Best Sunday Ever...!

Sea Hill Party chu chhim ngei ka tumruh hle mai, a hmasa zawk pawh khan tuilian avangin ka lo thulhsan tawh bawk nen, tun tum chu thulh ka tum bau lo. Dan pangaiin hma lutuk lo dar 7 pm vela kal chu ka tum a, ka inbuatsaih mek lai chuan sms ka dawng ta hlawl mai a, ti hian “ Dinner chu cancel mai. Chhuah loh a tha ber ang, Bal Thackeraya thi chiah a, MNS leh Shiv Sainik hovin dawr zawng zawng an khartir vek “, tiin. A pawi ka ti hle mai, Inrinni zana han awm mai mai tur chu ka ui khawp a, tihngaihna vak awm chuang silo chuan Movie ka en vel ta mai mai a.

 A tuk Pathian ni lo thleng pawh chu nidang ai chuan a ngui deuh nghulh a, news ka’n en vel a, engmah motor, taxi, auto, mihring tak ngial pawh an awm lo. Police ho lah chuan mipui te In chhunga awm vek turin an puang reng bawk a, emergency tawp ah lo chuan chhuak lo turin thuchhuah an siam a. Mumbai khawpui chu a reh hian a reh tlawk tlawk a ni ber e. Hel hovin an beih emaw bomb a puak emaw a nih pawhin nunphung hi a khaihlak ngai lem lo, mahse tun tum zet chu mipui kan thlabarin kan khur a, pawn a chhuak ngam an awm lova, dawr, kuhva dawr, paani puri, Nimbu paani dawr, pheikhawk chhe siamna tak ngial pawh inhawng hmuh tur  a awm lo.

Ka rilruah inkhawm a rawn lang ta. Ka thiante leh hruaitu thenkhat te ka be kual a, anni chuan inkhawm a ngamawm loh thu min lo hrilh liam liam hlawm a, thenkhat erawh taxi/auto tel lova kal ngaihna awm lo te an ni thung. Inkhawmna kan nei thei lovang tih ka hlau em em a, kan mihrang hmasa ten  “ Maichamah chuan Mei a nung reng anga, a mit tur a ni lo “ tia thuthlung an lo zam tawh chu ka hunah hian bawh pelh ka phal thak bik lo mai. Tichuan ka rilru ka siam a, kal na tur hi awm lo eng ang pawh ni sela, Biak In hi ka vak thleng tho tho ang tiin ka intiam a, ka awmna leh Biak In hi 50kms vel daih a ni. Tichuan hma takah ka insiam sawk sawk a, Biak In lam pan chuan ka chhuak ta a. Mihring mit hmuh leh Pathian hmaah ngei pawh a ni ang mi tling lo ber leh thatna nei lo ka ni tih ka chiang em em a. Amaherawh chu hemi ni tluka Inkhawm chak leh phur hi ka la nei ngai lo hrim hrim thung si. Ka han ngaihtuah ber chu kan ringtu hmasa, Polycarp, Ignatia etc te ho Rome sawrkar tihduhdahna hlau reng reng a an awm lai, thih leh thih tia Pathian an biak hram hram lai te, a ruk a Pathian be tur a an inhmuhkhawm lai te chu ka lo mitthla ve a. Khatih lai an boruak ang chu tawng em lo mahila, a hun laia rilru tur te ka suangtuah thiam ve ruai ruai phahin ka hria.

Heti khawpa Mumbai khawpui a tit lai hian Pathian thlarau thianghlim chuan min awmpui tlatin ka hria a, ka hlau der lo mai, hlauh a hnekin amah hming avanga tuar ve theihna hun/chance ka nei tur hi ka lawm em em ringawt mai a. Ka hlim tak meuh meuh a ni, thlarau lamah hian ka sang vak bik lova, mahse tun tum zet chu min awmpuitu a awm tih hi ka chiang em em si a ni. In ka han chhuahsan chiah chu Bus a rawn tlan phei hlauh mai, Train Station a kal tur a lo ni leh zel mai, ka chuang ve nghal a, Train pawh chu buaina awm lo chuan ka va hmu ve a, a thawl em em mai leh ta nghal a, chumi hnu chuan ke a 7 kms vel chu kal ka tum a, ka vanneihna a la tluang zel, Bus, Biak In thleng kal tur a rawn tlan leh ta – ka lawmna hi sawisen a ni lovang. Tichuan nidang zawng aia hma chuan Biak In pawh chu ka thleng ta reng mai a ni. Tichuan mi 10 tlawng mai chuan inkhawm chu kan tan ta a, an hming hmerhin kan sawi hial teh ang – Pu Thana (BMCF Vice Chairman) te chhungkua ( a thiannu leh a fa te 2 nen), Nl Baby (South Mumbai), Tv Hriata (Indian Navy), Tv Amos (South Mumbai), Pu Ruata (Mizoram House), Tv Machhana (Hruaitu) leh keimah. Inkhawm program duan sa anga kal ngaihna awm ta lo chu Sharing hunin kan hmang a, kan nuna Pathian hnathawh te kan sawi liam liam a, a hnu deuh ah chuan Nl Eunice leh apa (Aizawl atanga lo zin) chu an rawn thleng ve nghal bawk a. Tichuan kan vaiin mi 12 kan ni ta a, Isua zirtir zat chiah kan ni tiin kan hruaitu chuan a tlip nghe nghe a ni. Kan thilpek tlingkhawm zat pawh Rs 460/- lai a ni.  Banna hla “ I lamah min hip rawh” tih kan sak te phei chuan kan tui hle mai, kan la nawn hial a. Inkhawm banah chuan kan BMCF Vice Chairman te In lamah chuan Vawksa rep leh Bawngsa rep ei tur chuan kan liam thla ta nghal a. Thlarau mai nilo, tisa ngei pawhin kan puar hle a ni.

Tet te atanga Sunday School te kalin, naupang dang ang thovin ka lo seilian ve a, mahse hemi ni tluk a inkhawm chak leh inkhawm nuam tih hi ka la tawng ngai hauh lo mai. Tlin lohna leh fel lohna tam tak nei mah ila Pathian kan hnena a la rawn inpuang duh tih ka hriat hian ka lawm em em a, eng ang mi pawh ni ila “ kei atan erawh zawng Pathian hnaih hi a tha a ni” tiin ka tlip ta a ni.

A Hmeltha Reuh A Sin Le

“Inkhawm leh hun chu ka va han be tawh dawn chiang e” tia ka inseh ruh na pawh ni ruk lai a lo liam leh ta der mai. Phur takin inkhawm turin ka insiam sawk sawk a, nidang aia hma fe chuan Biakin pawh chu ka thleng ta reng a ni. Tumah an lo la thlen loh avang chuan keimah in a tul ang ang Hla bu leh Bible te chu ka remkhawm a, ka theih ang tawka kohhran leh khawtlang a inhmang ve hram hram thin ka nia, vawiin pawh hi Mumbai Mizo Kohhran din champha vawi 27 na a nih vangin tih tur neuh neuh ka nei ve nual a, a hminga Zaipawl Conductor te ka lo nih ve vang in ka chetla vel chu min rawn hmu ve ngei se ka tihle mai. Pathianni hmasa zawk a ka hmuhdan te chu kan ngaihtuah let a, inkhawm ka kal tlai deuh avangin tlar hnung lamah thuthmun ka rem a, ka thu fel ta chiah tih velah ka zawn chiahah chuan he nula, mihring ten hmeltha an lo tih fo min hrilhfiah nana Siamtu in van atanga a rawn tirh ni mai awm hi a rawn thu thak mai a..! Kalpui a nei lova, thurualpui a nei na hek lo, ngawi reng chuan a rawn thu a, a tawngtai lai te chuan ka lo melh ngawih ngawih mai a.

