm turin ka insiam sawk sawk a, nidang aia hma fe chuan Biakin pawh chu ka thleng ta reng a ni. Tumah an lo la thlen loh avang chuan keimah in a tul ang ang Hla bu leh Bible te chu ka remkhawm a, ka theih ang tawka kohhran leh khawtlang a inhmang ve hram hram thin ka nia, vawiin pawh hi Mumbai Mizo Kohhran din champha vawi 27 na a nih vangin tih tur neuh neuh ka nei ve nual a, a hminga Zaipawl Conductor te ka lo nih ve vang in ka chetla vel chu min rawn hmu ve ngei se ka tihle mai. Pathianni hmasa zawk a ka hmuhdan te chu kan ngaihtuah let a, inkhawm ka kal tlai deuh avangin tlar hnung lamah thuthmun ka rem a, ka thu fel ta chiah tih velah ka zawn chiahah chuan he nula, mihring ten hmeltha an lo tih fo min hrilhfiah nana Siamtu in van atanga a rawn tirh ni mai awm hi a rawn thu thak mai a..! Kalpui a nei lova, thurualpui a nei na hek lo, ngawi reng chuan a rawn thu a, a tawngtai lai te chuan ka lo melh ngawih ngawih mai a.

A hmelthat dan hi keimahah chuan a thawk na ngang mai, cher lama aia sa tha lam hret, ngo vang mai, pian nalh zet mai leh a san lam 5.6 Ft vel a ni, a sam nung sarh mai te chu Fan te chuan an chhem phe siai siai bawk a. Zai hunah tha takin a zai a, thu ngaihthlak hunah tha takin a ngaithla leh a, Bible chang an chhiar lahin a Bible chu keu in an chhiar lai apiang te chu a lo en ve zel a, inkhawm pawh ka ngaihtuah hleithei meuh lo, “ E khai, hei ngei hi a ni dawn a nih hi ka kawppui tur chu, ka duhthusam zet mai Siamtuin min pe dawn ta anih hi le” tiin ka lo inngaihtuah lungawi ve em em a. Zai lai te chuan kan inmelh leh zeuh zel a, tlangval pumpa ka hit leh mup mup zel nia mawle. Vawikhat hmuhna mah nisela ka hmangaih nghal em em hian ka hria a, anih loh vek pawhin ka hmangaih teuh viau chuan ka ring. Inkhawm bana biak dan tur te chu ka ngaihtuah a, thui tak tak ka ngaituah thleng a, fa 3 vel kan neih thlenga kan awmdan tur te ka ngaituah pha hman vek nia ! Thil tam tak, min ngainat ve dan tur te, min duh ve dan tur te ruahman teuh chung chuan inkhawm chu ka tling tla ve ta hram a ni.

