KA HAW VE TA.....

A kum anga chhiar chuan kum sawmna a lo ni ve ta der mai, Krismas hlim leh thlamuang taka Zawlkhawpui ngeiah, chhungte leh thiante nena ka hman hnuhnun ber tum kha. Khami tum khan Urlawk zan hman chhuah ve ngei ka tum ruh hle mai a, In ka chhuahsan chiah tihin ka Putea boral thuin min rawn nang ching a, tum loh leh beisei loh deuh maiin, khawtlang tibuai em em in hun ka hmang ta zawk anih kha.

Khang hun te kha ka han ngaihtuah let a, thangkhat lian teh meuh mai mahni In lumah pawh Masi hmang thei lova awm hnuah hunpui ka han hmang leh thei tur chu ka phurin ka hlim ru ve viau a ni. Tluang takin ka kal dawn emaw tihlaiin kan thlawhna a thlawh chhuah theih leh dawn loh thu ka han hre chawpchilh leh a, ticket lak tur awm mai tawh bawk silo nen rilru in ar bo a zawng rum rum ta mai. Chhungte ka han be rawn a, haw ve ngei tura nawrna a nasa ang reng sia, nei leh nei lovin Mumbai – Kolkata – Guwahati – Silchar – Kolasib – Aizawl kaltlang vekin kan haw teh reng anih kha..!! chauh a na duh ngei mai J 22^nd December a thlen hman inbeisei kha 24^th December-ah ka thleng ta hram a ni.

Aizawl khawpui pawh a lo thar ta ut mai, thil tam tak inthlak karah ka rilru luah em em tu pali chauh ka'n zep ve lawk teh ang, thil tul tak phei chu a ni lem lo na a.

1)     Zu kan lawm hle :- Mi nawlpuiin zu kan lawmin kan ngai pawimawh hle mai. Zu in ten an heh em em a, an hmuh theih apiang an in tih mai tur a ni, chutihlaiin Zu in lo te pawhin an haw em em a, a do em em deuh vek bawk mai, duty te insiamin zu rui leh zu zuar an vai a ni ber e. Mizo mipui te hian zu hi kan atchilhin kan ngaisang ni berin ka hria, heti em em hian dah pawimawh lo ta ila chuan kan hun leh tha tam tak kan seng thlawn hauh lovang le.

2)     Incheina : Thalai te mai nilo, nu leh pa thlengin inchei kan uar hle. Kan thawhchhuah mila inchei kan thiam lo hle niin alang. Kawng leh lamah chuan kan nalhpui viau pawh a ni thei, mahse hei hi a dik berin a lang lo tlat, thawhchhuah neilo chu sawi loh, nu leh pa thawhchhuah pawhin a daih dawn lo tih hriat reng reng a nalh leh mawi a inchei kan zak tlat lo mai. Hnam dang thian ten min rawn hmu riau riau ang tih te pawh a hlauhawm dawn a lawm le.

3)  Charity/Tanpuina : Mi chanchhia leh neilo zawk te hnena tanpuina emaw thil thlawn pek emaw kan uar khawp mai. Mimal/Chhungkua emaw Fahrah enkawlna hmunah te sum fai leh thil pek hrang hrang te hmangin, Krismas rualawt bik lutuk a an hman loh nan tanpuina kan hlan kual nasa hle a. Pathian Engkimtitheia hian thil pek hrang hrang petu pawh nasa takin malsawmna a vur let ngei ka beisei. Amaherawh chu ngun leh zualin ngaihtuah ta ila, hei hi thil dik ber a ni angem le?

Heng thil thlawn pek avang hian tam tak kan tipangchang zo ni berin alang, a neilo zawk te thinlungah rualawhna nasa zawk a siam chawp a, thilpek dawn beiseina te, chantawk a lungawilohna te pawh a siam thei dawnin ka hria. Heng ai chuan Krismas awm chhan leh tum ber hi inzirtir nasa zawk ila, thuamhnaw thar leh thil thar dang neih kher hi Krismas awm chhan a ni lo, a nei zawk te pawh hian Krismas a thil thar neih loh te hi intihhmuh ta zawk ila a tha viau lo’ng maw. Hetiang reng anih chuan dawng awm tak tak kan hriat fuh siloh te tahna nasa zawk kan siam mai mai dawn alawm le. Krismas a lo thlen a thil thar neih kher tumna rilru hi paihthla thei tura inzirtir hi a finthlak viau zawkin ka lo hre ve a, chu chu a mi nawlpui hian bul kan tan thei reng sia, a neilo zawk te rualawh loh nan Krismas a thil thar neih kher loh hi tum tlang thei ila tha ka ti khawp mai.

4)     An tlan chak mah mah :- Krismas leh Kumthar bawr vel anih vang nge ni a bikin lirthei ke hnih neiho an tlanchak thin hle mai. Fimkhur taka lirthei khalh tan pawh a hlauhawm thova, ke a kal tan a hlauhawm em em bawk. Changkanna a kan ngai anih chuan a fuh lo viauin a rinawm.

Awle, thil dang tam tak tha tak tak pawh sawi tur awm nual mahse heng te hi phunchiar nih hlawh huamin ka han thailang ve mai mai ni teh se.

Reiek ka tlawh ve ta…..

Reiek hi kal ka tumna a rei tawh khawp mai, a tawp a tawpah chuan ka thleng ve ta ngei e, nghah chhuah man a awm khawp mai, kan kalpuite pawh duhthusam zan an ni e.

Reiek tlang chhipah thianzahoin kan chaw fun te kan thet darh a, kan kilho ngei bawk a, ka nuin thawh hlim atanga ka chaw pai tur min buaipuisak kha a ni bawk a, ka puar bik ngei mai, thianpa Mawi Mawia erawh sap rim a kai deuh bawk nen chhangthawp a rawn keng a, a hit viau lo tlat, kan chaw pai te a melh tai nasa ta mai sia tlem kan han tem tir ve tak kha. 

Hotel Regency-ah chuan....

An sawi lar deuh kha chu tlawh ve vek mai kha ka duh a, chung zinga an sawi zin pawl tak chu Hotel Regency hi a ni awm e. 30.12.2013 khan zanriah ei turin thian hovin kan thawk chhuak ve nasa mai a, an service a felfaiin a hmun len luh a lo rem bawk a, inchhirawm lo tak a ni. Min lo buaipuitu hmeichhe fel tak "Z" tih a hming intan kha pasal nei tawh tak maw??  Thianpa Saaka lah khan a sawi zui nasa mai sia.. :) NOI 

                     

                                       

Grand Reunion........