A hmelthat dan hi keimahah chuan a thawk na ngang mai, cher lama aia sa tha lam hret, ngo vang mai, pian nalh zet mai leh a san lam 5.6 Ft vel a ni, a sam nung sarh mai te chu Fan te chuan an chhem phe siai siai bawk a. Zai hunah tha takin a zai a, thu ngaihthlak hunah tha takin a ngaithla leh a, Bible chang an chhiar lahin a Bible chu keu in an chhiar lai apiang te chu a lo en ve zel a, inkhawm pawh ka ngaihtuah hleithei meuh lo, “ E khai, hei ngei hi a ni dawn a nih hi ka kawppui tur chu, ka duhthusam zet mai Siamtuin min pe dawn ta anih hi le” tiin ka lo inngaihtuah lungawi ve em em a. Zai lai te chuan kan inmelh leh zeuh zel a, tlangval pumpa ka hit leh mup mup zel nia mawle. Vawikhat hmuhna mah nisela ka hmangaih nghal em em hian ka hria a, anih loh vek pawhin ka hmangaih teuh viau chuan ka ring. Inkhawm bana biak dan tur te chu ka ngaihtuah a, thui tak tak ka ngaituah thleng a, fa 3 vel kan neih thlenga kan awmdan tur te ka ngaituah pha hman vek nia ! Thil tam tak, min ngainat ve dan tur te, min duh ve dan tur te ruahman teuh chung chuan inkhawm chu ka tling tla ve ta hram a ni.

Le..!! Inkhawm kan bang ta, hun thawl tak hnuaiah ka inkawm thei dawn e tiin ka hlim ngang mai. Chutihlai tak chuan kan Kohhran Chairman chuan Committee nei lawk ang u a rawn ti chawpchilh ta mai si. Tui lo zet chuan ka thu ve ta ran a, kan thil rel reng engmah ka beng’an a lut mawlh lo, tawp vat vat se ka ti em em a, tawk fang kan neih hnu chuan kan titawp ve ta bawk a, a rang a rang chuan ka zuangchhuak nghal a, amaherawh chu ka tum angin ka awm thei ta tawp lo mai. Amah chauh chuan thingpui in hian a lo thu a, min rawn melh ralh ralh a, ka va pan hnai a, a bul ka thlen chuan hipna nasa lutuk in min dang bet ta tlat mai, ka va be pawp ngam ta tlat lo mai a nih chu, tichuan a vawikhatna atan chuan a bul vel chu ka hel kual ta ringawt mai a ni. A mak ka inti em em a, zak rual ka ni tawh lo asin le tiin ka inhrilh mawlh mawlh a, mak tak maiin a bul ka va thlen dawn khan sawi tur ka hual zawng zawng kha a bo vek a, huaisenna reng ka nei thei tlat lo mai. Chutiang chuan vawi thum vel lai biak ka tum chu ka thulh ringawt mai a, nep ther ther hi ka inti khawp a, chutih rualin he chakna/hipna tha (force) min dang bet tlattu hi mak pawh ka ti. Nidang chu nise sawi tur hre lo pawh ni ila ka ne ne kual thei awm tho sia, mahse tun tum zet chu sawifiah hleih theih loh thahrui hian min dang bet tlat a ni ber e. Hla deuh hlek atang chuan ka melh leh zeuh zeuh thin a, min melh ve dan atang ringawt pawh chuan min haw lem lo tih chu ka chiang khawp mai, bul han tan ngam phei ila chu a hlawhtlin a harsa lem lo khawp ang le, mahse chutiang ngawtin chakna ka nei hauh silo. Vanneihthlak takin ka thianpa nen an inbe lai chu ka hmu fuh hlauh mai a, Zaipawl hla zir te kan neih leh tak avangin Biakinah chuan ka luhsan a ngai ta si a, a haw tur nen chuan Biakin tukverh tang chuan kan inhmu leh hram a, min rawn nuih seih nghe nghe a ni. A hnu deuh chuan phur tak maiin ka thianpa chu tunge anih te chu ka zawt nghal a. A hming chu Msi a ni a, Mizoram House a awm, a nu cancer natna avanga inenkawl, rawn kalpui a lo ni a, Aizawl Venglai a awm, kar khat vel chu an lo cham tawh a, ka thian hnaivai tak pakhat cousin hi a lo ni nghe nghe awm e.  Chu thu ka hriat chuan haw leh mai tur an ni a, muangchang thei ka ni lo tih ka hre chiang em em a, “Pathianni leh chu ka va han be tawh chiang em ve aw” tiin ka rilru ka lo siam a nih kha.

Tichuan Pathianni a lo thlen leh chuan nghakhlel takin ka lo thlir reng a, inkhawm tan thleng pawh a la thlen loh avang chuan a rawn tlai deuh dawn aniang tiin ka inhnem a. Inkhawm lai pawh chuan ka ngaichang reng a, mahse a tawp thleng chuan hmuh tur a awm ta lem lova. Ka thianpa pawh chu ka zawt chiang duh hrih lem lo, rilru khingbai tak chuan engatinge ni ang aw ka ti nuap nuap a, an haw tawh nge a rawn inkhawm lo ve hrim hrim, nge a nu a zual ? zawhna chhiarsen loh a rawn lut zut zut a, nakina ka thianpa chu zawh chian atan ka khek ta rih a ni. Inkhawm ban tihtur awm tawh lemlo, rilru lo khawhar ve bawk nen chuan ka thiante kalna tur lam Colaba chu ka pan ve ta a. Bus in kan kala, Bus Conductor lah chuan dawt sawiah min puh tlat mai, mi pali chuan man pek ka tum chu paruk chuan man a la then mai a, ka zawh lah chuan paruk i tih kha a ti tlat pek a, khawlum – lungleng thinchhia nen chuan kan inkhawih lo chauh hial a ni. Tichuan Colaba chu kan thleng a, Bar lar tak mai Gokul ah min luhpui ve ta a, mi an lo tam khawp a, keimahni hmel ang pawh an lo awm ve nual a, thian ten in tur an han lam nak nak a, han sawi ve mai tur ka hriat loh avang chuan Pepsi chu ka lam ve ta ngawt a..! Hetia kan han thutfel meuh hi chuan dar 10:30pm a lo ri der tawh a. Ka riltam chuan chaw ei mai ka duh avangin midang chu ka eisan ta a, chaw ka ei tan chiah tih chuan le ka rilru chhungril luah ngut ngut tu, Msi chu a cousin nen chuan an rawn lut ve ta hlawl mai!