Le..!! Inkhawm kan bang ta, hun thawl tak hnuaiah ka inkawm thei dawn e tiin ka hlim ngang mai. Chutihlai tak chuan kan Kohhran Chairman chuan Committee nei lawk ang u a rawn ti chawpchilh ta mai si. Tui lo zet chuan ka thu ve ta ran a, kan thil rel reng engmah ka beng’an a lut mawlh lo, tawp vat vat se ka ti em em a, tawk fang kan neih hnu chuan kan titawp ve ta bawk a, a rang a rang chuan ka zuangchhuak nghal a, amaherawh chu ka tum angin ka awm thei ta tawp lo mai. Amah chauh chuan thingpui in hian a lo thu a, min rawn melh ralh ralh a, ka va pan hnai a, a bul ka thlen chuan hipna nasa lutuk in min dang bet ta tlat mai, ka va be pawp ngam ta tlat lo mai a nih chu, tichuan a vawikhatna atan chuan a bul vel chu ka hel kual ta ringawt mai a ni. A mak ka inti em em a, zak rual ka ni tawh lo asin le tiin ka inhrilh mawlh mawlh a, mak tak maiin a bul ka va thlen dawn khan sawi tur ka hual zawng zawng kha a bo vek a, huaisenna reng ka nei thei tlat lo mai. Chutiang chuan vawi thum vel lai biak ka tum chu ka thulh ringawt mai a, nep ther ther hi ka inti khawp a, chutih rualin he chakna/hipna tha (force) min dang bet tlattu hi mak pawh ka ti. Nidang chu nise sawi tur hre lo pawh ni ila ka ne ne kual thei awm tho sia, mahse tun tum zet chu sawifiah hleih theih loh thahrui hian min dang bet tlat a ni ber e. Hla deuh hlek atang chuan ka melh leh zeuh zeuh thin a, min melh ve dan atang ringawt pawh chuan min haw lem lo tih chu ka chiang khawp mai, bul han tan ngam phei ila chu a hlawhtlin a harsa lem lo khawp ang le, mahse chutiang ngawtin chakna ka nei hauh silo. Vanneihthlak takin ka thianpa nen an inbe lai chu ka hmu fuh hlauh mai a, Zaipawl hla zir te kan neih leh tak avangin Biakinah chuan ka luhsan a ngai ta si a, a haw tur nen chuan Biakin tukverh tang chuan kan inhmu leh hram a, min rawn nuih seih nghe nghe a ni. A hnu deuh chuan phur tak maiin ka thianpa chu tunge anih te chu ka zawt nghal a. A hming chu Msi a ni a, Mizoram House a awm, a nu cancer natna avanga inenkawl, rawn kalpui a lo ni a, Aizawl Venglai a awm, kar khat vel chu an lo cham tawh a, ka thian hnaivai tak pakhat cousin hi a lo ni nghe nghe awm e.  Chu thu ka hriat chuan haw leh mai tur an ni a, muangchang thei ka ni lo tih ka hre chiang em em a, “Pathianni leh chu ka va han be tawh chiang em ve aw” tiin ka rilru ka lo siam a nih kha.

Tichuan Pathianni a lo thlen leh chuan nghakhlel takin ka lo thlir reng a, inkhawm tan thleng pawh a la thlen loh avang chuan a rawn tlai deuh dawn aniang tiin ka inhnem a. Inkhawm lai pawh chuan ka ngaichang reng a, mahse a tawp thleng chuan hmuh tur a awm ta lem lova. Ka thianpa pawh chu ka zawt chiang duh hrih lem lo, rilru khingbai tak chuan engatinge ni ang aw ka ti nuap nuap a, an haw tawh nge a rawn inkhawm lo ve hrim hrim, nge a nu a zual ? zawhna chhiarsen loh a rawn lut zut zut a, nakina ka thianpa chu zawh chian atan ka khek ta rih a ni. Inkhawm ban tihtur awm tawh lemlo, rilru lo khawhar ve bawk nen chuan ka thiante kalna tur lam Colaba chu ka pan ve ta a. Bus in kan kala, Bus Conductor lah chuan dawt sawiah min puh tlat mai, mi pali chuan man pek ka tum chu paruk chuan man a la then mai a, ka zawh lah chuan paruk i tih kha a ti tlat pek a, khawlum – lungleng thinchhia nen chuan kan inkhawih lo chauh hial a ni. Tichuan Colaba chu kan thleng a, Bar lar tak mai Gokul ah min luhpui ve ta a, mi an lo tam khawp a, keimahni hmel ang pawh an lo awm ve nual a, thian ten in tur an han lam nak nak a, han sawi ve mai tur ka hriat loh avang chuan Pepsi chu ka lam ve ta ngawt a..! Hetia kan han thutfel meuh hi chuan dar 10:30pm a lo ri der tawh a. Ka riltam chuan chaw ei mai ka duh avangin midang chu ka eisan ta a, chaw ka ei tan chiah tih chuan le ka rilru chhungril luah ngut ngut tu, Msi chu a cousin nen chuan an rawn lut ve ta hlawl mai!