Tam tak chu kum sawm dawn lai inhmu tawh lo te kan ni hlawm, Sikul kan kal ho lai te kha chuan tleirawl hre tan tir mai kan ni. Ka haw chak chhan ber pakhat pawh a ni awm e. Synod Higher Secondary School - Science, kan batch ho kan inhmukhawm chu kan hlim tlang teh e. Sikul kan kal ho lai ang ngawt kha chu a ni ta lo, Officer lian tak tak, Zirna lama sang tak tak te, chhungpuinu/chhungpuipa lo ni ta te, veng chhungah, kohhran leh khawtlang hruaitu te an lo ni fur tawh mai. Engpawhnise eng nge kan nih tih lam ngaihtuah lova naupangchhia ang maia kan inkawm leh nghal bawrh bawrh thei kha tifamkimtu leh tinuamtu ber a ni. 

Night Out.....

Haw hun nen a innang kher bawk a zan len chhuah pawh a nuam khawp mai. Boruak vawt vuk mai, mipui inpel suau suau leh lirthei tlan vuk vuk te kha lung tilengtu an ni ta zel mai. Veng tam tak ten an kawtthler an chei a, len vel a nuam a, thalai te mai nilo nu leh pa, naupang thleng pawhin Krismas tihlutu an ni ta zel mai. Vai ho pawhin Milem pathian lawmnan an theihtawp an chhuah a, keini Pathian nung betu te phei uar takin kan veng leh kawtthler te hi kan chei tur a ni reng a ni. 

Young, Wild & Free.....

Pathian hian kan hlim hi a phal a ni. Thlasik meilum ai pahin, titi suam suam paha nula coffee lum intluka hlu hi a tam viau lo mai thei a ni. Heng te hi a hmanlai/ thing ti kan awm anih chuan kei zawng damchhunga "thin" ka thlang hial awm e. 

" Never underestimate the power of human stupidity" an lo tih te hi a awmzia tak kan hrethiam pha ve kher lo mai thei, engpawh chu lo nise, a tak mai leh huat nei lem lova damchhung hun hman hi a lo va nuam em..!

Zanlawn lam chow....

Mizopa kaah chuan a tui ber mai lo'ng maw. Zanlawn khaw chow, sa tui chawm, tawtani nen han pawlh nghek mai ila... rilram theihnghilh thak khawpin han lim nghek mai bawk ila, lung hi a awi hliah hliah mai a ni.

ADIOS, AU REVOIR, GOOD BYE, MANGTHA

Vawikhat chu kan naupan lai hian Chawngzawng hi ka man a, ka khawi thin a, bawmah ka khung a, a thlawh bo palh loh nan a keah lazaiin ka thlung bet tlat thin. Ka duat em em a, nitin chaw leh tui ka pe a, ramah te kalin a chaw tur khaukhuap leh rannung dang te ka zawng thin a, min tihlim em em a, theihtawpin atan pawh hun leh tha ka hmang ve thin a ni. Mahse tuk khat chaw ka pe tur chu a ke lazaia ka tawnna thi hnuang mai chu ka zuk hmu fuh hlauh mai, a dam lo tih hriat tak hian a ngui lup bawk a, chu a bawm atang chuan thlawh chhuah tumin nasa takin a lo bei a, hliam te hial a tawrh phah a lo a ni. Tichuan ka inngaihtuah chiang a, “he chawngzawng hi duhin min tihlim em em thin a, amaherawh chu anni chuan engtiklai mahin atana ka thil tih te, ka inpekna chu a hrethiam ngai dawn lo anih hi, ani tan chuan boruaka a chawngzawng pui te zinga awm tluka hlimna hmun a awm ngai dawn lo a ni”, tiin ka ngaituah a. Tu zawk mah dem tur kan awm lova, ka duhsakna leh hmangaihna a chhan let loh avangin Chawngzawng hi ka dem thei lova, Chawngzawng pawh hian bawma ka khawia, min tihhlim em avang hian min dem thei chuang bik ka ring lo. A pawimawh ta ber chu inhriatthiam tawnna kan neih loh vang a ni ta a ni, mahni hmasialna avanga  Chawngzawng ka lo khung beh reng hi a tha ber lova, ka thil ngainat em em chu a hlimna ka siamsak zawk tur a ni tiin ka rilru ka siam fel a. A bawm chu ka hawng a, a thlunna lazai te chu ka phelhsak a, tichuan ui tak leh ngai tak chung chuan ‘ Ka Chawngzawngte, mangtha mai le” tiin boruakah ka vawr kang ta a, a thlawk bo mai dawn amaw ka tih lai chuan ama bawmah chuan a rawn thlawk lut leh ta reuh a, a bawm kil tin ena a hawikual vel hnu chuan a thlawk chhuak a, hlim tak leh nuam ti takin a chawngzawng pui te hnenah chuan min thlawh liamsan ta a ni.

Awle, engvangin nge Mangtha tih ka sawi thin le? Saptawnga Good Bye, Good Night tih hi keini chuan Mangtha tiin kan sawi mai thin. Mangtha kan tih mai pakhat zawk hi chu kan thian te emaw kan chhung te emaw, ka hriat ngai lem loh te leh la hmuh ngai miah loh te pawh zanah tui takin mu sela, a tukah dam taka tho leh tura duhsakna kan hlanna tawngkam a ni. Tin, khawi ilo han inhmuhkhawm vela inthen hran dawn tein Mangtha kan ti liam mai thin bawk a. A hmang pawh kan hmang nasain Mangtha tha chi leh hman nuam zawk tak pawh a ni awm e.

Mangtha dang zawk, sap hoina Good-bye an tih nena inzul thuak erawh hi chu kan hman dan a dang zar mai. Mi naran hnenah kan sawi lem love, hmelhriat loh hnenah kan chham chhuak chamchi nahek lo. A tlangpuiin he thu kan sawi hi chuan kan sawina a te nen inhmu leh ngai tawh lo turin emaw thinlunga inzawmna tichat hlen tawh turin emaw kan sawi thin. Kan chhungkaw zingah emaw kan laina hnai ten min boralsan changte pawhin an ruang chungah te, an thlanah te emaw anmahni kan ngai a, hmuh leh kan chak a, beiseina erawh a awmtawh lo tih hriain “Mangtha Aw” kan ti chuai raih thin a nih hi.

Chutiang bawk chuan inngaihzawnna te, nupa karah thleng pawh a ni ang, rilru leh thinlung hmunkhat pu thin khan engemaw vangin emaw “Mangtha” an tih chang a awm thin. Mi pahnih emaw ten hlim tak, lungrual tak leh hmangaih taka hun engemaw chen an lo hman chu a tawp dawn ta tih entirnan “ Mangtha Mai le” tih hi kan lo hmang thin a ni.