Ka hlim ngei mai, min en chik deuh chu awm phei se chuan ka hlim lutuk avanga ka vun rawng inthlak danglam te chu an hmu ve ngei ang. Siamtu pawh hi a va han tha tehreng em, ka duh zawng zawng min tihsak a tum a nih le, ka damchhungin ka fak tawh ang ti te in ngaihtuahna a rawn lut zut zut a. Ka hma zawnah chuan a cousin chu a rawn thu a, a ni pawh chu a bulah chuan a thu ve nghal a, a hmel chu ka en thin a, ka hlim em em mai a, Bar chhung, light eng mang lo hnuaiah te hlei hlei chuan a thazual emaw tih mai tur a ni. A tlai tawh angreng bawk a, ka haw na tur nen an kawng a in ang bawk nen, hmeichhia mahni chauh a haw chu a him lova, ka thlah pah thei dawn a nih hi tiin ka lo inngaihtuah ve a (a cousin hi hostel a awm, 11:30pm Deadline nei a ni a). Bar chhunga min rawn hmu thut chu a beisei lem lo tih hriat tak hian a phu chiang kher lehnghal a, mahse a hmelthatna leh duhawmna karah chuan thil diklo a awm tih ka hmu thei tlat mai. Enge ni ang aw tiin ka ngaihtuah a, a incheina chu lah chu a inhmeh em em lehnghal a, a nalh lutuk chu ka thikthu te a lo chhe ve ringawt in ka hria. Kawr pan te, a hnute mawizia lang thei ngei tur hi a ha a, kawrfual chhing tak, a mal bawr vel a lang thui lutuk em aw tih ang tur chu a inbel bawk a, Pathianni hmasa a incheina nen chuan a in ang ta hauh lo mai. A mit meng mawi tak chu dawidim tihbuai hriat tak hian a phelh sung bawk a. An chet dan velah chuan an unau chuan an rawn in nual tawh tih ka hre thei mai a, rei pawh an la thu lo tih chuan Whiskey chu an lam a, Glass pathum nen chuan, engatia glass pathum chhawp nge an nih chu ka ti rilru nuap nuap a, min thlit kep an tum ve amawnile aw te ka lo ti ve a.

A cousin nen chuan kan inbe bawrh bawrh a, naktukah a unaunu te chu Aizawlah an haw tawh dawn a, chumi thlah nan chuan Pub-ah an kal, an haw lam pang an rawn lut kawi ve mai hi a lo nia. Tichuan Msi chu biak ve tumin ka ka ang zuaih hman a, mahsela ka tawng chhuak hman lo hlauh. Bar-ah chuan vai cher sang zin zen te hi, a car chabi niawm tak rawn vai lauh lauh pah hian a rawn lut phei ve a, mi neinung tak an ni tih a hriat nghal mai a, kan thutna lam chu rawn pan pheiin chu ka nun tihlimtu, fate nu atan leh nu leh pa te Mo atana ka lo hual ruk ve reuh reuh bulah chuan a rawn thu ta that mai le..!! A rawn tlangnel hle mai, “ Whats Up Bro “ ? a rawn tih te chu hnek chawrh hi ka chak zawk a. Midang pawh chuan an eilo hlawm kher mai. Chutah Glass pathum chu Whiskey chuan an tikhat a, ka tellovin an pathum chuan an in ta zawk a. An in pah chuan Msi chu vaipa chuan a kuah heuh heuh reng a, a kuah fet tial tial bawk a, a hnu deuh phei chuan a hnute te chu khawihsak ta mai a! Vaipa vek chuan Msi khalh heuh heuh pah chuan, “ Cmmon baby, I don’t wanna drink anymore, lets go now “ hi a ti deuh chhen bawk a. A mal mum nalh tak mai te chu a zut chhohsak ta deuh deuh lehnghal a, Mizo awm ve te chu kan thinrim tlang hlawm hle a, kan insum tlang ni berin ka hria. Kan bul vela vai awm ve ho te mit pawh a kham ve hlawm hle chuan a lang. Eng rilru pu a hetia awm ta mai hi nge a nih chu ka hre bik lova, amaherawh chu Mizo te zingah tal chuan insum ve deuh se ka ti ve khawp a,  kar khat em pawh a la hmelhriat loh vaipa in a han khawih vela a tang eih lo hi a mak ka ti tawp bawk a ni. Tichuan an zu in lai pawh in zo ta lem lo chuan an inzui chhuak ta hna hna a. Ka thinrim lutuk hi thinrim ngaihna pawh ka hre lo. A cousin chu ka hau ve ta ringawt a, “Mahni unau te engatinge vai zuam leh khawih mai mai theih a i awm tir a” ? ka han ti a.  “ Naktuk an haw tawh dawn sia, enjoy a duh ve bawk si nen, i vai thian hausa deuh, min treat thei tu tur min lo zawnsak teh a ti tlat a, ka thianpa kha kan classmate ah chuan a fel deuh ber a, min treat thin a, North East ho chhass a lo nei nual tawh bawk a, ka sawm ve ta a nih kha” tiin min chhang ta then a, ka thinrim lutuk chuan insum hman lek lovin ka beng ta nghal thuai mai a, thian dang te chuan min rawn khap dai nghal vatin, amah pawh chu an hau nghal bawrh bawrh bawk a, kei erawh khap daih ve mai mai chi ni tawh hek lo, chu hmun atang chuan ka chhuak ta a, in ka thlen chuan thinrim leh rilru na inpawlh chuan ka mu meng ta kar mai a ni.

Mut hmunah chuan ka hmuh hmasak ber ni te chu ka han ngaihtuah let a, biak ka tum pawha ka biak theih tlat lohna chhan, chakna emaw hiptu emaw thahrui, min dang bet tlattu kha Pathian hnathawh a ni ang tih rinna ka nei ta a, khatia ka tum ang khan lo awm thei ta ila, Msi kha ka beisei ang a lo ni dawn lo nasa mai sia, ka rilru na tur leh hrehawmna tur mak tak maiin min lo lak kiansak ni zawkin ka hre ta a. Pathian min hmangaihna avang chuan thlamuang takin ka muhil thei ta a ni, ka mutthilh dawn chuan, “ A hmeltha reuh a sin mawle “, ka ti sap a.

Khami Dakar kha aw...!!

“ Lei ram ngaiin ka kir loving
  Krista-ah ka nung tawh vangin
  Kristaah chuan lungkham reng ka nei love”

        Prelims Exam tur chuan ka inbuatsaih mek a, music ngaithla pah a lehkha zir nuam timi ka nia, sitting room a ka unaute ri nuaih nuaih chu kalsanin ka room-ah he hla - Zoramchhani sak hi zawi te in ka ngaithla pah a. Zanlai dar khat vel a ri ta maw tih chuan ka phone chu a rawn ri ral ral a, number ringawt a nih avangin tunge ni ang aw tiin ka ngaihtuah a, ka tirilah erawh chuan ka khur der der a, hlauthawng ang reng tak chuan ka pick up ta a ni.

“ Hello, Bee-a a ni em aw ?
  Aw ni e , Enge ni ta ?
  I pa Hmaa ka nia
  E..teh daih te chuan enge ni ta ngai ?
‘Dar 12:50 khan i Pa chu a chatthla ta a ni e, A pawi khawp mai, inti pachang hram hram la, i nau te leh i nu te inhnemna tur awm chhun i nih kha, i nu pawh ka han be nghal a ange, chuan chhung khat hnaivai i hriat ang te i lo hrilh darh ve mai dawn nia aw’.