Ka hlim ngei mai, min en chik deuh chu awm phei se chuan ka hlim lutuk avanga ka vun rawng inthlak danglam te chu an hmu ve ngei ang. Siamtu pawh hi a va han tha tehreng em, ka duh zawng zawng min tihsak a tum a nih le, ka damchhungin ka fak tawh ang ti te in ngaihtuahna a rawn lut zut zut a. Ka hma zawnah chuan a cousin chu a rawn thu a, a ni pawh chu a bulah chuan a thu ve nghal a, a hmel chu ka en thin a, ka hlim em em mai a, Bar chhung, light eng mang lo hnuaiah te hlei hlei chuan a thazual emaw tih mai tur a ni. A tlai tawh angreng bawk a, ka haw na tur nen an kawng a in ang bawk nen, hmeichhia mahni chauh a haw chu a him lova, ka thlah pah thei dawn a nih hi tiin ka lo inngaihtuah ve a (a cousin hi hostel a awm, 11:30pm Deadline nei a ni a). Bar chhunga min rawn hmu thut chu a beisei lem lo tih hriat tak hian a phu chiang kher lehnghal a, mahse a hmelthatna leh duhawmna karah chuan thil diklo a awm tih ka hmu thei tlat mai. Enge ni ang aw tiin ka ngaihtuah a, a incheina chu lah chu a inhmeh em em lehnghal a, a nalh lutuk chu ka thikthu te a lo chhe ve ringawt in ka hria. Kawr pan te, a hnute mawizia lang thei ngei tur hi a ha a, kawrfual chhing tak, a mal bawr vel a lang thui lutuk em aw tih ang tur chu a inbel bawk a, Pathianni hmasa a incheina nen chuan a in ang ta hauh lo mai. A mit meng mawi tak chu dawidim tihbuai hriat tak hian a phelh sung bawk a. An chet dan velah chuan an unau chuan an rawn in nual tawh tih ka hre thei mai a, rei pawh an la thu lo tih chuan Whiskey chu an lam a, Glass pathum nen chuan, engatia glass pathum chhawp nge an nih chu ka ti rilru nuap nuap a, min thlit kep an tum ve amawnile aw te ka lo ti ve a.

A cousin nen chuan kan inbe bawrh bawrh a, naktukah a unaunu te chu Aizawlah an haw tawh dawn a, chumi thlah nan chuan Pub-ah an kal, an haw lam pang an rawn lut kawi ve mai hi a lo nia. Tichuan Msi chu biak ve tumin ka ka ang zuaih hman a, mahsela ka tawng chhuak hman lo hlauh. Bar-ah chuan vai cher sang zin zen te hi, a car chabi niawm tak rawn vai lauh lauh pah hian a rawn lut phei ve a, mi neinung tak an ni tih a hriat nghal mai a, kan thutna lam chu rawn pan pheiin chu ka nun tihlimtu, fate nu atan leh nu leh pa te Mo atana ka lo hual ruk ve reuh reuh bulah chuan a rawn thu ta that mai le..!! A rawn tlangnel hle mai, “ Whats Up Bro “ ? a rawn tih te chu hnek chawrh hi ka chak zawk a. Midang pawh chuan an eilo hlawm kher mai. Chutah Glass pathum chu Whiskey chuan an tikhat a, ka tellovin an pathum chuan an in ta zawk a. An in pah chuan Msi chu vaipa chuan a kuah heuh heuh reng a, a kuah fet tial tial bawk a, a hnu deuh phei chuan a hnute te chu khawihsak ta mai a! Vaipa vek chuan Msi khalh heuh heuh pah chuan, “ Cmmon baby, I don’t wanna drink anymore, lets go now “ hi a ti deuh chhen bawk a. A mal mum nalh tak mai te chu a zut chhohsak ta deuh deuh lehnghal a, Mizo awm ve te chu kan thinrim tlang hlawm hle a, kan insum tlang ni berin ka hria. Kan bul vela vai awm ve ho te mit pawh a kham ve hlawm hle chuan a lang. Eng rilru pu a hetia awm ta mai hi nge a nih chu ka hre bik lova, amaherawh chu Mizo te zingah tal chuan insum ve deuh se ka ti ve khawp a,  kar khat em pawh a la hmelhriat loh vaipa in a han khawih vela a tang eih lo hi a mak ka ti tawp bawk a ni. Tichuan an zu in lai pawh in zo ta lem lo chuan an inzui chhuak ta hna hna a. Ka thinrim lutuk hi thinrim ngaihna pawh ka hre lo. A cousin chu ka hau ve ta ringawt a, “Mahni unau te engatinge vai zuam leh khawih mai mai theih a i awm tir a” ? ka han ti a.  “ Naktuk an haw tawh dawn sia, enjoy a duh ve bawk si nen, i vai thian hausa deuh, min treat thei tu tur min lo zawnsak teh a ti tlat a, ka thianpa kha kan classmate ah chuan a fel deuh ber a, min treat thin a, North East ho chhass a lo nei nual tawh bawk a, ka sawm ve ta a nih kha” tiin min chhang ta then a, ka thinrim lutuk chuan insum hman lek lovin ka beng ta nghal thuai mai a, thian dang te chuan min rawn khap dai nghal vatin, amah pawh chu an hau nghal bawrh bawrh bawk a, kei erawh khap daih ve mai mai chi ni tawh hek lo, chu hmun atang chuan ka chhuak ta a, in ka thlen chuan thinrim leh rilru na inpawlh chuan ka mu meng ta kar mai a ni.