“Mangtha” tih hian kan hmanna azirin awmzia a nei thui thei khawp mai. A chang chuan mahni nawmna leh hlimna thlakhlelh luat tuk vangin “Mangtha” tih ngam loh chang pawh ka nei fo thin. A chang erawhin harsatna te ka pehhel duh avangin”Mangtha” kan tithuai mai bawk thin a. A pawimawh berah chuan eng thil pawh ni rawh se, mahni lam chauh en lovin, kan awmdan in rah tha  a chhuah em tih thlir ila, pakhat chauh hlimna emaw nawmna mai a lo nih chuan; ui tak chung leh thlahlel tak chung pawhin “ Mangtha mai le” kan tih ngam a ngai thin a ni.

VAIRAM POLICE DAWR ZET ZAWNG

Hmanni chu hna thil avangin Commissioner of Police hnen atangin Character Certificate lak a ngai ve tlat mai a,  kum 5 chhunga kan awmna hmun atanga dil chhuah tur an tih miau avangin Mumbai atanga lak chhuah a ngai a,  chutiang a nih tak si chuan peih loh leh huphurh fe chuan ka awmna atanga Police Station hnai ber a ka hriat chu  ka pan ve hnak hnak a.


A NI KHATNA CHU: Hetiang Certificate vel hi chu local police station-ah a tihfel mai theih khan ka lo hre thawi ve a, zing karah thovin local police chu ka va dawr a, mahse anni chuan hetah ni lovin Commissioner Office – CST  (40 kms) ah daih kal a ngaih thu min hrilh a, tichuan ka pan phei nghal ta vat a.  Chutia Police Office ka va thleng phei chu Mizoram Police Office te ai chuan a buaichuar fe chu ka ring tho a, mahse ka lo rindan mai mai ang a ni lo tawp mai, form thehluh zawha Office kal tlang nghal mai tum kha ka ni a, a teuh hian a hnai lo, Form la chhuak tur ringawt pawh chuan a tlep hian an lo tlep tuarh ta mai a, rilru te te in vairam nge nge kan in daihzai teh e ka ti niap niap a, chutia nileng pawhin form ka lachhuak ve hman angem tih zawhna a lo awm takah chuan a tuk lama tha thara bei leh tur chuan ka kiansan ta hrih a ni.

 
A NI HNIHNA CHU: Hma takah ka thova, form lachhuak ve hman ngei tur chuan chawlh la meuhin ka insangphek a. Ka hma ve thawkhat viau chuan ka hria a, amaherawh chu line chu a thui ngaih ngaih khawp mai. Tawk fang ka  nghah hnu chuan chawhnu thlangher rawih a lo ni hman der a. Ka hmaah mi panga vel chiah an awm tawh tih chuan nula chhe lo zet mai pakhat hi a rawn vei thauh thauh a. Intichhelo zet chuan Indigo Pilot ka nia, form ka  la duh a rawn ti hmawk hmawk a, amaherawh chuan a thawk ho te khan an lo ngai thutak hran lo khawp mai, an lo ngai pawimawh lo lutuk kha ka nuih a za lutuk zawk a, tawng lem lovin line na tur chu an kawhhmuh satliah ve  tawp a, kha nu kha a lungawi lutuk lo chuan ka hria. Tichuan ka thleng ve ta, ka thil duh te ka han hrilh chuan, “E he! nang chu hetah rawn kal tur a ni hleinem, in veng local police station-ah in report tur a lawm” min ti ta heu mai le, nilengin patling a pumpa ka lo in-line ve a, ka lungawi bik lo kher mai. “Local Police station atangin heta kal turin min ti sia” tiin ka chhang a, eng teh vak phei chu ka sawi kaw chuang lo, address dang daih hi min pe a, “ hetah hian va kal rawh” min ti liam puat bawk a.

A NI THUMNA CHU: An address min pek chu hmun dang daih, ka kalna hmasa ni lo kha a ni a. Tichuan chu hmun chu ka pan phei leh ta a ni. A hmun ka thlen chuan mi hmuh tur min han hrilh zung zung a, a fuh tawh pawh ka ring khawp a. Ka hmuh duh pa chu ka va hmu ta a, a ni chuan “hetah a nilo, Commissioner Office ah kal tur  zawk” a lo ti leh ta mai! Ka thin a rim ve deuh tawh bawk nen, ka ang deuh buan buan hial a, mahse awmzia  erawh a nei nasa chuang lo. Muangchang chuan Form pakhat min pe a, “hei hi fill up la, Commissioner Office a – J  branch ah kal ang che, J-branch a i kal loh chuan tumahin an hre lovang” a tih leh takah chuan a ngai te bawkin chu Police Office chu ka chhuahsan leh ta a ni.

 
A NI LINA CHU : Peih lo leh ning em em chuan Commissioner Office bawk chu ka pan leh ta hnu hnu a. Police Stationah chuan mi chi hrang hrang hi ka hmu zut a, a then sual hmel em em te, a then movie leh Serial Film a lo  chang te pawh an awm nawk bawk a, vun var leh vun ngo te, kan hmel ang deuh deuh te thleng chuan an lo phu suau suau bawk a. Tichuan J Branch chu ka va zawng tan ta a, mi pawh chu an kawhhmuh tha peih lo, saw tah saw tah tih hlir chuan ka tei kual ka tei kual a, ka zawng nasa lutuk chu thlan tui nen khawlum nen chuan ka chau  hnak tawh a, engtin tin emaw a hnu fe chuan ka va zawng hmu hram a, “ tun tum zet chu ka thehlut ve tawh ngei dawn e “ ka tia, ka phur ve tawh hle. Form chu an han en vang vang a, “hei chu kan chan a ni lo, M Branch ah va kal rawh” min ti leh ta reuh a, tah hi a chhuak tawp tawh zawk. M Branch chu ka va zawng leh fe a, a tawpah  chuan ka va hmu leh mial a, hmanhmawh takin ka lut a, form chu ka pe leh a, a titupa ber ni awm tak chuan “Vawiin chuan ka hman tawh lo, naktuk ah i rawn kal leh dawn nia ” min ti leh ta mai! Ka thinrim tawh lutuk chu min tirh kual nasat tawh zia te chu ka han sawi va phiar phiar a. A inthlahrung ve deuh te pawh a niang, ka form  ken lai chu a han bih zuaih a, “I form rawn ken hi a dik lo, counter a mi in-line teuhna ah khuan zuk la, form va lachhuak ve rawh” min han ti leh a ni chu(h)..!! A sawi pawh ka sawi peih tawh lo, a nih nih ni mai ang hmiang ka  tia, lakchhuah leh pawh tum tawh chuang lo chuan ka haw ta nal nal a.