       Chutia kan inbiak zawh chuan phone chu a dah mai a, ka hamhaih lutuk chu ka awmdan pawh ka hre thiam lo, ka bing mup a, ka beng chu a chhet nghal vek a; ka nu Kolkata a awm mek chu ka ngaihtuahna ah a rawn lut hmasa ber a, engtinnge chu thihna rapthlak tak chu a lo dawnsawn anga, engtia nasa in nge a nghawng ang, a mangan dan tur leh hrilhhai dan tur te chu ka ngaihtuahnaah a rawn lut zung zung a. Chutah Aizawl ka haw hnuhnung bera ka Pa in Airport a min lo hmuahlai chu ka mitthlaah chiang takin  rawn lang zui nghal a. Taxi ah kan chuang a, hlim takin kan ti ti a. Ka pa chuan” Han ngaihtuah ve chhin la, hun kal chakzia hi, hmannni lawkah phaiah kan dah che emaw kan tia, hei kum khatna chu i lo zir zo ve leh der tawh mai chu a nia. Kar lovah i zirlai te i zo ve thuai mai dawn e, dam hi chuan hun hi a rei lo a sin tiraw,“ tia min thlahlel em em leh hlim taka a tawng ve bawrh bawrh lai mawlh chu ka mitthlaah chuan a lo lang a. Dan zawh rual loh chuan ka mittui chu a rawn tla ta zawih zawih a, ka dawhkan chu ka bawh thlawp a, “ Ka pa, ava la hun lo tak em ! Engtinnge  ka nu leh ka nau te hi ka enkawl tak ang, kei ngei pawh hi engkawl ngai ngawih ngawih ka la ni a sin le, a la hun lo em mai a, ka pa…”tiin  ka tap ta zawih zawih a ni. Chutih lai vek chuan ka nau chuan thingpui min pek tumin room-ah chuan a rawn lut a, chutia dawhkana lungchhe tak maia ka tap zawih zawih lai a rawn hmuh chuan a hrilhhai ngei mai ..!  “AU enge ni ta?” a rawn ti ruai a, ka chhang lo. “Aa pa a boral a mi ?” a rawn tih leh chuan “Aw” tih ringawtin ka lo chhang a. A  mangang a ni tih ka hriat chuan intih pachan ka tum hram hram a, “ Tunah Raipur (Chhattisgarh) ah a awm a, naktuk ah a ruang Aizawl lamah an phur ang “ tiin ka hrilh a. Room tanga  chuan chhuakin kan thian thenkhat te chu ava hrilh ve ta nghal a ni.

         Zan tairek nimahsela kan inbul hnaia awm ka thian te chu an lo thleng khawm tuk tuk a, chung te pawh chu ka ngaihsak thei lo, roomah chuan ka tawm tlat a, ka hma hun thim tak mai leh khawharthlak tak tur ngawt chu ka huphurh em em mai a ni. Ka han ngaihtuah thin a, Aizawl han haw na mai tur pawh kan nei dawn silo, ka pa ruang ka han hmulo tur chu ka ngai ngam bawk silo, tunah 2nd year ka zo dawn fel dawn chauh a, engtinnge ka zir chhunzawm tak ang. Tuna kan leiba neihsa ringawt pawh hi engting nge kan rulh ang, ka nu in hnathawh a nei bawk silo, ka nau te chhawr tlak an la awm bawk silo…tiin ka lungngai em em ringawt mai a ni. Chutia ka indawm kun lai chuan he hla ka lo ngaiththlak mek -

“ Lei ram ngaiin ka kir loving
  Krista-ah ka nung tawh vangin
  Kristaah chuan lungkham reng ka nei love”

        tih hi a lo in play nawn tlut tlut  a, a hla thu chuan nidang zawng aiin min hneh ta tlat mai, a thunawn lai mawlh hian min hneh a. “ E khai..! ka tia , ka inngaihtuah chiang ta a, inchhung atang chuan ka chhuak a, inchung reh raih mai leh dai dap mai, zan daifim in a chiah hnawng dap ah chuan ka thingthi a, Pathian ka au ta a. Ka mittui chuan ka taksa chu a bual huh vek titih tawh a, “Kristaah chuan ka nung tawh avangin Lei nun lungkham a inngaihtuah buai tur ka ni love, ni tin chaw eikhawp a min petu, vawiin ni thleng hei leh chen min enkawltu chuan ka chungah ro min relsak ang che, huaisenna leh chakna ka neih theih nan min pui zel  la, vawiin ni hian chak lovin lungngaiin rum mah ila, nang chuan engtikniah emaw chuan min hruai chhuak dawn tih ka hria e. Min tichak thar zel ang che,” tiin ka tawngtai ta a. Ka tawngtai zo chu thlamuanna nasa chuan min awmpui nghalin ka hria a, ka hma hun, mihring ngaihtuahnaah chuan beiseina eng pawh awm tawh lohna chu Amah nen paltlang tur chuan ka inleng te chu ka zuk chhawn ve ta a ni.

“ Ka pa, vawiin hi i nunna kal tlanga Pathianin chakna leh huaisenna min zirtir thar leh na ni champha vawi 5-na a lo ni leh ta reng mai. Vawiin ni hian ka ngai em che a , min la awmpui chu nila sawi tur kan ngah dawn teh reng nen aw… Hlim takin I kawr mawi tur, kekawr leh pheikhawk thar te ka lei ve tur che asin ..….

Ka nui ta seih a

Tukin zing ka tho chu ka chau deuh riau a, ka awm bawr te chu chum hrep ang mai hian a sil them thum a, ka hrawk te chu lungtum dawlh ang mai hian a hnawk tup bawk a. Thuthlengah ka thu then lauh lauh a, ka lung a leng em em a, ka mittui a rawn hnam fap fap a, dan zawh rualin lohvin ka mittui te chu ka vun chuar tawh tak, ka chhungte leh thenawm khawveng ten Tar vun an tih mai ah chuan a far kauh kauh a. Ka sam tuak var vo mai karah chuan thlanfim a dir zung zung bawk a. Vawiin hi Pathian khawngaihna avanga kum 80 ka tlin ni a ni. Engtiklai khan nge hetiang kum zah ka tlin hman hi ka hre bik lo. Ka ngaihtuahna te chu naupanlai rilru nen danglamna awm silo, amaherawh chu thahrui a lawi ka nei tawh lova, ka ding thei tawk chauh a ni si. Ka khaw hmuh a fiah tawh lova, chakna leh thatlai hun te chuan min thlahthlam ta, hmalam hunah beiseina ka nei ta lova, dam rei malsawmna tia kan Bible in min hrilh hi ka ngaihtuah nawn fo ta mai.

Ka piancham pha lawm tur chuan ka chhungkhat laina hnai te chu an rawn thleng khawm tap tap a. Ka fate hmelah chuan min lainatna leh hmangaihna ka hmu a, nakumah hetiang hun hi ka hmanpui leh thei angem tih chuan a mawlh hlawm niin ka hria. Ka tu duhawm tak tak te erawh chuan “aapu, aapu” tiin min lawm em em a, hlim takin lungkham nei lo tih hriat tak hian ka bul velah te chuan an rawn inbawrkhawm a. Ani, taksa chakna ka nei tawh lova, ka taksain natna a do theihna pawh a beitham ta hle, hritlang mai pawh nunna thap thak khawpa ka beih a ngai ta a, nakuma ka piancham han lawm leh chu thil beiseiawm tak a ni tawh lo hrim hrim a ni. Chutia ka tu leh fa te ka piancham lawma an rik hlut lai chuan kil khatah lunglen takin ka nunhlui te chhui letin ka lo inngaihtuah a, ka ngaihtuahnaah erawh chuan thil tam tak a rawn lut lem lo, tlem te chauh a ni.

