Vainu Ka Kuah

A rei tawh deuh bawk a, zah pawh a ziaawm deuh tawh alawm le. Kan hna thawhna ah hian ka luh rualpui (batchmate) pali lai kan awm a, hmeichhia pakhat leh mipa pathum kan ni. Kan innel in kan inngaina fal bik hle a, duhsak pawh kan induhsaktawn narawh. Tum khat chu keini lut thar ho chu lunch treat turin min ti a, kan Office pumpui mi 70 rual vel chu hrai an ngai ta nih chu..! Kan phur ang reng phian a, enge Menu ni ang tiin kan thianho chuan kan ri hlut a. Tui in turin ka kalsan zawk a, rei vak lovah chuan ka let leh nghal a. Ka let leh pah chuan ka rilru ah  Chicken Biryani leh Sweet eng ilo vel sem mai chu a lo langa, ‘a hautak loh mai bakah kan duh tlang awm tho sia’, tiin. Tichuan phur tak mai ka rilru a awm chu ka va hrilh ta thuai a, ka sawi pah chuan engmah ngaihtuah lem lo hian ka sir ve ve a mi pahnih awm te chu an darah chuan ka’n kuah ngawt pek a. Pakhat chu ka thianpa Reddy-a, Telegu mi a ni a, min lo kuah let ve mai a, pakhat erawh Sonam-i, Bihari tuipawlh loh ngei mai, hleitling zet, a tet te atanga mipa in kut hmawr pawh a an la deh ngai re re loh ni ngei tur chu a darah ka’n kuah thak mai nih kha..!!

Ka kut chu current in min man a, a paih ta dawr ang deuh hi ka tehkhin ber. A rang a rangin a beng sawn dawr a, kei pawh chuan ka la let rang chiang kher mai..! Chutia kan che vel chu mikhap kar lek a thil thleng a ni, tumahin min hmu hman lovin ka hria a, ka ngaih pawh a tha deuh. A zak erawh ka zak ru hle, mawl ka intia, ngaihtuah tawi tet tut viau hian ka inhre bawk a. Engti a khatia han kuah ta mai nge ka nih ka chhui chhuak zo thlawt lo. Mahni lo maha hnamdang zinga lo fimkhur ve thin tehreng nen, ka mualpho ta derah te ka inngai a. Uiin zak miah lova Ek a ei leh Vawk tuihawka zak miah lova a inbual thin te chu ka it zamah zawk a ni.

Ka thiani nen chuan tha takin kan inbia in kan inchhaih leh nghal bawrh bawrh thova, rilru erawh a nuam chiah lo. Khatia kan che vel lai tumahin min hmu lo emaw ka tih kha, ka thianpa pakhat zawk, Bengali pa, nghal zet mai chuan a lo hmu ru kiau mai chu niin. A hnuah mi chhaih nan tak a hmang ta ziah leh nghal a.

He ka thil tawn ropui lo tak  avang hian Mizo society ka dem hle, ka demna chhan te :

Tet te atangin hmeichhe dim dawi leh zah nachang tumahin min zirtir lo, zirtir a hnekin “ Hmeichhia leh Palchhia chu thlak theih ani ngai e” tih tawngkam chu ka hriat lar ber pawl a ni zawk si.

Kan hmeichhia te lahin zahawm takin awm ta’nge ti chuang lo, mipa han kuah thuak thuak leh mipa bula awm a, a zahawm lo thei ang ber a han rak vak vak te chu nuam an lo ti zawk a. Hnamdang tan mai nilo, tu mit hmuhah mah hian a mawi hlawl lo a ni.

Tin, incheina hian zahawmna a keng tel a ni tih kan lantir peih lo. Inkhawmnaah chauh hian zahawm taka inchei tur kan ti a maw ni..!! kan awm mai mai, kan khawlai len velna, inchhung a kan chhehchhawl thleng pawh hian zahawmna hlauh chin a awm vek tih kan hre tha peih lo. Pawn lam mi tan kher nilo, kan chenpui te tan ngei pawh entawn tlak a inchei a pawimawh.

Heng te avang hian ka rilruah hmeichhe zah lohna nasa takin a intuh lut a, hmeichhia chu thil nung pakhat, khawvel tifamkim ve tu maiah ka ngaih phah dawn hial ta mai a, chuvang chuan he thil hi thleng taah ka ngai.
 

Mahse…

Vawikhat kan piang ve a, engto nei lem lo leh duhthusam ngei mai, nalh leh nuam an tih ang ber mai a an han inchei a, an han vak suau suau mai thin hi chu, an lung hi a va han awi dawn tak em ti te in ka ngaihtuah a. Miin lungawina a neih a liam a hlu a awm thei chuang dawn em ni..? Hnam dang abikin an sakhua leh hnam dan avanga hmel tak ngial pawh tilang thei lova, khuh ngai a an awm lai a, kan Mizo hmeichhia ten an hmel leh taksa bung thenkhat, a  nalh thei ang bera an sawngbawl hnu, hmu thei a kan lo awm ve ringawt mai te hi kan vannei ta phian zawkin ka hre leh hnuhnawh a.

Aiawl bazaar-ah han kal ila, dawr tam zawk nghaktu chu hmeichhia an lo ni a, Sa zawrhna te chenin an lo awm fur mai. Rilruin Mizo mipa te hi khawnge an awm tih zawhna a rawn a rawn siam a, Office an kai deuh vek dawn a nih hi tia ngaihtuah laiin, Office vel te kan dawr ve ta chenga, hmeichhia bawk chuan Office an lo luah lum leh bawk si. ‘ Hmeichhe finin tuikhur ral a kai lo’ tih te, ‘Tlangvalin nula a rim thin’ kan han tih rikngawt thin kha hrilhfiahna dang te pawh kan mamawh der tawh in ka hria.

Mipa leh hmeichhia infiam a, inchhaih bawrh bawrh thin Hnam hi a tam in a rinawm loh. Chutih rualin apa hlang ngawt ai chuan hmeichhe tel ngei a thil tih nawm bik zia leh hahdamthlak zia hre tu te vek erawh kan ni lawi si. Lan mawi tumna leh dan khirkhiap tak ten an zar buai lohva, a hmei a pa kan inchhaih a, kan han infiam bawk bawk thin te hi chu Mizo Society nawmna em em chhan niin ka hre ve tlat. Tin, thilsual tak a nih pawh ka ring ngawt lo. Chuvang chuan, khatia tum loh deuh mai a, Vainu dar dinglam ka va kuah khan ka pian leh seilenna Mizo Society in ka nun leh chetdan thlengin a lo thunun nasat tawh zia te, hlim taka hmeichhia leh mipa kan inchhaih vel te a lo hlimawm thin zia te, dan siamchawp khermei lutuk, khawvel nun ti hrehawm hnawk theiin kan nun a tihbuai vak loh thin te chu ka ngaihtuah let ta a, ka lung a leng veng veng ta hlauh a ni.