KAR HNIH HNUAH CHUAN: Kar hnih vel a liam hun chuan rilru pawh a hah leh tawh hle, Police Station ah ka kal peih tawh silo, ka mangang rilru ve tawh hle mai a. Mahse nikhat chu Police Officer pakhat hi kan Office ah a rawn  lenglut hlauh mai. A body guard niawm tak mi pali vel hian an rawn tawiawm bawk a. Theih ang tawk chuan ka lo buaipui ve a, a lawm pawh a lawm ve viau chuan ka hria, tawngkam tha in “mamawh i neih chuan min rawn  contact thin dawn nia” a tih takah chuan remchanna ka lo la ve thuai a, “Certificate lakchhuah ka tum a, a  buaithlak lutuk a” kan ti dek dek chu, “naktuk ah rawn kal rawh, engkim kan tifel dawn nia, keimah hi Incharge  ka nia lawm “ a ti ta reuh a, ka lawm ngei mai.

 

A TAWPAH CHUAN : A tawngkam tha umin a tuk chuan Commissioner Police Office chu ka kal thuai a, amah chu a lo awm lova, ka han phone nghal a, minute 2 emaw lek turah hian mi 3 vel hian min rawn zawng a, an mi zawn ka  nih leh nih loh te min zawt a, ka lo nih ngei siah chuan tha em em in min bia a, Canteenah min hruai a, thingpui te min intir a. Ka thil ei lai chuan anni chuan form te chu an lo lachhuak vek a, ka details tlem min zawt a, form  pawh an fill-up vek a, ka sign zuaih tih bakah chuan buaina ka nei ta lo. Minute 10 pawh a tling lovang tih chuan Receipt pakhat hi min rawn pe a, ni 15 hnuah certificate a lakchhuah theih thu min hrilh nghal var bawk a. Hmel  hriat neih leh neih loh chuan kawngro a lo su ngei a nih tih ka hre ve ta a ni.

KEIMAH VANG LEK

Hunte an liam zel a, Mumbaia kum a kum awm ta chu eng eng emaw han tawn changte pawh a awm ve thin. 24th March 2013 (Sunday) inkhawm bana thil thleng pawh kha hriatreng tlak a ni vein ka hria a, chanchin kim chang zawk chu thianpa Kima’n a blog mizohican.blogspot.in-ah thiam takin a ziak tawh a, tin, chanchinbu hrang hrang India Times, Mumbai Boss ,Indian Express, Mid Day, First Post, DNA, Hindustan Times leh chanchinbu dang dangah te an lo chhuah chei chuaih tawh bawk a, hetah erawh hi chuan keimah lam atangin ka hmuh dan ka’n thlir ve mai mai teh ang.


24th May chu Pathian ni a nih angin kan Biak In – All Saint Church-ah chuan Mizote pawh kan fuankhawm leh a, thiante Pathian thusawi tha tak tak kan ngaihthla a, inkhawm banah pawh chuan a ngai tein Nimbu paani dawrah kan bawr leh laih a ni. Mizoram House lama inkhawm tura phei leh nghal a ngaih avangin Colaba lama chaw ei hmasak chu tha kan ti a, Colaba lam pan tur chuan Taxi kan la ta a ni. Kan Taxi lak tur chu kawng lai takah a ding ta ran mai a, chutihlai tak chuan Phone Call ka lo dawng ve chiah a, ka thian dangte zawng Taxi-ah an lut vek tawh a, keimah chauh chu min lo nghak tawh chu niin, Motor Horn a ri tuarh tuarh a, kan hnung chiaha Police Van motor horn ri pawh a ring hle mai, chutia kawng laia kan ding ta chu min ning ve hle a ni ta ve ang, Police Van a chuang pakhat chuan nidang a lo tih dan thin tho ni ngeia ka rin chuan keiniho leh Mizo dang la awmte chu min au/chhaih ta vel a nih kha.


Heng thil zawng zawng hi mitkhapkar tak meuh meuha thleng a ni a, 1 minute pawh a ni kher awm love, Taxi chhunga ka luh ruala Nepali tih vela a rawn au nak nak kha chu ka hre pha vuaih vuaih a, kei lah hetiang lama ngaihsam ang reng tak hian huat enah pawh ka lo en lem lova, Phai ram kan awm tirh te chuan haw ve viau thin mah ila, a khat tawka hriat reng hi chuan ngaiah ka lo nei hman tawh a, eng teh huah ka lo ngai lem tawh lo a ni ber e. Chutih rual vek chuan thianpa Kima’n thiam tak leh huaisen tak maia Mizo mai nilo, North East mite leh Mumbai Police-te inhriatpawh/intlawhpawh tawn leh zual theihna hun remchang atan a lo hmang thei kha chu a thain a fakawm ve ngawt chuan ka hria.


Chu thu kal zelah chuan 26/11 Hero (Mumbai Terrorist Attack) leh Joint Commissioner of Police , Law & Order, Mumbai ni bawk – Mr Sadanand Date te meuh pawh ka hmuh ve phah ta hial mai! Tichuan Kima kaihhruainain 08th April (Monday) khan Commissioner of Police Office - Mumbaiah chuan kei leh ka thiante pathum - Tv Maruata, Tv Kima leh Nl Baby te chu kan va thu ve ruau mai a. Inkawmna hun tha tak kan va nei thei a, North East mi te nen inpawhna tha zawk neih theih dan turte kan sawi a. Chubakah mahni chanchin thenkhat te sawiin, Date-a pawh hian 26/11 inkahna vela a thil tawn pui tak takte a sawi ve bawk a, a lu a (a mit zawn) silaimu leng vel avanga thil kehthem la tan reng thute pawh tui takin a sawi ve nghe nghe a ni. Thingpui tui tak leh a hmeh tuihnai tak min hlui chu kan ei hova, hun leh tha leh zangkhai tak hnuaiah kan inkawmna hun chu kan titawp ta a  ni.

Hman lo leh buai chung chunga kal kan ni hlawm bawk a, zanriah tui tak chu phu kan intitlang a ni ang chu; ngun taka rei fe kan ngaihtuah hnuin amah Kima bawk chuan Kofuku - Japanese Restaurant thar a hriat thu a sawi zauh pek a, chumi hmun ngei chu panin - zan thiang reh leh thla eng set hnuaiah chuan Worli Sea Link tlan pel ngei chung leh Vanlalsailova hla ngaithla raih raih pah chuan Bandra chu kan pan ta vang vang a ni.

A hmun kan thleng chu kan besei aiin a lo nuam hle mai, ei leh in pawh Mumbai khawpuiah hian a aia tui hmuh tur a vang viau in ka ring. Sushi platter - Tuna, Salmon, Octopus, Hamachi Temaki rawn intlar tuar chu a hmel a mawi ngei mai. He hmunah hian Mizo ngei Chef a lo awm hlauh mai bawk a, a ni zarah hian Ice Cream tui dang dai tak mai - Champagne Ice Cream kan ei nghe nghe bawk a ni. Tin, zankhuaa min hruaitu leh pawisa phawrh ve phallotu Tv Maruata chungah lawmthu awm mawlh bawk teh se. 