Mut hmunah chuan ka hmuh hmasak ber ni te chu ka han ngaihtuah let a, biak ka tum pawha ka biak theih tlat lohna chhan, chakna emaw hiptu emaw thahrui, min dang bet tlattu kha Pathian hnathawh a ni ang tih rinna ka nei ta a, khatia ka tum ang khan lo awm thei ta ila, Msi kha ka beisei ang a lo ni dawn lo nasa mai sia, ka rilru na tur leh hrehawmna tur mak tak maiin min lo lak kiansak ni zawkin ka hre ta a. Pathian min hmangaihna avang chuan thlamuang takin ka muhil thei ta a ni, ka mutthilh dawn chuan, “ A hmeltha reuh a sin mawle “, ka ti sap a.

Khami Dakar kha aw...!!

“ Lei ram ngaiin ka kir loving
  Krista-ah ka nung tawh vangin
  Kristaah chuan lungkham reng ka nei love”

        Prelims Exam tur chuan ka inbuatsaih mek a, music ngaithla pah a lehkha zir nuam timi ka nia, sitting room a ka unaute ri nuaih nuaih chu kalsanin ka room-ah he hla - Zoramchhani sak hi zawi te in ka ngaithla pah a. Zanlai dar khat vel a ri ta maw tih chuan ka phone chu a rawn ri ral ral a, number ringawt a nih avangin tunge ni ang aw tiin ka ngaihtuah a, ka tirilah erawh chuan ka khur der der a, hlauthawng ang reng tak chuan ka pick up ta a ni.

“ Hello, Bee-a a ni em aw ?
  Aw ni e , Enge ni ta ?
  I pa Hmaa ka nia
  E..teh daih te chuan enge ni ta ngai ?
‘Dar 12:50 khan i Pa chu a chatthla ta a ni e, A pawi khawp mai, inti pachang hram hram la, i nau te leh i nu te inhnemna tur awm chhun i nih kha, i nu pawh ka han be nghal a ange, chuan chhung khat hnaivai i hriat ang te i lo hrilh darh ve mai dawn nia aw’.