Ka naupanlai ka han thlirkir a, nikhat thil thleng ang lekin ka ngaihtuah a, sikulah kan kal a, tlaiah thiante nen kan infiam ho leh a, chutiang hlir chu nimaiin ka hria. Amaherawh chu chhungte phal loh thil, card den ruk laite, meizial zuk ruk lai te leh sikul tlanbo lai vel te, lui a kal a tuichen ruk ang reng te chu a mal te te in, chiang takin ka ngaihtuah let thei thung a, ka lung an tilengin rilruah thianhlui te an rawn lang nghal a, khatia hlim tak leh hlauthawng tak chung sia panlai kan lo hmang te kha ngaihawm ka tiin vannei ka intilet ta zawk a.

Kan han rawlthar chhova, naupang thuawih tak niin sikul kal leh lehkhazir bak ngaihtuah ka nei ngai meuh lo. Han ngaihtuah let tur pawh ka lo nei awkawng lo mai, ka thatlai hun chu a liampuat mai hian ka hria a, chutihlai erawh chuan, retheih em avanga a tuk chaw eitur tak ngial pawh nei lova ka awm lai te, mittui tla zawih zawih a Pathian hnena eitur min pe tur a ka dil lai te erawh chiang takin ka mitthla thei a, khatih laia ka rinna nghehzia te chhuikirin tuna ka dinhmun te ka sit phah lek lek a ni. College kan kai tirh a, thiante chhan nan thih huam a vai ho ka lo sualpui ve zak zak laite chu nimin lawk a thil thleng ni maiin ka hria.

Ka thiantha leh chhungkhat te nia ka lo ngaih thin ten, itsikna avanga phuah chawp leh thutak phena dawt mawihnai tak hmanga min sawichhiatlai te chu ka ngaihtuah let a, “Aw, kan damchhung ni te hi a rei loh teh vei nen, engah chuan inngeih tlang taka kan awm mai mai thin loh ni..!!” tiin ka ngaihtuah vang vang bawk a.

Ka thingpui inlai chu ka lem leh khalh a, ka mit chu ka han khap leh hram a, chutih rual chuan ka nupui ka hmangaih em em mai, kum 50 lai mai ka lo chenpui tawh chu ka mitthlaah a rawn lang a, kum 50 lai nimahse a reilo ka ti hle mai, zan kan mu a, zing kan tho leh ang lek mai niin ka hria. Hlimtak leh hmalam hun thlira fate kan buaipui lai te chu nikhat lek ang mai niin ka hria a. Chutih rualin kan inngaihzawn tantirh lai, chhungte phallo chunga kan inhmuh ruk lai te, inthlahleh taka inneih hun tur kan thlir dun lai te, hmelma leng vel nuaih nuaih kara inhmangaih taka rinawmna hrui vuan dun a harsatna leh hlimna kan paltlang lai chu chiang tak maiin ka mitthlain ka hmu bawk a, ka ngaihtuahna a kal ding bawk aniang, ka lungphu chu a rang ta sawt hian ka hre nghe nghe a ni.

Ka rilruah thildang daih, he thu lar tak mai hi a rawn lut a,“A life spent making mistakes is not only more honorable, but more useful than a life spent doing nothing” tih hi, a dik viau pawhin ka hria. Ka nun pumpui ka han thlir let a, nun pangai leh nitin nunphung ka lo zawh thin te chuan lungawina min pe lova, mi tih bak piah lam ka lo tih ve te, huaisen taka ka tana that zawkna a nih beisei a dan pel thak a risk ka lo lak ve naah te khan inchhirna ka nei hauh lo mai. Inchhir chu sawi loh mi tilunglengtu leh chiang taka ka ngaihtuah let theih te an ni zawk tlat si a ni. Chhungte phalloh kan lo tihruk ve te chu min tihlimtu leh ka thinlung ruak hnawhkhattu an lo ni ve zel bawk nen. Mihausa fa ni ila, nunphung pangai tak zawhin, harsatna leh lungaihna te tawk mang ngailo ni ta ila, ka nunah hian ngaihtuah let tur leh hriatreng tur ka nei kher a ngem tiin ka inzawt let a, a hunlai a hrehawm mittui tla zawih zawih a kan lo tuar ve te kha lung min lentu ber an chang ta hi a mak ka ti letling zawk hle a ni.

Ka thingpui inlai harsa titaka lem leh khalh pah chuan ka mit chu ka han chhing diar diar a, han men leh mai ka tum chu ka mit chu a inchar ta tlat mai..!! kum 7 lai liam hnua min boralsan ta ka nupui, ka hmangaih leh ngaih em em chuan ral khat atang hian min rawn ko tlat hian ka hria a, “Leia I thawhrimna te chawlhsan la, tlansa te zingah hian rawn tel ve tawh ta che” tih ri chu ka beng nilo ka hriatna chuan chiang takin a ngaithla a. Chuveleh hlimna sawisen loh chuan ka taksa leh thlarau chu luah lum nghalin, hlimna leh lawmna nasa lutukin min chenhilh avanga nui seih pah chuan min kotu aw lam chu ka pan ta a ni.

Ka thingpuino kenlai chu a tla keh darh chuaih a, ka fanu duat em em maiin mangang, thlaphang leh aw ring taka, “ U Mama, lo tlan thuai teh, ka Pa awmdan hi a dik lo a nia” a tih chu he leia ka thu hriat hnuhnung ber a ni ta a ni.

This is My First Love Letter

Hman deuh kha chuan Computer, Digital Technoloy vel hian tunlai ang hian min chiahpiah ang tih rin ngaihna a awm lo a nih kha. Kha tih lai kha chuan bialnu/bialpa te nen inbiakpawh nan lehkhathawn te kha a lar hle thin tak a. Tam tak chuan khang lehkhathawn te kha thil hlui mai tur a nih tih hre hek lo, kan lo paih bo mai mai a lo ni a. Tun hnu a ka’n ngaihtuah let hian lo dah that ve mai mai tur hi a nia ka ti nuap nuap thin. Mahse hei, ka vanneih a siamin ka Love Letter dawn hmasak ber mai ka lo dahtha hlauh mai a, ka han chhiar nawn leh pawh hian a thu kal dan vel hi nalh ka la titawp thei lo. Naupang viau e ti lo chuan ka thiannu kha thu leh hla lamah a lo ril ve khawp chuan ka hria. Lungleng em em vang pawh nilovin a thu hi a mawiin a ril ka ti em a, ka’n thailang ve mai mai ang e. A ziaktunu in a lo chhiar hlauh anih pawhin a nui liam ve mai mai tawh em ang chu maw..