Heng zawng zawngte hi ka han ngaihtuah let a, Taxi-ah khan lo chuang ve nghal mai ila chu hetiang tiang hi kan thleng awm tawp silova, a bul tantu leh chhan bulpui chu keimah ngei ka lo ni tih ka hrechhuak leh hnuhnawh a, rah tha a chhuah leh chhuah loh chu thu hran nise, hun tha leh nuam tak erawh ka hman phah tih erawh ka chiang thung :)

Mumbai Mizoram House Thar Thunawi

A kum a kum tel Mumbaia han awm ve takah chuan Mumbai Mizoram House pahnih lungphum phumna hunah ka tel ve ta der mai. A hmasa zawk kha kan awm tirh te a ni a, a lawmawm zia ka hrethiam lutuk lo. Amaherawh chu tunah chuan Mizoram House lo pawimawh zia leh a bikin damlo te tan malsawmna a nih zia kan hrethiam chho ve zel a, tuna Vashi Sector 30A, Navi Mumbai a an sa leh tur pawh hi a mimal ang tak pawhin a lawmawm hle in ka hria.

01st March 2013 chu Zirtawp ni a ni a, zing atangin Office ban hma ngei tumin theihtawp ka chhuah nghal a. Dar 1:30 pm vel atangin U Maruata (Asst. General Manager - Exim Bank) chuan min rawn tur tan a, hmanhmawh bak lengin chaw ka ei sawk sawk a, tan hun tura an ruat dar 4pm chu tlai hauh lo turin office chu dar 2:15pm velah ka chhuahsan ta a. CST station-ah chuan U Maruata chuan min lo nghak vang tawh a, U Malsawma (IRS – Income Tax) erawh leihnuai kawng an siamah a lo bo deuh a ni awm a, a rawn tlai hret a. Dar 2:30pm ah chiah chuan Vashi – Mizoram House thar tur lam panin Train ah chuan kan zuang lut ta a ni.

Chawhnu dar 3:30 ah a hmun kan thleng phei a, a kal tur awm ang chu an lo thleng deuh vek tawh mai a; kan khuallian tur te tih mai loh chu, ei leh in, sound system, usher, security guard etc engkim mai an lo peihfel vek tawh a ni. Tichuan khuallian leh Mizoram Chief Minister ni mek Pu Lal Thanhawla leh a team te chu kan nghak ta tlek tlek mai a ni. Dar 4 a tan tur a nia, buai tak leh hmanhmawh takin tan huna thlen ngei kan tum tih vel te chu an ngaihtuah vak lo a ni chek ang chu, darkar 1 leh 15 minutes hnuah a rawn thleng hram mai, kan ril a tam tawh bawk si, a tam zawk chaw ei lova kal te an ni a, thenkhat theih leh thei lova damlo/cancer chung chung a kal te an ni hlawm bawk nen, a zia lo viau chuan ka hria. Chief Minister a rawn thlen meuh chuan program pawh a nih dan tur ang takin a kal zung zung a, fel fai takin darkar khat leh a chanve vel chhung lekin kan zo fel hman der a ni. Mizoramah awm ta ila biak pawh kan biak phak meuh loh tur kan zaithiam lar te nen inpawh takin kan inkawm thei te kha keia tan a hlu viau mai, chung zawng ai chuan Mizo mipui te mamawh tak mai, Mizoram House kan nei thei tur erawh duhthu sam chiah lo mahsela ka lawm ve em em a ni.

Hemi ni a thil thleng mak ka tih thenkhat te :-

1.    Kan ram hruaitu ber mai leh mi te entawn ber darkar 1 leh 15 minutes lai mai a rawn tlai a, a rawn tlai chhan pawh sawi miah lo leh hriatthiamna dil miah lova, a nih dan tur ve reng anga ngai a a kal larh larh kha a mak ka lo ti khawp a, mipui te min zah lo nge a nachang a hre lo, nge Chief Minister lal dan ka hrethiam lo zawk ka ti mai mai. 

 
2.   Mumbai Mizoram House kan neih mek hi a lian lem lo, Mizoram Chief Minister meuh rawn zin chuan a rawn tlawh ve kan beisei hle, mahse a rim a ra pawh kan hre ta lo.

3.    Ribbon vel a chep chat anga, tawngtaina nen Mizoram House lungphum a hawng ang chu ka lo tih lai a, Vai style a che ta zawk kha mak ka ti hle bawk.

4.    Vai style-a kan kal dawn law law a nih chuan engatinge  Rosy leh TBC khan Pathian hla an sak le?? Diya, Tika, Pathian Fakna hla leh party dang in sawiselna zawng zawng hun khat a kan hmang ho kha a mak ka ti.

5.    Kan khuallian in Kristian zaah za kan ni tih chhuang takin a sawi a, NLUP lamah a kual leh a, MNF party avanga Mumbai Mizoram House tur a pamtul hman teuh zia te, chumi avanga Mizoram sum chawi tur tam tak zia te a sawi bawk a. An sawrkar hmasak lai khan engatinge lung an phum mai loh le tih te ka lo inzawt ve a. Minister te thusawi hi ka la ngaithla ngai lem lova, hetianga thupui (subject) hrang hrang chawh pawlh vel hi politician mizia a ni ve hrim hrim em ni aw tih te ka ngaihtuah mai mai bawk.

Awle, thil hriat fuh loh pawh tam tak ka nei ngeiin ka ring a, eng pawh nise  Mumbai Mizo ten House thar kan nei leh thei ngei dawnin a lang a, hengte hi tangkai takin a mamawhtu ten hmang thei sela, a bikin damlo leh sikul naupang thlenna mai nei lo te tan malsawmna nasa tak a nih ngei ka beisei. Kan chan tur beitham viau mahse neih loh ai chuan a tha hrim hrim a, Pu Hawla sawrkar hian eng style hmang pawhin rawn hawng se a lawmawm em em a, rawn hawng lo ta sela chuan Pu Zorama hnuaiah hian kan hawng ngei ang tih a awm chuang bawk silova. Chuvang chuan a party emaw, mimal emaw House kan neih theihna tur atana tha leh zung sengtu zawng zawng te inpekna hi a fakawm ka ti thlawt a ni.

Best Sunday Ever...!