       Chutia kan inbiak zawh chuan phone chu a dah mai a, ka hamhaih lutuk chu ka awmdan pawh ka hre thiam lo, ka bing mup a, ka beng chu a chhet nghal vek a; ka nu Kolkata a awm mek chu ka ngaihtuahna ah a rawn lut hmasa ber a, engtinnge chu thihna rapthlak tak chu a lo dawnsawn anga, engtia nasa in nge a nghawng ang, a mangan dan tur leh hrilhhai dan tur te chu ka ngaihtuahnaah a rawn lut zung zung a. Chutah Aizawl ka haw hnuhnung bera ka Pa in Airport a min lo hmuahlai chu ka mitthlaah chiang takin  rawn lang zui nghal a. Taxi ah kan chuang a, hlim takin kan ti ti a. Ka pa chuan” Han ngaihtuah ve chhin la, hun kal chakzia hi, hmannni lawkah phaiah kan dah che emaw kan tia, hei kum khatna chu i lo zir zo ve leh der tawh mai chu a nia. Kar lovah i zirlai te i zo ve thuai mai dawn e, dam hi chuan hun hi a rei lo a sin tiraw,“ tia min thlahlel em em leh hlim taka a tawng ve bawrh bawrh lai mawlh chu ka mitthlaah chuan a lo lang a. Dan zawh rual loh chuan ka mittui chu a rawn tla ta zawih zawih a, ka dawhkan chu ka bawh thlawp a, “ Ka pa, ava la hun lo tak em ! Engtinnge  ka nu leh ka nau te hi ka enkawl tak ang, kei ngei pawh hi engkawl ngai ngawih ngawih ka la ni a sin le, a la hun lo em mai a, ka pa…”tiin  ka tap ta zawih zawih a ni. Chutih lai vek chuan ka nau chuan thingpui min pek tumin room-ah chuan a rawn lut a, chutia dawhkana lungchhe tak maia ka tap zawih zawih lai a rawn hmuh chuan a hrilhhai ngei mai ..!  “AU enge ni ta?” a rawn ti ruai a, ka chhang lo. “Aa pa a boral a mi ?” a rawn tih leh chuan “Aw” tih ringawtin ka lo chhang a. A  mangang a ni tih ka hriat chuan intih pachan ka tum hram hram a, “ Tunah Raipur (Chhattisgarh) ah a awm a, naktuk ah a ruang Aizawl lamah an phur ang “ tiin ka hrilh a. Room tanga  chuan chhuakin kan thian thenkhat te chu ava hrilh ve ta nghal a ni.

         Zan tairek nimahsela kan inbul hnaia awm ka thian te chu an lo thleng khawm tuk tuk a, chung te pawh chu ka ngaihsak thei lo, roomah chuan ka tawm tlat a, ka hma hun thim tak mai leh khawharthlak tak tur ngawt chu ka huphurh em em mai a ni. Ka han ngaihtuah thin a, Aizawl han haw na mai tur pawh kan nei dawn silo, ka pa ruang ka han hmulo tur chu ka ngai ngam bawk silo, tunah 2nd year ka zo dawn fel dawn chauh a, engtinnge ka zir chhunzawm tak ang. Tuna kan leiba neihsa ringawt pawh hi engting nge kan rulh ang, ka nu in hnathawh a nei bawk silo, ka nau te chhawr tlak an la awm bawk silo…tiin ka lungngai em em ringawt mai a ni. Chutia ka indawm kun lai chuan he hla ka lo ngaiththlak mek -

“ Lei ram ngaiin ka kir loving
  Krista-ah ka nung tawh vangin
  Kristaah chuan lungkham reng ka nei love”

        tih hi a lo in play nawn tlut tlut  a, a hla thu chuan nidang zawng aiin min hneh ta tlat mai, a thunawn lai mawlh hian min hneh a. “ E khai..! ka tia , ka inngaihtuah chiang ta a, inchhung atang chuan ka chhuak a, inchung reh raih mai leh dai dap mai, zan daifim in a chiah hnawng dap ah chuan ka thingthi a, Pathian ka au ta a. Ka mittui chuan ka taksa chu a bual huh vek titih tawh a, “Kristaah chuan ka nung tawh avangin Lei nun lungkham a inngaihtuah buai tur ka ni love, ni tin chaw eikhawp a min petu, vawiin ni thleng hei leh chen min enkawltu chuan ka chungah ro min relsak ang che, huaisenna leh chakna ka neih theih nan min pui zel  la, vawiin ni hian chak lovin lungngaiin rum mah ila, nang chuan engtikniah emaw chuan min hruai chhuak dawn tih ka hria e. Min tichak thar zel ang che,” tiin ka tawngtai ta a. Ka tawngtai zo chu thlamuanna nasa chuan min awmpui nghalin ka hria a, ka hma hun, mihring ngaihtuahnaah chuan beiseina eng pawh awm tawh lohna chu Amah nen paltlang tur chuan ka inleng te chu ka zuk chhawn ve ta a ni.