He lehkhathawn ka dahthat bikna chhan thunawi tlem nen (amah pawhin a hre lo..hihihi)

Sikul ka thleng chu a thiannu in ka lehkhatawn tur chu min lo pe vat a, chhiar nghal chak viau mah ila sikul devotion tan a hun tawh si a, ka ipte-ah chuan ka hnawh lut tawp a, ipte chu thutthlengah hnutchhiahin devotion hall lam chu ka pan ta nghal a. Devotion chu dan pangai ang bawk in kan nei leh a, tichuan phur takin class room lam chu ka pan phei ta thuai a. Hetih hunlai hian sikul naupang zingah meizial zukruk leh khaini hmuamruk a lar hle a, hemi ni pawh hian devotion a kan awm hlanin kan hotuten “Surprise Inspection” an lo nei chu niin, kan ipte zawng zawng chu an lo dapchhuak vek a, ka ipte a lehkhathawn hlu tak mai ka dah pawh chu an lo la tel ta daih mai..!! Ka thutna ka thleng chuan lehkhathawn chu ka zawng nghal a, ka hmu ta miah lo mai a, zirtirtuten an la anih dawn hi tiin rilru buai takin ka awm a, chutihlai tak chuan kawngkhar atangin Chowkider chuan,”Beethungs, Office-ah an hmu duh che,” a rawn ti zui bawk a. Hlauthawng leh thinphu dut dut chuan Office chu ka va lut ta a ni.

Office-ah chuan kan zirtirtute chu an lo thu bial laih a, “Hei exam te a hnai tawh dawn a, engatinge bialnu te i lo neih re re, lehkhazir chauh ngaih pawimawh tur a ni asin. Tun atanga bialnu i neih te chuan i zirna in a tlakchhiat phah nasa dawn a nia. Kan sikul innghahna i ni a, thil dangin i zirna a tihbuai hi kan remti lo a nia”, tiin kan zirtirtu pakhat chuan min zilh nghal bawrh bawrh a. Ka ngawi reng a, chhan dan tur pawh ka thiam mai lo, sawi tur pawh ka hre chuang lo. Zirtirtu dang pakhat chuan, “ A hrim hrimin tunge M -i hi, khawi venga mi nge ni a” ? tiin min zawt a, a rul tawk chuan ka chhang a, ka zak em em a, ka taksa hi a lum chhuak vek a, ka thin a phu dut dut bawk a, hetihlai a sual ka intihzia kha aw..!! A tawpah chuan ka lehkhathawn chu an rawn phawrh chhuak a, “Kha, tun tum chu kan pe let leh che a nga, a dawt leh chu a awm tawh tur a ni lovang, i zirna chauh i ngaih pawimawh hi kan duh ber a nia, thildang tibuai tu tur che a awm kan remti lo a ni”, tiin min thlah ta a.

Class room-ah chuan ka phei hnak hnak a, ka lehkhathawn chu ka hum ran a, kan zirlai te chu engmah ka ngaihtuah thei lo, chhiar hlan mawlh chu ka nghakhlel a. Chawlhlawk awm hmasa berah chuan ka chhiar ta nghal a, ka zahna leh rilru hahna zawng zawng te chu kiam sawng sawng in, chhiar nawn leh mawlh chu ka chak a, sikul chu kan bang ta ngei a, ka tlan haw thuai a, khumah mu chungin, duhthaw takin he ka lehkhathawn dawn hmasak ber hi ka chhiar nawn leh ta a….

Ngaih em em Beethugs,

A sakhmel ka tawn tirh atanga ka hmangaih leh a zun ka uai, he khawvel a ka hmangaih leh duh ber chuan ka beisei ngam loh leh phu loh, ka tana hlu ber mai a hmangaihna min hlan let ta si. Ka tan a va han hlu tak em..! Ka phatsan leh tawh lovang.

Ole, Apple chu a kungah awm tawh lo mahsela apple a nihna a hlauh ngai chuang lo ang hian nitin zantin i bulah awmin, in hmu thei lo mah ila, ka tan i duhawmna leh ngaihawmna a bo chuang silo. Hebron phairuam a tui luang ri kerh kerh leh thlifim tleh ri her her chuan I nui seih leh hlim aw hi a iang thin a. Dan zawh famkim theih loh avanga van hmangaihna hnawl a awm hnu hian ka hmangaihna chu a let tam takin ka hlan let mawlh mawlh a che. Ka duhtak, nikhat lek hmu thei lo che a ka awm pawh hian ka tan chuan kum sang tam ang a ni sia, runhmunah lengdunin awm lo mah ila, thamrallo mitthla chuan ka chet velna lam apiangah min thlamuanin hlimna veng veng min pe tel ve tlat si a ni. Eden huan bawhchhiatna chuan Khuanu thikthu chhiatzia a lantir thin a, min Siamtu meuh pawh a hmangaih lakah chuan a thikthu a chhia a nih hi maw..! I duh anga ka awm loh emaw, thikthu chhia anga ka lan chang chuan min hrilh hreh suh la, Siamtuin nunna min pek rual khan dan zawh rual lohin he thikthu chhiatna hian min zawm tlat si vang a ni e. Ka hmangaih che a, hun lo her zel tur hian ka hmangaihna che hi herpui zelin, hun a her a, kum a tam ang zelin kan inhmangaihna pawh hi lo tamin lo pung mawlh mawlh ngei rawh se. Zing Nichhuak chuan ka hmangaihna chibai buk thin che sela, tlai ni tla tur chuan ka hmangaihna che hi nilengin a rinawmzia tilang ngei bawk rawh se, zan thla eng chuan i kianga awm ka thlakhlelh zia a tlangaupui si a.

Thlifim in vaivut leh hnahthel a chhem leng vel chem chem thin ang hian Hmangaihna chuan min chhem a, dan zawh rual lohin min chhemna lam apiangah chuan ka leng vel a nih hi, I hun hlu tak ka hmang ral tih pawh ngaihtuah hleithei lovin chu hmangaihnaah chuan bual at in ka lo awm leh tawh a nih hi le. Ole, kham lo tak chungin, a chhiartu mitmeng mawi tak te kha a lo kham palh hlauh ange, ka ziak hnem tawh si a….tawk rih phawt se….

I tan chauh

M-i

May be small but united...

‘Unity is our strength’. This famous QUOTE will always be the main theme of Bombay Mizo Christian Fellowship Choir. Although we are about 20 Choir members only, we never miss a chance to perform in different places, different churches whenever we get invitation or request from different organizations/groups irrespective of the so called denomination. That’s why, I am proud to be a member of BMCF Choir and I shall always be.

BMCF Choir

The day was 23.12.2011, one of the leading English Newspaper of Mumbai ‘AFTERNOON’ acknowledged their appreciation to the principle and how we uphold the continuous service of BMCF Choir. I, personally and sincerely thank  Mr Zuala Chhangte, revealing our humble and modest service of our BMCF Choir. I will just highlight some point of the story as told by the Newspaper, and if one wish to read the whole story of the mysterious and baffling line of BMCF choir, just click the link below.

Click me : Bombay Mizo Christian Fellowship Choir by Afternoon Post

There’s a nip in the air and colourful Christmas decorations dot random homes and stores. As Christmas season envelops the city, it’s time for the faithful to meditate on the birth of the Son of God, Jesus Christ. For revelers, it’s time to be merry with plum cakes, Christmas turkeys and tipples on the side.

Those fortunate enough to be attending Christmas services in south Mumbai, one may be serenaded by the vibrant Bombay Mizo Christian Fellowship (BMCF) choir which presents English and Mizo carols. What the small choir (around 20 members on average) lacks in numbers, it makes up for with talent. Every Christmas, for the last decade, the BMCF choir has presented classic carols like ‘Hark the Angels’, ‘Silent Night’ along with newer ones like ‘Come On ring those Bells’ and ‘Oh Holy Night’ to an appreciative audience around the city.