Sea Hill Party chu chhim ngei ka tumruh hle mai, a hmasa zawk pawh khan tuilian avangin ka lo thulhsan tawh bawk nen, tun tum chu thulh ka tum bau lo. Dan pangaiin hma lutuk lo dar 7 pm vela kal chu ka tum a, ka inbuatsaih mek lai chuan sms ka dawng ta hlawl mai a, ti hian “ Dinner chu cancel mai. Chhuah loh a tha ber ang, Bal Thackeraya thi chiah a, MNS leh Shiv Sainik hovin dawr zawng zawng an khartir vek “, tiin. A pawi ka ti hle mai, Inrinni zana han awm mai mai tur chu ka ui khawp a, tihngaihna vak awm chuang silo chuan Movie ka en vel ta mai mai a.

 A tuk Pathian ni lo thleng pawh chu nidang ai chuan a ngui deuh nghulh a, news ka’n en vel a, engmah motor, taxi, auto, mihring tak ngial pawh an awm lo. Police ho lah chuan mipui te In chhunga awm vek turin an puang reng bawk a, emergency tawp ah lo chuan chhuak lo turin thuchhuah an siam a. Mumbai khawpui chu a reh hian a reh tlawk tlawk a ni ber e. Hel hovin an beih emaw bomb a puak emaw a nih pawhin nunphung hi a khaihlak ngai lem lo, mahse tun tum zet chu mipui kan thlabarin kan khur a, pawn a chhuak ngam an awm lova, dawr, kuhva dawr, paani puri, Nimbu paani dawr, pheikhawk chhe siamna tak ngial pawh inhawng hmuh tur  a awm lo.

Ka rilruah inkhawm a rawn lang ta. Ka thiante leh hruaitu thenkhat te ka be kual a, anni chuan inkhawm a ngamawm loh thu min lo hrilh liam liam hlawm a, thenkhat erawh taxi/auto tel lova kal ngaihna awm lo te an ni thung. Inkhawmna kan nei thei lovang tih ka hlau em em a, kan mihrang hmasa ten  “ Maichamah chuan Mei a nung reng anga, a mit tur a ni lo “ tia thuthlung an lo zam tawh chu ka hunah hian bawh pelh ka phal thak bik lo mai. Tichuan ka rilru ka siam a, kal na tur hi awm lo eng ang pawh ni sela, Biak In hi ka vak thleng tho tho ang tiin ka intiam a, ka awmna leh Biak In hi 50kms vel daih a ni. Tichuan hma takah ka insiam sawk sawk a, Biak In lam pan chuan ka chhuak ta a. Mihring mit hmuh leh Pathian hmaah ngei pawh a ni ang mi tling lo ber leh thatna nei lo ka ni tih ka chiang em em a. Amaherawh chu hemi ni tluka Inkhawm chak leh phur hi ka la nei ngai lo hrim hrim thung si. Ka han ngaihtuah ber chu kan ringtu hmasa, Polycarp, Ignatia etc te ho Rome sawrkar tihduhdahna hlau reng reng a an awm lai, thih leh thih tia Pathian an biak hram hram lai te, a ruk a Pathian be tur a an inhmuhkhawm lai te chu ka lo mitthla ve a. Khatih lai an boruak ang chu tawng em lo mahila, a hun laia rilru tur te ka suangtuah thiam ve ruai ruai phahin ka hria.

Heti khawpa Mumbai khawpui a tit lai hian Pathian thlarau thianghlim chuan min awmpui tlatin ka hria a, ka hlau der lo mai, hlauh a hnekin amah hming avanga tuar ve theihna hun/chance ka nei tur hi ka lawm em em ringawt mai a. Ka hlim tak meuh meuh a ni, thlarau lamah hian ka sang vak bik lova, mahse tun tum zet chu min awmpuitu a awm tih hi ka chiang em em si a ni. In ka han chhuahsan chiah chu Bus a rawn tlan phei hlauh mai, Train Station a kal tur a lo ni leh zel mai, ka chuang ve nghal a, Train pawh chu buaina awm lo chuan ka va hmu ve a, a thawl em em mai leh ta nghal a, chumi hnu chuan ke a 7 kms vel chu kal ka tum a, ka vanneihna a la tluang zel, Bus, Biak In thleng kal tur a rawn tlan leh ta – ka lawmna hi sawisen a ni lovang. Tichuan nidang zawng aia hma chuan Biak In pawh chu ka thleng ta reng mai a ni. Tichuan mi 10 tlawng mai chuan inkhawm chu kan tan ta a, an hming hmerhin kan sawi hial teh ang – Pu Thana (BMCF Vice Chairman) te chhungkua ( a thiannu leh a fa te 2 nen), Nl Baby (South Mumbai), Tv Hriata (Indian Navy), Tv Amos (South Mumbai), Pu Ruata (Mizoram House), Tv Machhana (Hruaitu) leh keimah. Inkhawm program duan sa anga kal ngaihna awm ta lo chu Sharing hunin kan hmang a, kan nuna Pathian hnathawh te kan sawi liam liam a, a hnu deuh ah chuan Nl Eunice leh apa (Aizawl atanga lo zin) chu an rawn thleng ve nghal bawk a. Tichuan kan vaiin mi 12 kan ni ta a, Isua zirtir zat chiah kan ni tiin kan hruaitu chuan a tlip nghe nghe a ni. Kan thilpek tlingkhawm zat pawh Rs 460/- lai a ni.  Banna hla “ I lamah min hip rawh” tih kan sak te phei chuan kan tui hle mai, kan la nawn hial a. Inkhawm banah chuan kan BMCF Vice Chairman te In lamah chuan Vawksa rep leh Bawngsa rep ei tur chuan kan liam thla ta nghal a. Thlarau mai nilo, tisa ngei pawhin kan puar hle a ni.

Tet te atanga Sunday School te kalin, naupang dang ang thovin ka lo seilian ve a, mahse hemi ni tluk a inkhawm chak leh inkhawm nuam tih hi ka la tawng ngai hauh lo mai. Tlin lohna leh fel lohna tam tak nei mah ila Pathian kan hnena a la rawn inpuang duh tih ka hriat hian ka lawm em em a, eng ang mi pawh ni ila “ kei atan erawh zawng Pathian hnaih hi a tha a ni” tiin ka tlip ta a ni.

A Hmeltha Reuh A Sin Le

“Inkhawm leh hun chu ka va han be tawh dawn chiang e” tia ka inseh ruh na pawh ni ruk lai a lo liam leh ta der mai. Phur takin inkhawm turin ka insiam sawk sawk a, nidang aia hma fe chuan Biakin pawh chu ka thleng ta reng a ni. Tumah an lo la thlen loh avang chuan keimah in a tul ang ang Hla bu leh Bible te chu ka remkhawm a, ka theih ang tawka kohhran leh khawtlang a inhmang ve hram hram thin ka nia, vawiin pawh hi Mumbai Mizo Kohhran din champha vawi 27 na a nih vangin tih tur neuh neuh ka nei ve nual a, a hminga Zaipawl Conductor te ka lo nih ve vang in ka chetla vel chu min rawn hmu ve ngei se ka tihle mai. Pathianni hmasa zawk a ka hmuhdan te chu kan ngaihtuah let a, inkhawm ka kal tlai deuh avangin tlar hnung lamah thuthmun ka rem a, ka thu fel ta chiah tih velah ka zawn chiahah chuan he nula, mihring ten hmeltha an lo tih fo min hrilhfiah nana Siamtu in van atanga a rawn tirh ni mai awm hi a rawn thu thak mai a..! Kalpui a nei lova, thurualpui a nei na hek lo, ngawi reng chuan a rawn thu a, a tawngtai lai te chuan ka lo melh ngawih ngawih mai a.