“ Ka pa, vawiin hi i nunna kal tlanga Pathianin chakna leh huaisenna min zirtir thar leh na ni champha vawi 5-na a lo ni leh ta reng mai. Vawiin ni hian ka ngai em che a , min la awmpui chu nila sawi tur kan ngah dawn teh reng nen aw… Hlim takin I kawr mawi tur, kekawr leh pheikhawk thar te ka lei ve tur che asin ..….

Ka nui ta seih a

Tukin zing ka tho chu ka chau deuh riau a, ka awm bawr te chu chum hrep ang mai hian a sil them thum a, ka hrawk te chu lungtum dawlh ang mai hian a hnawk tup bawk a. Thuthlengah ka thu then lauh lauh a, ka lung a leng em em a, ka mittui a rawn hnam fap fap a, dan zawh rualin lohvin ka mittui te chu ka vun chuar tawh tak, ka chhungte leh thenawm khawveng ten Tar vun an tih mai ah chuan a far kauh kauh a. Ka sam tuak var vo mai karah chuan thlanfim a dir zung zung bawk a. Vawiin hi Pathian khawngaihna avanga kum 80 ka tlin ni a ni. Engtiklai khan nge hetiang kum zah ka tlin hman hi ka hre bik lo. Ka ngaihtuahna te chu naupanlai rilru nen danglamna awm silo, amaherawh chu thahrui a lawi ka nei tawh lova, ka ding thei tawk chauh a ni si. Ka khaw hmuh a fiah tawh lova, chakna leh thatlai hun te chuan min thlahthlam ta, hmalam hunah beiseina ka nei ta lova, dam rei malsawmna tia kan Bible in min hrilh hi ka ngaihtuah nawn fo ta mai.

Ka piancham pha lawm tur chuan ka chhungkhat laina hnai te chu an rawn thleng khawm tap tap a. Ka fate hmelah chuan min lainatna leh hmangaihna ka hmu a, nakumah hetiang hun hi ka hmanpui leh thei angem tih chuan a mawlh hlawm niin ka hria. Ka tu duhawm tak tak te erawh chuan “aapu, aapu” tiin min lawm em em a, hlim takin lungkham nei lo tih hriat tak hian ka bul velah te chuan an rawn inbawrkhawm a. Ani, taksa chakna ka nei tawh lova, ka taksain natna a do theihna pawh a beitham ta hle, hritlang mai pawh nunna thap thak khawpa ka beih a ngai ta a, nakuma ka piancham han lawm leh chu thil beiseiawm tak a ni tawh lo hrim hrim a ni. Chutia ka tu leh fa te ka piancham lawma an rik hlut lai chuan kil khatah lunglen takin ka nunhlui te chhui letin ka lo inngaihtuah a, ka ngaihtuahnaah erawh chuan thil tam tak a rawn lut lem lo, tlem te chauh a ni.

Ka naupanlai ka han thlirkir a, nikhat thil thleng ang lekin ka ngaihtuah a, sikulah kan kal a, tlaiah thiante nen kan infiam ho leh a, chutiang hlir chu nimaiin ka hria. Amaherawh chu chhungte phal loh thil, card den ruk laite, meizial zuk ruk lai te leh sikul tlanbo lai vel te, lui a kal a tuichen ruk ang reng te chu a mal te te in, chiang takin ka ngaihtuah let thei thung a, ka lung an tilengin rilruah thianhlui te an rawn lang nghal a, khatia hlim tak leh hlauthawng tak chung sia panlai kan lo hmang te kha ngaihawm ka tiin vannei ka intilet ta zawk a.

Kan han rawlthar chhova, naupang thuawih tak niin sikul kal leh lehkhazir bak ngaihtuah ka nei ngai meuh lo. Han ngaihtuah let tur pawh ka lo nei awkawng lo mai, ka thatlai hun chu a liampuat mai hian ka hria a, chutihlai erawh chuan, retheih em avanga a tuk chaw eitur tak ngial pawh nei lova ka awm lai te, mittui tla zawih zawih a Pathian hnena eitur min pe tur a ka dil lai te erawh chiang takin ka mitthla thei a, khatih laia ka rinna nghehzia te chhuikirin tuna ka dinhmun te ka sit phah lek lek a ni. College kan kai tirh a, thiante chhan nan thih huam a vai ho ka lo sualpui ve zak zak laite chu nimin lawk a thil thleng ni maiin ka hria.