For the Mizo community residing in the city numbering less than 500, Christmas is a time of celebration and worship. The northeastern community from Mizoram is predominantly Christian, with more than 90 per cent professing the Faith and Christmas is taken seriously.

“As much as we enjoy living in Mumbai, there is a strong urge to spend our biggest festival with our families back in Mizoram. For some of us, especially the students who are still new, the city can be a lonely place even with friends. But not all parents can afford the fares for a return journey. When it is clear who will be going home for Christmas and who will be staying behind, the choir takes shape and practice begins after the Sunday service,” explains choir conductor, B Ramhluna. A lively debate precedes practice sessions as the young singers nominate their favourite carols. The choir is game for almost any carol, which is relatively “simple” for members who can sing the ‘Hallelujah Chorus’. Practice begins around 6 pm till 8 pm every Sunday. Girls who can hit the higher notes sing the soprano; the others take the contralto part. The male singers also divide themselves between singing the tenor and the bass.  

“Mumbai is a big city and no one has time to practice. Some of the girls have to go back to Navi Mumbai or Kalina from Malabar Hill (where the BMCF holds its service at the All Saints Church). So we have a very limited time to practice the choir,” points out Maruata. In a good year, members can be up to 25, but the choir members usually number around 20, including the conductor and musicians – a keyboardist, guitarist and bassist. Over the years, the choir has performed at different churches and meets from the YWCA at Colaba, Wesley Church to Hiranandani (Powai) in Navi Mumbai. The choir also receives requests to sing from churches in Pune.

“We are always greeted with warmth from everyone. If there is anything that sets us apart, it would have to be that we like to worship our Saviour with whatever talents we have and we take pride in our singing and the songs. We give our best,” concludes Ramhluna.

Vainu Ka Kuah

A rei tawh deuh bawk a, zah pawh a ziaawm deuh tawh alawm le. Kan hna thawhna ah hian ka luh rualpui (batchmate) pali lai kan awm a, hmeichhia pakhat leh mipa pathum kan ni. Kan innel in kan inngaina fal bik hle a, duhsak pawh kan induhsaktawn narawh. Tum khat chu keini lut thar ho chu lunch treat turin min ti a, kan Office pumpui mi 70 rual vel chu hrai an ngai ta nih chu..! Kan phur ang reng phian a, enge Menu ni ang tiin kan thianho chuan kan ri hlut a. Tui in turin ka kalsan zawk a, rei vak lovah chuan ka let leh nghal a. Ka let leh pah chuan ka rilru ah  Chicken Biryani leh Sweet eng ilo vel sem mai chu a lo langa, ‘a hautak loh mai bakah kan duh tlang awm tho sia’, tiin. Tichuan phur tak mai ka rilru a awm chu ka va hrilh ta thuai a, ka sawi pah chuan engmah ngaihtuah lem lo hian ka sir ve ve a mi pahnih awm te chu an darah chuan ka’n kuah ngawt pek a. Pakhat chu ka thianpa Reddy-a, Telegu mi a ni a, min lo kuah let ve mai a, pakhat erawh Sonam-i, Bihari tuipawlh loh ngei mai, hleitling zet, a tet te atanga mipa in kut hmawr pawh a an la deh ngai re re loh ni ngei tur chu a darah ka’n kuah thak mai nih kha..!!

Ka kut chu current in min man a, a paih ta dawr ang deuh hi ka tehkhin ber. A rang a rangin a beng sawn dawr a, kei pawh chuan ka la let rang chiang kher mai..! Chutia kan che vel chu mikhap kar lek a thil thleng a ni, tumahin min hmu hman lovin ka hria a, ka ngaih pawh a tha deuh. A zak erawh ka zak ru hle, mawl ka intia, ngaihtuah tawi tet tut viau hian ka inhre bawk a. Engti a khatia han kuah ta mai nge ka nih ka chhui chhuak zo thlawt lo. Mahni lo maha hnamdang zinga lo fimkhur ve thin tehreng nen, ka mualpho ta derah te ka inngai a. Uiin zak miah lova Ek a ei leh Vawk tuihawka zak miah lova a inbual thin te chu ka it zamah zawk a ni.

Ka thiani nen chuan tha takin kan inbia in kan inchhaih leh nghal bawrh bawrh thova, rilru erawh a nuam chiah lo. Khatia kan che vel lai tumahin min hmu lo emaw ka tih kha, ka thianpa pakhat zawk, Bengali pa, nghal zet mai chuan a lo hmu ru kiau mai chu niin. A hnuah mi chhaih nan tak a hmang ta ziah leh nghal a.

He ka thil tawn ropui lo tak  avang hian Mizo society ka dem hle, ka demna chhan te :

Tet te atangin hmeichhe dim dawi leh zah nachang tumahin min zirtir lo, zirtir a hnekin “ Hmeichhia leh Palchhia chu thlak theih ani ngai e” tih tawngkam chu ka hriat lar ber pawl a ni zawk si.

Kan hmeichhia te lahin zahawm takin awm ta’nge ti chuang lo, mipa han kuah thuak thuak leh mipa bula awm a, a zahawm lo thei ang ber a han rak vak vak te chu nuam an lo ti zawk a. Hnamdang tan mai nilo, tu mit hmuhah mah hian a mawi hlawl lo a ni.

Tin, incheina hian zahawmna a keng tel a ni tih kan lantir peih lo. Inkhawmnaah chauh hian zahawm taka inchei tur kan ti a maw ni..!! kan awm mai mai, kan khawlai len velna, inchhung a kan chhehchhawl thleng pawh hian zahawmna hlauh chin a awm vek tih kan hre tha peih lo. Pawn lam mi tan kher nilo, kan chenpui te tan ngei pawh entawn tlak a inchei a pawimawh.

Heng te avang hian ka rilruah hmeichhe zah lohna nasa takin a intuh lut a, hmeichhia chu thil nung pakhat, khawvel tifamkim ve tu maiah ka ngaih phah dawn hial ta mai a, chuvang chuan he thil hi thleng taah ka ngai.
 

Mahse…

Vawikhat kan piang ve a, engto nei lem lo leh duhthusam ngei mai, nalh leh nuam an tih ang ber mai a an han inchei a, an han vak suau suau mai thin hi chu, an lung hi a va han awi dawn tak em ti te in ka ngaihtuah a. Miin lungawina a neih a liam a hlu a awm thei chuang dawn em ni..? Hnam dang abikin an sakhua leh hnam dan avanga hmel tak ngial pawh tilang thei lova, khuh ngai a an awm lai a, kan Mizo hmeichhia ten an hmel leh taksa bung thenkhat, a  nalh thei ang bera an sawngbawl hnu, hmu thei a kan lo awm ve ringawt mai te hi kan vannei ta phian zawkin ka hre leh hnuhnawh a.

Aiawl bazaar-ah han kal ila, dawr tam zawk nghaktu chu hmeichhia an lo ni a, Sa zawrhna te chenin an lo awm fur mai. Rilruin Mizo mipa te hi khawnge an awm tih zawhna a rawn a rawn siam a, Office an kai deuh vek dawn a nih hi tia ngaihtuah laiin, Office vel te kan dawr ve ta chenga, hmeichhia bawk chuan Office an lo luah lum leh bawk si. ‘ Hmeichhe finin tuikhur ral a kai lo’ tih te, ‘Tlangvalin nula a rim thin’ kan han tih rikngawt thin kha hrilhfiahna dang te pawh kan mamawh der tawh in ka hria.