A hmelthat dan hi keimahah chuan a thawk na ngang mai, cher lama aia sa tha lam hret, ngo vang mai, pian nalh zet mai leh a san lam 5.6 Ft vel a ni, a sam nung sarh mai te chu Fan te chuan an chhem phe siai siai bawk a. Zai hunah tha takin a zai a, thu ngaihthlak hunah tha takin a ngaithla leh a, Bible chang an chhiar lahin a Bible chu keu in an chhiar lai apiang te chu a lo en ve zel a, inkhawm pawh ka ngaihtuah hleithei meuh lo, “ E khai, hei ngei hi a ni dawn a nih hi ka kawppui tur chu, ka duhthusam zet mai Siamtuin min pe dawn ta anih hi le” tiin ka lo inngaihtuah lungawi ve em em a. Zai lai te chuan kan inmelh leh zeuh zel a, tlangval pumpa ka hit leh mup mup zel nia mawle. Vawikhat hmuhna mah nisela ka hmangaih nghal em em hian ka hria a, anih loh vek pawhin ka hmangaih teuh viau chuan ka ring. Inkhawm bana biak dan tur te chu ka ngaihtuah a, thui tak tak ka ngaituah thleng a, fa 3 vel kan neih thlenga kan awmdan tur te ka ngaituah pha hman vek nia ! Thil tam tak, min ngainat ve dan tur te, min duh ve dan tur te ruahman teuh chung chuan inkhawm chu ka tling tla ve ta hram a ni.

Le..!! Inkhawm kan bang ta, hun thawl tak hnuaiah ka inkawm thei dawn e tiin ka hlim ngang mai. Chutihlai tak chuan kan Kohhran Chairman chuan Committee nei lawk ang u a rawn ti chawpchilh ta mai si. Tui lo zet chuan ka thu ve ta ran a, kan thil rel reng engmah ka beng’an a lut mawlh lo, tawp vat vat se ka ti em em a, tawk fang kan neih hnu chuan kan titawp ve ta bawk a, a rang a rang chuan ka zuangchhuak nghal a, amaherawh chu ka tum angin ka awm thei ta tawp lo mai. Amah chauh chuan thingpui in hian a lo thu a, min rawn melh ralh ralh a, ka va pan hnai a, a bul ka thlen chuan hipna nasa lutuk in min dang bet ta tlat mai, ka va be pawp ngam ta tlat lo mai a nih chu, tichuan a vawikhatna atan chuan a bul vel chu ka hel kual ta ringawt mai a ni. A mak ka inti em em a, zak rual ka ni tawh lo asin le tiin ka inhrilh mawlh mawlh a, mak tak maiin a bul ka va thlen dawn khan sawi tur ka hual zawng zawng kha a bo vek a, huaisenna reng ka nei thei tlat lo mai. Chutiang chuan vawi thum vel lai biak ka tum chu ka thulh ringawt mai a, nep ther ther hi ka inti khawp a, chutih rualin he chakna/hipna tha (force) min dang bet tlattu hi mak pawh ka ti. Nidang chu nise sawi tur hre lo pawh ni ila ka ne ne kual thei awm tho sia, mahse tun tum zet chu sawifiah hleih theih loh thahrui hian min dang bet tlat a ni ber e. Hla deuh hlek atang chuan ka melh leh zeuh zeuh thin a, min melh ve dan atang ringawt pawh chuan min haw lem lo tih chu ka chiang khawp mai, bul han tan ngam phei ila chu a hlawhtlin a harsa lem lo khawp ang le, mahse chutiang ngawtin chakna ka nei hauh silo. Vanneihthlak takin ka thianpa nen an inbe lai chu ka hmu fuh hlauh mai a, Zaipawl hla zir te kan neih leh tak avangin Biakinah chuan ka luhsan a ngai ta si a, a haw tur nen chuan Biakin tukverh tang chuan kan inhmu leh hram a, min rawn nuih seih nghe nghe a ni. A hnu deuh chuan phur tak maiin ka thianpa chu tunge anih te chu ka zawt nghal a. A hming chu Msi a ni a, Mizoram House a awm, a nu cancer natna avanga inenkawl, rawn kalpui a lo ni a, Aizawl Venglai a awm, kar khat vel chu an lo cham tawh a, ka thian hnaivai tak pakhat cousin hi a lo ni nghe nghe awm e.  Chu thu ka hriat chuan haw leh mai tur an ni a, muangchang thei ka ni lo tih ka hre chiang em em a, “Pathianni leh chu ka va han be tawh chiang em ve aw” tiin ka rilru ka lo siam a nih kha.

Tichuan Pathianni a lo thlen leh chuan nghakhlel takin ka lo thlir reng a, inkhawm tan thleng pawh a la thlen loh avang chuan a rawn tlai deuh dawn aniang tiin ka inhnem a. Inkhawm lai pawh chuan ka ngaichang reng a, mahse a tawp thleng chuan hmuh tur a awm ta lem lova. Ka thianpa pawh chu ka zawt chiang duh hrih lem lo, rilru khingbai tak chuan engatinge ni ang aw ka ti nuap nuap a, an haw tawh nge a rawn inkhawm lo ve hrim hrim, nge a nu a zual ? zawhna chhiarsen loh a rawn lut zut zut a, nakina ka thianpa chu zawh chian atan ka khek ta rih a ni. Inkhawm ban tihtur awm tawh lemlo, rilru lo khawhar ve bawk nen chuan ka thiante kalna tur lam Colaba chu ka pan ve ta a. Bus in kan kala, Bus Conductor lah chuan dawt sawiah min puh tlat mai, mi pali chuan man pek ka tum chu paruk chuan man a la then mai a, ka zawh lah chuan paruk i tih kha a ti tlat pek a, khawlum – lungleng thinchhia nen chuan kan inkhawih lo chauh hial a ni. Tichuan Colaba chu kan thleng a, Bar lar tak mai Gokul ah min luhpui ve ta a, mi an lo tam khawp a, keimahni hmel ang pawh an lo awm ve nual a, thian ten in tur an han lam nak nak a, han sawi ve mai tur ka hriat loh avang chuan Pepsi chu ka lam ve ta ngawt a..! Hetia kan han thutfel meuh hi chuan dar 10:30pm a lo ri der tawh a. Ka riltam chuan chaw ei mai ka duh avangin midang chu ka eisan ta a, chaw ka ei tan chiah tih chuan le ka rilru chhungril luah ngut ngut tu, Msi chu a cousin nen chuan an rawn lut ve ta hlawl mai!