Ka thiantha leh chhungkhat te nia ka lo ngaih thin ten, itsikna avanga phuah chawp leh thutak phena dawt mawihnai tak hmanga min sawichhiatlai te chu ka ngaihtuah let a, “Aw, kan damchhung ni te hi a rei loh teh vei nen, engah chuan inngeih tlang taka kan awm mai mai thin loh ni..!!” tiin ka ngaihtuah vang vang bawk a.

Ka thingpui inlai chu ka lem leh khalh a, ka mit chu ka han khap leh hram a, chutih rual chuan ka nupui ka hmangaih em em mai, kum 50 lai mai ka lo chenpui tawh chu ka mitthlaah a rawn lang a, kum 50 lai nimahse a reilo ka ti hle mai, zan kan mu a, zing kan tho leh ang lek mai niin ka hria. Hlimtak leh hmalam hun thlira fate kan buaipui lai te chu nikhat lek ang mai niin ka hria a. Chutih rualin kan inngaihzawn tantirh lai, chhungte phallo chunga kan inhmuh ruk lai te, inthlahleh taka inneih hun tur kan thlir dun lai te, hmelma leng vel nuaih nuaih kara inhmangaih taka rinawmna hrui vuan dun a harsatna leh hlimna kan paltlang lai chu chiang tak maiin ka mitthlain ka hmu bawk a, ka ngaihtuahna a kal ding bawk aniang, ka lungphu chu a rang ta sawt hian ka hre nghe nghe a ni.

Ka rilruah thildang daih, he thu lar tak mai hi a rawn lut a,“A life spent making mistakes is not only more honorable, but more useful than a life spent doing nothing” tih hi, a dik viau pawhin ka hria. Ka nun pumpui ka han thlir let a, nun pangai leh nitin nunphung ka lo zawh thin te chuan lungawina min pe lova, mi tih bak piah lam ka lo tih ve te, huaisen taka ka tana that zawkna a nih beisei a dan pel thak a risk ka lo lak ve naah te khan inchhirna ka nei hauh lo mai. Inchhir chu sawi loh mi tilunglengtu leh chiang taka ka ngaihtuah let theih te an ni zawk tlat si a ni. Chhungte phalloh kan lo tihruk ve te chu min tihlimtu leh ka thinlung ruak hnawhkhattu an lo ni ve zel bawk nen. Mihausa fa ni ila, nunphung pangai tak zawhin, harsatna leh lungaihna te tawk mang ngailo ni ta ila, ka nunah hian ngaihtuah let tur leh hriatreng tur ka nei kher a ngem tiin ka inzawt let a, a hunlai a hrehawm mittui tla zawih zawih a kan lo tuar ve te kha lung min lentu ber an chang ta hi a mak ka ti letling zawk hle a ni.

Ka thingpui inlai harsa titaka lem leh khalh pah chuan ka mit chu ka han chhing diar diar a, han men leh mai ka tum chu ka mit chu a inchar ta tlat mai..!! kum 7 lai liam hnua min boralsan ta ka nupui, ka hmangaih leh ngaih em em chuan ral khat atang hian min rawn ko tlat hian ka hria a, “Leia I thawhrimna te chawlhsan la, tlansa te zingah hian rawn tel ve tawh ta che” tih ri chu ka beng nilo ka hriatna chuan chiang takin a ngaithla a. Chuveleh hlimna sawisen loh chuan ka taksa leh thlarau chu luah lum nghalin, hlimna leh lawmna nasa lutukin min chenhilh avanga nui seih pah chuan min kotu aw lam chu ka pan ta a ni.

Ka thingpuino kenlai chu a tla keh darh chuaih a, ka fanu duat em em maiin mangang, thlaphang leh aw ring taka, “ U Mama, lo tlan thuai teh, ka Pa awmdan hi a dik lo a nia” a tih chu he leia ka thu hriat hnuhnung ber a ni ta a ni.