Mipa leh hmeichhia infiam a, inchhaih bawrh bawrh thin Hnam hi a tam in a rinawm loh. Chutih rualin apa hlang ngawt ai chuan hmeichhe tel ngei a thil tih nawm bik zia leh hahdamthlak zia hre tu te vek erawh kan ni lawi si. Lan mawi tumna leh dan khirkhiap tak ten an zar buai lohva, a hmei a pa kan inchhaih a, kan han infiam bawk bawk thin te hi chu Mizo Society nawmna em em chhan niin ka hre ve tlat. Tin, thilsual tak a nih pawh ka ring ngawt lo. Chuvang chuan, khatia tum loh deuh mai a, Vainu dar dinglam ka va kuah khan ka pian leh seilenna Mizo Society in ka nun leh chetdan thlengin a lo thunun nasat tawh zia te, hlim taka hmeichhia leh mipa kan inchhaih vel te a lo hlimawm thin zia te, dan siamchawp khermei lutuk, khawvel nun ti hrehawm hnawk theiin kan nun a tihbuai vak loh thin te chu ka ngaihtuah let ta a, ka lung a leng veng veng ta hlauh a ni.

Kumhlui Thlah leh Kumthar

BMCF Zaipawl - Aw Lalpa Lawmthu kan Hrilh che/Shine Jesus Shine

Kum 2011 chu koh din rual lohvin a liam ta mup mup mai sia, kan sualna te, kan thil tih that ve te Lal hma a min din khalh tur in mual min liamsan ta. He kum liamta hian ka mittui tam tak a herliam pui rualin ka hlim thawm au ri pawh a liampui ngei e. Kei leh ka chhungte tan kum pawimawh, Pathianin ka nun a harsatna leh buaina namen lo, ka lo tawh tam tak te min chhawng zangkhai kum ti hialin ka ko theiin ka ring. Thiantha tam tak ka chhar thar a, ka thian hlui te nen inpawhna nasa zawk kan neih phah bawk a, Kum tam engzat pawh liam leh mahsela, 2011 kha chu aw… ka ti vawng vawng thin dawn anih hi..!!

Mumbai nu ho

Nula te

Kum 2012 ni chhuak mawi tak chu ka hmu chiah lo nain, mi lungleng thei deuh tan chuan chu zing ni chhuak chu tawrh a har viau chuan ka ring. Zoramah awm mah suh ila, Zoram ngaiin ka rum lem lo, inlungrual tlang tak leh phur taka Mumbai thalai awm khawm kha, a aia thlakhlelh tur pawh awm chuangin ka hre lo. Kum hlui thlah zan chu Pu Lalmalsawma Pachuau, IRS, Goregaon te in ah, Mumbai Mizo thalai tam zawk te nen kan hmang khawm a. Khawi hmun pawh nise Kumhlui thlah zana Zaipawl hla zir hi an tam in ka ring lo, Zaipawl hla zirin bul kan tan a, Bawngsa thau tui tak nen, Dinner in a zui nghal , New Year Cake, countdown neih pahin Pu Malsawma thiannu, Pi Bektei, raipuar teuh chungin a cut a, kan thawm pawh a ring thawkhat viau a ni. Inneitupa Pu Malsawma hla thlan "Hey Tonight" hla a, Tv Charlie, Albert, Fela, Nula Christina, Nula Manuni, Amos, Hmaa etc te ho an han slow tak tak kha chu an zuang tawr tawr ni ta zawk in ka hria.

A thei apiang

Tv Charlie an khawi atanga a neih nge pawh hriat loh, Mizo chhangban kham khawp hnek hnawk tur a rawn ken chu kan kil ho leh ta, amah Pu Malsawma tawngkam takin Momo, Uicho mawng atanga a chum chhuah ngei mai chu, drinks chitin nen, chips chi tin nen, sauce kim biai bawk sia kan han chen ta tak tak anih kha. Tv Joe Mum pawh a puar ngei chuan ka ring.

Hla ngaihthlak tur select sa vek nimahse zai a lang tlat..!! EoOEEO tih Josepha sak ngei mai khan kan han tan a, kan sa zo hleithei lo, Nghilhbik suh aw Rinpui, Khuahmunloh D,hla hlui tak tak kan sa chhuak, Tv Fela pawhin Tiam tlat e tih ve mai duh hmel kha a pu hialin ka hria, Tv Hmaa leh Tv Zora’ n lunglenthlak lutuk mai a “Hmangaihna ka ngen a ni” tih hla an han sak  lai khan Pu Malsawma meuh pawh a tlangval ngaiin a lo kun ngaih mai lawm le..! Kan zai chho zel a, thawm pawh a ring chho zel, German Rallian ah kan lut chho, Tv Fela leh Nula Tebeuhi te an rawn Chheih lam ta, kan phur a zual, kan chheih lam ta mup mup mai a nih kha. A nupui neih chhun chu, Zoram tang fan fan, Thapui Nang nen, Phatsan Lovang etc etc etc tih thlengin pheilai khai tak zet zetin kan zaiin ka lam a, dar 2 vel arik dawn chuan kan style kan thlak ta, Tv Chhantea, kut na, tuam bur pawh chu insum zo lovin Guitar a rawn kuah a, Weslife –My Love a rawn thlawk chhuak ve bawk..!!, MLTR hla, Fool Again, You are my religion etc, kan zai a,  ban kan phar a, a then in an ei reng bawk a..!! Tv Alberta'n nula Hriati Sub committee a tel ve tura an sawm tluk zet a bam chiang kha an tam awm love. Hlim takin, tlaivar thakin hun kan hmang anih kha. Pu Malsawma te chhung inpekna leh inphalna ah lawmthu sawisen loh kan ba niin ka hria,he lai atang hian Lawmthu ka sawi nghal ni teh se.

Kum a thar ta….
Mumbai Mizo Inkhawmna hi thenkhat tan chuan 50Kms aia hla te ani, zingah kan awmna hmun theuhah kan haw a, 3:30pm inkhawmna ah kan han inhmukhawm leh vek thei kha Mumbai Mizo Spirit dik tak ka hmu ve niin ka hria, ka hnuk pawh a ulh dawn hial ani. Kumthar hun lawmawm tak chu mi 60 velin kan hmang khawm a, inkhawm pangai hi 30 bawr vel kan ni thin. Zaipawl, Male Voice, Female Voice te, BMCF Chairman thuchah nung tak ngaithla pahin hun kan hmang zova, Pu HT Sangliana leh Pu Haukhum Hauzel te chhungkua in min rawn hmanpui thei bawk a, kan phuisui viau chuan ka hria.

Fatu te ho

Cake, chips, thingpui leh Vawksa buhchiarin min lo hmuak, a bik takin Mizoram House leh PB’s Family tangkawpin Mumbai Mizote ei tur Vawksa buhchiar an lo buatsaih kha ka sawi lo thei lo. Kan kil ho dawn a, a chuang hnem lutuk a ngem aw tia rilru a lo awm kha, kan han ei tak tak kha chu a, a tlem lam pang hret em aw tih rilru ah a rawn awm leh ta zawk anih kha, kan puarin kan fan tlang chuan ka hria. Tichuan Kumthar chibai tia duhsakna inhlan tawn sap sap chung chuan kum 2012 chu bul kan tan ta a ni.