Ka hlim ngei mai, min en chik deuh chu awm phei se chuan ka hlim lutuk avanga ka vun rawng inthlak danglam te chu an hmu ve ngei ang. Siamtu pawh hi a va han tha tehreng em, ka duh zawng zawng min tihsak a tum a nih le, ka damchhungin ka fak tawh ang ti te in ngaihtuahna a rawn lut zut zut a. Ka hma zawnah chuan a cousin chu a rawn thu a, a ni pawh chu a bulah chuan a thu ve nghal a, a hmel chu ka en thin a, ka hlim em em mai a, Bar chhung, light eng mang lo hnuaiah te hlei hlei chuan a thazual emaw tih mai tur a ni. A tlai tawh angreng bawk a, ka haw na tur nen an kawng a in ang bawk nen, hmeichhia mahni chauh a haw chu a him lova, ka thlah pah thei dawn a nih hi tiin ka lo inngaihtuah ve a (a cousin hi hostel a awm, 11:30pm Deadline nei a ni a). Bar chhunga min rawn hmu thut chu a beisei lem lo tih hriat tak hian a phu chiang kher lehnghal a, mahse a hmelthatna leh duhawmna karah chuan thil diklo a awm tih ka hmu thei tlat mai. Enge ni ang aw tiin ka ngaihtuah a, a incheina chu lah chu a inhmeh em em lehnghal a, a nalh lutuk chu ka thikthu te a lo chhe ve ringawt in ka hria. Kawr pan te, a hnute mawizia lang thei ngei tur hi a ha a, kawrfual chhing tak, a mal bawr vel a lang thui lutuk em aw tih ang tur chu a inbel bawk a, Pathianni hmasa a incheina nen chuan a in ang ta hauh lo mai. A mit meng mawi tak chu dawidim tihbuai hriat tak hian a phelh sung bawk a. An chet dan velah chuan an unau chuan an rawn in nual tawh tih ka hre thei mai a, rei pawh an la thu lo tih chuan Whiskey chu an lam a, Glass pathum nen chuan, engatia glass pathum chhawp nge an nih chu ka ti rilru nuap nuap a, min thlit kep an tum ve amawnile aw te ka lo ti ve a.

A cousin nen chuan kan inbe bawrh bawrh a, naktukah a unaunu te chu Aizawlah an haw tawh dawn a, chumi thlah nan chuan Pub-ah an kal, an haw lam pang an rawn lut kawi ve mai hi a lo nia. Tichuan Msi chu biak ve tumin ka ka ang zuaih hman a, mahsela ka tawng chhuak hman lo hlauh. Bar-ah chuan vai cher sang zin zen te hi, a car chabi niawm tak rawn vai lauh lauh pah hian a rawn lut phei ve a, mi neinung tak an ni tih a hriat nghal mai a, kan thutna lam chu rawn pan pheiin chu ka nun tihlimtu, fate nu atan leh nu leh pa te Mo atana ka lo hual ruk ve reuh reuh bulah chuan a rawn thu ta that mai le..!! A rawn tlangnel hle mai, “ Whats Up Bro “ ? a rawn tih te chu hnek chawrh hi ka chak zawk a. Midang pawh chuan an eilo hlawm kher mai. Chutah Glass pathum chu Whiskey chuan an tikhat a, ka tellovin an pathum chuan an in ta zawk a. An in pah chuan Msi chu vaipa chuan a kuah heuh heuh reng a, a kuah fet tial tial bawk a, a hnu deuh phei chuan a hnute te chu khawihsak ta mai a! Vaipa vek chuan Msi khalh heuh heuh pah chuan, “ Cmmon baby, I don’t wanna drink anymore, lets go now “ hi a ti deuh chhen bawk a. A mal mum nalh tak mai te chu a zut chhohsak ta deuh deuh lehnghal a, Mizo awm ve te chu kan thinrim tlang hlawm hle a, kan insum tlang ni berin ka hria. Kan bul vela vai awm ve ho te mit pawh a kham ve hlawm hle chuan a lang. Eng rilru pu a hetia awm ta mai hi nge a nih chu ka hre bik lova, amaherawh chu Mizo te zingah tal chuan insum ve deuh se ka ti ve khawp a,  kar khat em pawh a la hmelhriat loh vaipa in a han khawih vela a tang eih lo hi a mak ka ti tawp bawk a ni. Tichuan an zu in lai pawh in zo ta lem lo chuan an inzui chhuak ta hna hna a. Ka thinrim lutuk hi thinrim ngaihna pawh ka hre lo. A cousin chu ka hau ve ta ringawt a, “Mahni unau te engatinge vai zuam leh khawih mai mai theih a i awm tir a” ? ka han ti a.  “ Naktuk an haw tawh dawn sia, enjoy a duh ve bawk si nen, i vai thian hausa deuh, min treat thei tu tur min lo zawnsak teh a ti tlat a, ka thianpa kha kan classmate ah chuan a fel deuh ber a, min treat thin a, North East ho chhass a lo nei nual tawh bawk a, ka sawm ve ta a nih kha” tiin min chhang ta then a, ka thinrim lutuk chuan insum hman lek lovin ka beng ta nghal thuai mai a, thian dang te chuan min rawn khap dai nghal vatin, amah pawh chu an hau nghal bawrh bawrh bawk a, kei erawh khap daih ve mai mai chi ni tawh hek lo, chu hmun atang chuan ka chhuak ta a, in ka thlen chuan thinrim leh rilru na inpawlh chuan ka mu meng ta kar mai a ni.

Mut hmunah chuan ka hmuh hmasak ber ni te chu ka han ngaihtuah let a, biak ka tum pawha ka biak theih tlat lohna chhan, chakna emaw hiptu emaw thahrui, min dang bet tlattu kha Pathian hnathawh a ni ang tih rinna ka nei ta a, khatia ka tum ang khan lo awm thei ta ila, Msi kha ka beisei ang a lo ni dawn lo nasa mai sia, ka rilru na tur leh hrehawmna tur mak tak maiin min lo lak kiansak ni zawkin ka hre ta a. Pathian min hmangaihna avang chuan thlamuang takin ka muhil thei ta a ni, ka mutthilh dawn chuan, “ A hmeltha reuh a sin mawle “, ka ti sap a.